Diodorus Siculus, Bibliotheca Historica, Books XVIII-XX, book 20, chapter 76

(디오도로스 시켈로스, Bibliotheca Historica, Books XVIII-XX, book 20, chapter 76)

διόπερ χρόνου γενομένου πλείονοσ οἱ μὲν περὶ τὸν Πτολεμαῖον πυθόμενοι τὸν κατάπλουν τῶν πολεμίων ἧκον ὀξέωσ βοηθήσοντεσ καὶ τὴν δύναμιν διασκευάσαντεσ ἔστησαν παρὰ τὸν αἰγιαλόν· ὁ δὲ Δημήτριοσ ἀποτυχὼν καὶ ταύτησ τῆσ ἐκβάσεωσ καὶ τὴν συνάπτουσαν παραλίαν ἀκούων ἕλεσι καὶ λίμναισ ὠχυρῶσθαι φυσικῶσ ἐπαλινδρόμει παντὶ τῷ στόλῳ. εἶτ’ ἐμπεσόντοσ βορέου λαμπροῦ καὶ τοῦ κλύδωνοσ εἰσ ὕψοσ αἰρομένου τρία μὲν σκάφη τῶν τετρηρικῶν καὶ τῶν στρατιωτικῶν πορίων ἅμα κατὰ τὸ αὐτὸ βιαιότερον ὑπὸ τοῦ κύματοσ ἐπὶ τὴν γῆν ἐξεβράσθη καὶ τοῖσ περὶ τὸν Πτολεμαῖον ὑποχείρια κατέστη, αἱ δ’ ἄλλαι ἐκβιασαμένων τῶν πληρωμάτων διεσώθησαν πρὸσ τὴν Ἀντιγόνου στρατοπεδείαν.

τῶν δὲ περὶ τὸν Πτολεμαῖον διειληφότων πᾶσαν τὴν περὶ τὸν ποταμὸν ἔκβασιν φυλακαῖσ ἰσχυραῖσ καὶ πολλῶν μὲν σκαφῶν ποταμίων αὐτῷ παρεσκευασμένων, πάντων δὲ τούτων ἐχόντων βέλη παντοῖα καὶ τοὺσ χρησομένουσ αὐτοῖσ ἄνδρασ οἱ περὶ τὸν Ἀντίγονον οὐ μετρίωσ ἠποροῦντο·

ἡ γὰρ ναυτικὴ δύναμισ ἄχρηστοσ ἦν αὐτοῖσ προκατειλημμένου τοῦ Πηλουσιακοῦ στόματοσ ὑπὸ τῶν πολεμίων, τό τε πεζὸν στράτευμα τὴν ὁρμὴν ἄπρακτον εἶχε τῷ μεγέθει τοῦ ποταμοῦ διειργόμενον, τὸ δὲ μέγιστον, ἡμερῶν ἤδη συχνῶν διεληλυθυιῶν ὑπολείπειν ἤδη συνέβαινε τόν τε σῖτον καὶ τὰ χορτάσματα τοῖσ κτήνεσι.

διὰ δὴ ταῦτα τῆσ δυνάμεωσ ἀθυμούσησ παραλαβὼν τὸ στρατόπεδον καὶ τοὺσ ἡγεμόνασ Ἀντίγονοσ προέθηκε βουλὴν πότερον συμφέρει μένειν καὶ διαπολεμεῖν, ἢ νῦν μὲν ἐπανελθεῖν εἰσ Συρίαν, ὕστερον δὲ κάλλιον παρασκευασαμένουσ στρατεῦσαι καθ’ ὃν ἂν χρόνον ἐλάχιστοσ ὁ Νεῖλοσ εἶναι δόξῃ.

πάντων δὲ κατενεχθέντων ἐπὶ τὸ τὴν ταχίστην ἀπιέναι παρήγγειλε τοῖσ στρατιώταισ ἀναζευγνύειν καὶ ταχὺ πάλιν ἐπανῆλθεν εἰσ τὴν Συρίαν, συμπαραπλέοντοσ αὐτῷ καὶ τοῦ στόλου παντόσ.

Πτολεμαῖοσ δὲ μετὰ τὴν ἀπαλλαγὴν τῶν πολεμίων περιχαρὴσ γενόμενοσ καὶ θύσασ τοῖσ θεοῖσ χαριστήρια τοὺσ φίλουσ εἱστία λαμπρῶσ. καὶ πρὸσ μὲν τοὺσ περὶ Σέλευκον καὶ Λυσίμαχον καὶ Κάσανδρον ἔγραψε περὶ τῶν εὐτυχημάτων καὶ περὶ τοῦ πλήθουσ τῶν πρὸσ αὐτὸν αὐτομολησάντων, αὐτὸσ δὲ τὸ δεύτερον ἠγωνισμένοσ ὑπὲρ τῆσ Αἰγύπτου καὶ νομίσασ δορίκτητον ἔχειν τὴν χώραν ἐπανῆλθεν εἰσ τὴν Ἀλεξάνδρειαν.

일치하는 문장이 없습니다.

SEARCH

MENU NAVIGATION