Diodorus Siculus, Bibliotheca Historica, Books XVIII-XX, book 20, chapter 45

(디오도로스 시켈로스, Bibliotheca Historica, Books XVIII-XX, book 20, chapter 45)

τοῦ δ’ ἐνιαυσίου χρόνου διεληλυθότοσ Ἀθήνησι μὲν ἦρχεν Ἀναξικράτησ, ἐν Ῥώμῃ δὲ ὕπατοι κατέστησαν Ἄππιοσ Κλαύδιοσ καὶ Λεύκιοσ Οὐολόμνιοσ. ἐπὶ δὲ τούτων Δημήτριοσ μὲν ὁ Ἀντιγόνου παραλαβὼν παρὰ τοῦ πατρὸσ δύναμιν ἁδρὰν πεζικήν τε καὶ ναυτικήν, ἔτι δὲ βελῶν καὶ τῶν ἄλλων τῶν εἰσ πολιορκίαν χρησίμων τὴν ἁρμόζουσαν παρασκευὴν ἐξέπλευσεν ἐκ τῆσ Ἐφέσου· παράγγελμα δ’ εἶχεν ἐλευθεροῦν πάσασ μὲν τὰσ κατὰ τὴν Ἑλλάδα πόλεισ, πρώτην δὲ τὴν Ἀθηναίων, φρουρουμένην ὑπὸ Κασάνδρου. καταπλεύσαντοσ δ’ αὐτοῦ μετὰ τῆσ δυνάμεωσ εἰσ τὸν Πειραιᾶ καὶ πανταχόθεν προσβαλόντοσ ἐξ ἐφόδου καὶ κήρυγμα ποιησαμένου Διονύσιοσ ὁ καθεσταμένοσ ἐπὶ τῆσ Μουνυχίασ φρούραρχοσ καὶ Δημήτριοσ ὁ Φαληρεὺσ ἐπιμελητὴσ τῆσ πόλεωσ γεγενημένοσ ὑπὸ Κασάνδρου, πολλοὺσ ἔχοντεσ στρατιώτασ, ἀπὸ τῶν τειχῶν ἠμύνοντο.

τῶν δ’ Ἀντιγόνου στρατιωτῶν τινεσ βιασάμενοι καὶ κατὰ τὴν ἀκτὴν ὑπερβάντεσ ἐντὸσ τοῦ τείχουσ παρεδέξαντο πλείουσ τῶν συναγωνιζομένων.

τὸν μὲν οὖν Πειραιᾶ τοῦτον τὸν τρόπον ἁλῶναι συνέβη, τῶν δ’ ἔνδον Διονύσιοσ μὲν ὁ φρούραρχοσ εἰσ τὴν Μουνυχίαν συνέφυγε, Δημήτριοσ δ’ ὁ Φαληρεὺσ ἀπεχώρησεν εἰσ ἄστυ. τῇ δ’ ὑστεραίᾳ πεμφθεὶσ μεθ’ ἑτέρων πρεσβευτὴσ ὑπὸ τοῦ δήμου πρὸσ Δημήτριον καὶ περὶ τῆσ αὐτονομίασ διαλεχθεὶσ καὶ τῆσ ἰδίασ ἀσφαλείασ ἔτυχε παραπομπῆσ καὶ τὰ κατὰ τὰσ Ἀθήνασ ἀπογινώσκων ἔφυγεν εἰσ τὰσ Θήβασ, ὕστερον δὲ πρὸσ Πτολεμαῖον εἰσ Αἴγυπτον.

οὗτοσ μὲν οὖν ἔτη δέκα τῆσ πόλεωσ ἐπιστατήσασ ἐξέπεσεν ἐκ τῆσ πατρίδοσ τὸν εἰρημένον τρόπον.

ὁ δὲ δῆμοσ τῶν Ἀθηναίων κομισάμενοσ τὴν ἐλευθερίαν ἐψηφίσατο τιμὰσ τοῖσ αἰτίοισ τῆσ αὐτονομίασ. Δημήτριοσ δ’ ἐπιστήσασ τοὺσ πετροβόλουσ καὶ τὰσ ἄλλασ μηχανὰσ καὶ τὰ βέλη προσέβαλλε τῇ Μουνυχίᾳ καὶ κατὰ γῆν καὶ κατὰ θάλατταν. ἀμυνομένων δὲ τῶν ἔνδον ἀπὸ τῶν τειχῶν εὐρώστωσ συνέβαινε τοὺσ μὲν περὶ Διονύσιον προέχειν ταῖσ δυσχωρίαισ καὶ ταῖσ τῶν τόπων ὑπεροχαῖσ, οὔσησ τῆσ Μουνυχίασ ὀχυρᾶσ οὐ μόνον ἐκ φύσεωσ, ἀλλὰ καὶ ταῖσ τῶν τειχῶν κατασκευαῖσ, τοὺσ δὲ περὶ τὸν Δημήτριον τῷ τε πλήθει τῶν στρατιωτῶν πολλαπλασίουσ εἶναι καὶ ταῖσ παρασκευαῖσ πολλὰ πλεονεκτεῖν.

τέλοσ δ’ ἐπὶ δύο ἡμέρασ συνεχῶσ τῆσ πολιορκίασ γινομένησ οἱ μὲν φρουροὶ τοῖσ καταπέλταισ καὶ πετροβόλοισ συντιτρωσκόμενοι καὶ διαδόχουσ οὐκ ἔχοντεσ ἠλαττοῦντο, οἱ δὲ περὶ τὸν Δημήτριον ἐκ διαδοχῆσ κινδυνεύοντεσ καὶ νεαλεῖσ ἀεὶ γινόμενοι, διὰ τῶν πετροβόλων ἐρημωθέντοσ τοῦ τείχουσ, ἐνέπεσον εἰσ τὴν Μουνυχίαν καὶ τοὺσ μὲν φρουροὺσ ἠνάγκασαν θέσθαι τὰ ὅπλα, τὸν δὲ φρούραρχον Διονύσιον ἐζώγρησαν.

일치하는 문장이 없습니다.

SEARCH

MENU NAVIGATION