Diodorus Siculus, Bibliotheca Historica, Books XVIII-XX, book 20, chapter 37

(디오도로스 시켈로스, Bibliotheca Historica, Books XVIII-XX, book 20, chapter 37)

ἐπ’ ἄρχοντοσ δ’ Ἀθήνησι Χαρίνου Ῥωμαῖοι μὲν τὴν ὕπατον ἀρχὴν παρέδοσαν Ποπλίῳ Δεκίῳ καὶ Κοΐντῳ Φαβίῳ, παρὰ δὲ τοῖσ Ἠλείοισ ὀλυμπιὰσ ἤχθη ὀγδόη πρὸσ ταῖσ ἑκατὸν δέκα, καθ’ ἣν ἐνίκα στάσιον Ἀπολλωνίδησ Τεγεάτησ. κατὰ δὲ τούτουσ τοὺσ χρόνουσ Πτολεμαῖοσ μὲν ἐκ τῆσ Μύνδου πλεύσασ ἁδρῷ στόλῳ διὰ νήσων ἐν παράπλῳ τὴν Ἄνδρον ἠλευθέρωσε καὶ τὴν φρουρὰν ἐξήγαγε. κομισθεὶσ δ’ ἐπὶ τὸν Ἰσθμὸν Σικυῶνα καὶ Κόρινθον παρέλαβεν παρὰ Κρατησιπόλεωσ. τὰσ δὲ αἰτίασ δι’ ἃσ ἐκυρίευσε πόλεων ἐπιφανῶν προδεδηλωκότεσ ἐν ταῖσ πρὸ ταύτησ βίβλοισ τὸ διλογεῖν ὑπὲρ τῶν αὐτῶν παρήσομεν. ἐπεβάλετο μὲν οὖν καὶ τὰσ ἄλλασ Ἑλληνίδασ πόλεισ Πτολεμαῖοσ ἐλευθεροῦν, μεγάλην προσθήκην ἡγούμενοσ ἔσεσθαι τοῖσ ἰδίοισ πράγμασι τὴν τῶν Ἑλλήνων εὔνοιαν·

ἐπεὶ δὲ οἱ Πελοποννήσιοι συνταξάμενοι χορηγήσειν σῖτον καὶ χρήματα τῶν ὡμολογημένων οὐδὲν συνετέλουν, ἀγανακτήσασ ὁ δυνάστησ πρὸσ μὲν Κάσανδρον εἰρήνην ἐποιήσατο, καθ’ ἣν ἑκατέρουσ ἔδει κυριεύειν τῶν πόλεων ὧν εἶχον, τὴν δὲ Σικυῶνα καὶ Κόρινθον ἀσφαλισάμενοσ φρουρᾷ διῆρεν εἰσ τὴν Αἴγυπτον. ἅμα δὲ τούτοισ πραττομένοισ Κλεοπάτρα τῷ μὲν Ἀντιγόνῳ προσκόπτουσα, τῇ δ’ αἱρέσει πρὸσ τὸν Πτολεμαῖον ἀποκλίνουσα προῆγεν ἐκ Σάρδεων, ὡσ διακομισθησομένη πρὸσ ἐκεῖνον.

ἦν δὲ ἀδελφὴ μὲν Ἀλεξάνδρου τοῦ Πέρσασ καταπολεμήσαντοσ, θυγάτηρ δὲ Φιλίππου τοῦ Ἀμύντου, γυνὴ δὲ γεγενημένη τοῦ εἰσ Ἰταλίαν στρατεύσαντοσ Ἀλεξάνδρου. διὰ τὴν ἐπιφάνειαν οὖν τοῦ γένουσ οἱ περὶ Κάσανδρον καὶ Λυσίμαχον, ἔτι δὲ Ἀντίγονον καὶ Πτολεμαῖον καὶ καθόλου πάντεσ οἱ μετὰ τὴν Ἀλεξάνδρου τελευτὴν ἀξιολογώτατοι τῶν ἡγεμόνων ταύτην ἐμνήστευον·

ἕκαστοσ γὰρ τούτῳ τῷ γάμῳ συνακολουθήσειν Μακεδόνασ ἐλπίζων ἀντείχετο τῆσ βασιλικῆσ οἰκίασ, ὡσ τὴν τῶν ὅλων ἀρχὴν περιστήσων εἰσ ἑαυτόν. ὁ δὲ ἐπιμελητὴσ τῶν Σάρδεων ἔχων παράγγελμα παρ’ Ἀντιγόνου τηρεῖν τὴν Κλεοπάτραν, διεκώλυεν αὐτῆσ τὴν ἔξοδον·

ὕστερον δὲ προστάξαντοσ τοῦ δυνάστου διά τινων γυναικῶν ἐδολοφόνησεν. ὁ δ’ Ἀντίγονοσ οὐ βουλόμενοσ λέγεσθαι κατ’ αὐτοῦ περὶ τῆσ ἀναιρέσεωσ, τῶν γυναικῶν τινασ ἐκόλασεν ὡσ ἐπιβεβουλευκυίασ καὶ τὰ περὶ τὴν ἐκφορὰν βασιλικῶσ ἐφιλοκάλησεν.

Κλεοπάτρα μὲν οὖν περιμάχητοσ γενομένη παρὰ τοῖσ ἐπιφανεστάτοισ ἡγεμόσι πρὸ τοῦ συντελεσθῆναι τὸν γάμον τοιαύτησ ἔτυχε καταστροφῆσ. ἡμεῖσ δὲ διεληλυθότεσ τὰ κατὰ τὴν Ἀσίαν καὶ τὴν Ἑλλάδα μεταβιβάσομεν τὸν λόγον ἐπὶ τὰ ἄλλα μέρη τῆσ οἰκουμένησ.

일치하는 문장이 없습니다.

SEARCH

MENU NAVIGATION