Appian, The Foreign Wars, chapter 5 4:

(아피아노스, The Foreign Wars, chapter 5 4:)

Οἱ μὲν δὴ πάλιν ἐσ Σάμον ἀνήγοντο, καὶ ὁ χρόνοσ ἔληγε Λιουίῳ τῆσ ναυαρχίασ· τοῦ δ’ αὐτοῦ χρόνου Σέλευκοσ ὁ Ἀντιόχου τὴν Εὐμένουσ γῆν ἐδῄου καὶ Περγάμῳ παρεκάθητο, τοὺσ ἄνδρασ ἐσ τὴν πόλιν κατακλείσασ. ὅθεν ὁ Εὐμένησ ἐσ Ἐλαίαν, τὸ τῆσ ἀρχῆσ ἐπίνειον, διέπλει κατὰ σπουδήν, καὶ σὺν αὐτῷ Λεύκιοσ Αἰμίλιοσ Ῥηγίλλοσ ὁ Λιουίου τὴν ναυαρχίαν παραδεδεγμένοσ. ἧκον δὲ καὶ παρὰ τῶν Ἀχαιῶν Εὐμένει σύμμαχοι χίλιοι πεζοὶ καὶ ἱππεῖσ ἑκατὸν ἐπίλεκτοι, ὧν Διοφάνησ ὁ στρατηγὸσ ἀπὸ τοῦ τείχουσ ἰδὼν τοὺσ Σελευκείουσ παίζοντάσ τε καὶ μεθύοντασ ἐκ καταφρονήσεωσ, ἔπειθε τοὺσ Περγαμηνοὺσ ἑαυτῷ συνεκδραμεῖν ἐπὶ τοὺσ πολεμίουσ. οὐχ ὑφισταμένων δ’ ἐκείνων, ὥπλισε τοὺσ ἰδίουσ χιλίουσ καὶ τοὺσ ἑκατὸν ἱππέασ. καὶ προαγαγὼν ὑπὸ τὸ τεῖχοσ ἔστησεν ἀτρεμεῖν, ὑπερορώντων αὐτοὺσ ἐσ πολὺ τῶν πολεμίων ὡσ ὀλίγουσ τε καὶ οὐ τολμῶντασ ἐσ χεῖρασ ἐλθεῖν. ὁ δ’ ἀριστοποιουμένοισ ἐπιδραμὼν ἐθορύβησέ τε καὶ ἐτρέψατο τοὺσ προφύλακασ, τῶν δ’ ἄλλων ἐπὶ τὰ ὅπλα ἀναπηδώντων, καὶ τοὺσ ἵππουσ περιχαλινούντων ἢ φεύγοντασ διωκόντων ἢ δυσχερῶσ ἀναβαινόντων οὐκ εὐσταθοῦντασ, ἐκράτει πάνυ λαμπρῶσ, ἐπιβοώντων ἄνωθεν ἀπὸ τοῦ τείχουσ τῶν Περγαμηνῶν, καὶ οὐδὲ τότε προελθεῖν ὑφισταμένων. κτείνασ δ’ ὅσουσ ἐδύνατο ὡσ ἐν ἐπιδείξει ταχείᾳ, καί τινασ αἰχμαλώτουσ ἑλὼν ἄνδρασ τε καὶ ἵππουσ, ἐπανῄει κατὰ σπουδήν. καὶ τῆσ ἐπιούσησ αὖθισ ἵστη τοὺσ Ἀχαιοὺσ ὑπὸ τὸ τεῖχοσ, οὐδὲ τότε τῶν Περγαμηνῶν αὐτῷ συνεξιόντων. Σέλευκοσ δ’ ἱππεῦσι πολλοῖσ αὐτῷ προσεπέλαζε προκαλούμενοσ. ὁ δὲ τότε μὲν οὐκ ἐπεξῄει, παρ’ αὐτὸ τὸ τεῖχοσ ἑστώσ, ἀλλ’ ἐφυλάσσετο· ἐπεὶ δ’ ὁ Σέλευκοσ παραμείνασ ἐσ μεσημβρίαν, καμνόντων οἱ ἤδη τῶν ἱππέων ἐπέστρεφε καὶ ἐπανῄει, τοῖσ τελευταίοισ αὐτοῦ ὁ Διοφάνησ ἐπιθέμενοσ καὶ θορυβοποιήσασ, καὶ βλάψασ ὅσα καὶ τότε δυνατὸσ ἦν, εὐθὺσ ἐπανῄει πάλιν ὑπὸ τὸ τεῖχοσ. καὶ τόνδε τὸν τρόπον συνεχῶσ ἔν τε χορτολογίαισ καὶ ξυλείαισ ἐνεδρεύων καὶ ἀεί τι ἐνοχλῶν ἀπό τε Περγάμου τὸν Σέλευκον ἀνέστησε καὶ ἀπὸ τῆσ ἄλλησ Εὐμένουσ χώρασ ἐξήλασεν.

일치하는 문장이 없습니다.

SEARCH

MENU NAVIGATION