호흡부호 보기
강세부호 보기
장단부호 보기
작은 Iota 보기
모든 부호 보기
Λυδοὶ δὲ νόμοισι μὲν παραπλησίοισι χρέωνται καὶ Ἕλληνέσ, χωρὶσ ἢ ὅτι τὰ θήλεα τέκνα καταπορνεύουσι, πρῶτοι δὲ ἀνθρώπων τῶν ἡμεῖσ ἴδμεν νόμισμα χρυσοῦ καὶ ἀργύρου κοψάμενοι ἐχρήσαντο, πρῶτοι δὲ καὶ κάπηλοι ἐγένοντο. φασὶ δὲ αὐτοὶ Λυδοὶ καὶ τὰσ παιγνίασ τὰσ νῦν σφίσι τε καὶ Ἕλλησι κατεστεώσασ ἑωυτῶν ἐξεύρημα γενέσθαι·
ἅμα δὲ ταύτασ τε ἐξευρεθῆναι παρὰ σφίσι λέγουσι καὶ Τυρσηνίην ἀποικίσαι, ὧδε περὶ αὐτῶν λέγοντεσ. ἐπὶ Ἄτυοσ τοῦ Μάνεω βασιλέοσ σιτοδείην ἰσχυρὴν ἀνὰ τὴν Λυδίην πᾶσαν γενέσθαι, καὶ τοὺσ Λυδοὺσ τέωσ μὲν διάγειν λιπαρέοντασ, μετὰ δὲ ὡσ οὐ παύεσθαι, ἄκεα δίζησθαι, ἄλλον δὲ ἄλλο ἐπιμηχανᾶσθαι αὐτῶν.
ἐξευρεθῆναι δὴ ὦν τότε καὶ τῶν κύβων καὶ τῶν ἀστραγάλων καὶ τῆσ σφαίρησ καὶ τῶν ἀλλέων πασέων παιγνιέων τὰ εἴδεα, πλὴν πεσσῶν τούτων γὰρ ὦν τὴν ἐξεύρεσιν οὐκ οἰκηιοῦνται Λυδοί. ποιέειν δὲ ὧδε πρὸσ τὸν λιμὸν ἐξευρόντασ, τὴν μὲν ἑτέρην τῶν ἡμερέων παίζειν πᾶσαν, ἵνα δὴ μὴ ζητέοιεν σιτία, τὴν δὲ ἑτέρην σιτέεσθαι παυομένουσ τῶν παιγνιέων.
τοιούτῳ τρόπῳ διάγειν ἐπ’ ἔτεα δυῶν δέοντα εἴκοσι. ἐπείτε δὲ οὐκ ἀνιέναι τὸ κακὸν ἀλλ’ ἔτι ἐπὶ μᾶλλον βιάζεσθαι οὕτω δὴ τὸν βασιλέα αὐτῶν δύο μοίρασ διελόντα Λυδῶν πάντων κληρῶσαι τὴν μὲν ἐπὶ μόνῃ τὴν δὲ ἐπὶ ἐξόδῳ ἐκ τῆσ χώρησ, καὶ ἐπὶ μὲν τῇ μένειν αὐτοῦ λαγχανούσῃ τῶν μοιρέων ἑωυτὸν τὸν βασιλέα προστάσσειν, ἐπὶ δὲ τῇ ἀπαλλασσομένῃ τὸν ἑωυτοῦ παῖδα, τῷ οὔνομα εἶναι Τυρσηνόν.
λαχόντασ δὲ αὐτῶν τοὺσ ἑτέρουσ ἐξιέναι ἐκ τῆσ χώρησ καταβῆναι ἐσ Σμύρνην καὶ μηχανήσασθαι πλοῖα, ἐσ τὰ ἐσθεμένουσ τὰ πάντα ὅσα σφι ἦν χρηστὰ ἐπίπλοα, ἀποπλέειν κατὰ βίου τε καὶ γῆσ ζήτησιν, ἐσ ὃ ἔθνεα πολλὰ παραμειψαμένουσ ἀπικέσθαι ἐσ Ὀμβρικούσ, ἔνθα σφέασ ἐνιδρύσασθαι πόλιασ καὶ οἰκέειν τὸ μέχρι τοῦδε.
ἀντὶ δὲ Λυδῶν μετονομασθῆναι αὐτοὺσ ἐπὶ τοῦ βασιλέοσ τοῦ παιδόσ, ὅσ σφεασ ἀνήγαγε, ἐπὶ τούτου τὴν ἐπωνυμίην ποιευμένουσ ὀνομασθῆναι Τυρσηνούσ.
Λυδοὶ μὲν δὴ ὑπὸ Πέρσῃσι ἐδεδούλωντο.
호흡부호 보기
강세부호 보기
장단부호 보기
작은 Iota 보기
모든 부호 보기