Dio, Chrysostom, Orationes, ΠΕΡΙ ΔΟΥΛΕΙΑΣ ΚΑΙ ΕΛΕΥΘΕΡΙΑΣ Β. 49:

τούτου δὲ σημεῖον σαφέστατον· ἐπὶ γὰρ τῶν ἀλεκτρυόνων καὶ τῶν ἵππων καὶ τῶν κυνῶν διέμεινε τὸ ὄνομα, ὥσπερ καὶ ἐπὶ τῶν ἀνθρώπων εἶχε τὸ παλαιόν. ὁ γὰρ ἵππον θεασάμενοσ θυμοειδῆ καὶ γαῦρον καὶ πρὸσ δρόμον εὖ ἔχοντα, οὐ πυθόμενοσ εἴτε ἐξ Ἀρκαδίασ ὁ πατὴρ αὐτοῦ ἔτυχεν ὢν εἴτε ἐκ Μηδίασ εἴτε Θετταλόσ, φησὶν εὐγενῆ τὸν ἵππον αὐτὸν κρίνων. ὁμοίωσ δὲ ὃσ ἂν ἔμπειροσ ᾖ κυνῶν, ἐὰν κύνα ἴδῃ ταχεῖαν καὶ πρόθυμον καὶ συνετὴν περὶ τὸ ἴχνοσ, οὐθὲν ἐπιζητεῖ πότερον ἐκ Καρῶν τὸ γένοσ ἢ Λάκαινα ἢ ἀλλαχόθεν ποθέν, ἀλλά φησι γενναίαν τὴν κύνα· τὸ αὐτὸ δὲ τοῦτο ἐπ̓ ἀλεκτρυόνοσ καὶ τῶν ἄλλων ζῴων.