헬라어 문장 검색 - ΔιοΞηρ́Ορατιον

(디오, 크리소토모스, 연설 (2), ΠΕΡΙ ΦΙΛΟΣΟΦΙΑΣ.)

Δ. Φέρε, εἴ τινοσ ἀκούοισ λέγοντοσ ὅτι βούλεται γεωργεῖν, μηδὲν δὲ πρὸσ τοῦτο πράττοντα ὁρῴησ αὐτόν, μήτε βοῦσ ὠνούμενον ἤ τρέφοντα μήτε ἄροτρα κατασκευαζόμενον μήτε τὰ ἄλλα τὰ πρὸσ τὴν γεωργίαν σκεύη, μηδὲ ἐνοικοῦντα ἐν ἀγρῷ αὐτὸν ἢ αὐτὸν μὴ κεκτημένον ἢ παῤ ἄλλου μισθωσάμενον, ἀλλ̓ ἐν ἄστει τὰ πολλὰ διατρίβοντα περὶ τὴν ἀγορὰν καὶ τὸ γυμνάσιον καὶ περὶ πότουσ ὄντα καὶ ἑταίρασ καὶ τὴν τοιαύτην ῥᾳθυμίαν, πότερον προσέξεισ οἷσ λέγει μᾶλλον ἢ τοῖσ πραττομένοισ ὑπ̓ αὐτοῦ; καὶ πότερα φήσεισ γεωργὸν εἶναι τὸν ἄνθρωπον καὶ ἐργάτην ἢ τῶν ἀργῶν καὶ ῥᾳθύμων; ‐ Δῆλον ὅτι τῶν ἀργῶν.

‐ Δ. Εἰε͂ν· ὅμοιον, μήτε κύνασ κεκτημένοσ μήτε λίνα μήτε ἵππον μήτε ὅλωσ ἐπὶ θήραν ἐξιών, ἀλλὰ μήτε ὑπὸ ἡλίου τὸ σῶμα ἐπικεκαυμένοσ μήτε ψύχουσ ἀνέχεσθαι δυνάμενοσ, ἐσκιατραφημένοσ δὲ καὶ ἁπαλὸσ καὶ μάλιστα ἐοικὼσ ταῖσ γυναιξίν, ἔσθ̓ ὅπωσ ὑπολάβοισ ἂν τἀληθῆ λέγειν τοῦτον καὶ προσήκειν τι αὐτῷ κυνηγεσίων;

‐ Οὐκ ἔγωγε.

‐ Δ.

Ἄτοπον γὰρ ἀπὸ τῶν λόγων μᾶλλον, οὓσ λέγει τισ, ἢ ἀπὸ τῶν ἔργων εἰδέναι καὶ τεκμαίρεσθαι τὸν ἑκάστου βίον. εἰ δέ τισ ἐπαγγέλλοιτο μὲν ὡσ μουσικὴν ἄριστα ἐπιστάμενοσ καὶ περὶ τοῦτο διατρίβων, μήτε δὲ αὐτοῦ κιθαρίζοντοσ μηδεὶσ πώποτε ἀκούσαι, ἀλλὰ μηδὲ κιθάραν ἢ λύραν ἔχοντα ὁρῴη τισ, μήτε λόγον τινὰ διεξιόντα τῶν κατὰ μουσικὴν δίχα γε τῆσ ἐπαγγελίασ καὶ τοῦ ἐπίστασθαι φάσκειν τοῦ Ὀρφέωσ ἄμεινον καὶ τοῦ Θαμύρα, βλέποι δ̓ αὐτὸν ἀλεκτρυόνασ ἢ ὄρτυγασ θεραπεύοντα καὶ τρέφοντα καὶ μετὰ τῶν τοιούτων ἀνθρώπων ὡσ τὸ πολὺ διατρίβοντα, πότερον τῶν μουσικῶν τοῦτον δεῖ ὑπολαμβάνειν ἢ τούτων τῶν ἀνθρώπων, μεθ̓ ὧν ἐστι καὶ οἷσ ταὐτὰ ἐπιτηδεύει; ‐ Δῆλον ὅτι τούτων. ‐ Δ.

Εἂν δὲ ἀστρονόμοσ εἶναί τισ ὑπισχνῆται καὶ σαφέστατα ἐπίστασθαι τὰσ περιόδουσ καὶ πορείασ καὶ τὰ ἀποστήματα πῶσ ἔχουσι πρὸσ ἄλληλα ἡλίου τε καὶ σελήνησ καὶ τῶν τοιούτων ἄστρων καὶ τὰ οὐράνια πάθη, μηδὲν δὲ τοιοῦτον ᾖ προῃρημένοσ μηδὲ περὶ ταῦτα φροντίζων, ἀλλὰ μᾶλλον συνὼν τοῖσ κυβεύουσι καὶ μετ̓ ἐκείνων ἑκάστοτε ζῶν καὶ βλεπόμενοσ, ἀστρονόμον τοῦτον φήσεισ ἢ κυβευτήν; ‐ Οὐ μὰ τὸν Δί̓ ἀστρονομίασ ἡγησαίμην ἂν ἔγωγε προσήκειν αὐτῷ τι, πολὺ δὲ μᾶλλον κυβείασ.

‐ Δύο δέ τινων τοῦ μὲν λέγοντοσ ὅτι πλευσεῖται τὴν ταχίστην καὶ πολλὰ κερδανεῖ χρήματα ἀπὸ ἐμπορίασ, μήτε δὲ ναῦσ μήτε ναύτασ παρεσκευασμένου μήτε φόρτον ἔχοντοσ μηδένα, ἀλλὰ μηδὲ προσιόντοσ ὅλωσ τῷ λιμένι μηδὲ τῇ θαλάττῃ, τοῦ δὲ πραγματευομένου περὶ ταῦτα καὶ πλοῖον περισκοποῦντοσ καὶ κυβερνήτην καὶ χρήματα ἐμβαλλομένου·

πότερον αὐτῶν φήσεισ ἐμπορίᾳ προσέχειν τὸν νοῦν; τὸν λέγοντα ἢ τὸν πράττοντα καὶ παρασκευαζόμενον τὰ τοῦ πλοῦ καὶ τὰ τῆσ ἐμπορίασ; ‐ Ἐγὼ μὲν τοῦτον.

‐ Δ. Ἐπὶ παντὶ ἄρα τὸν μὲν λόγον, εἰ καθ̓ αὑτὸν λέγοιτο, μηδενὸσ ἔργου προσόντοσ, ἄκυρον ἡγήσῃ καὶ οὐ πιστόν· τὸ δ̓ ἔργον αὐτὸ πιστόν τε καὶ ἀληθέσ, ἐὰν καὶ μὴ προάγῃ λόγοσ; ‐ Οὕτωσ. ‐ Δ. φιλοσοφίασ δὲ οὐδέν ἐστιν οἰκεῖον ἔργον οὐδὲ πρᾶγμα οὐδὲ παρασκευή;

‐ Πάνυ μὲν οὖν.

‐ Δ. Ἀλλὰ ταῦτα μὲν ἄδηλα τὰ προσήκοντα τῷ φιλοσόφῳ καὶ φιλοσοφίᾳ, τὰ δὲ τῶν ἐμπόρων καὶ γεωργῶν καὶ μουσικῶν καὶ ἀστρονόμων καὶ ὧν νῦν δὴ εἶπον ἔκδηλα καὶ φανερά; ‐ Οὔ μοι δοκεῖ. ‐ Δ. Ἀλλὰ δὴ καὶ λόγοι τινέσ εἰσιν, ὧν δεῖ τὸν φιλοσοφοῦντα ἀκούειν, καὶ μαθήματα, ἃ δεῖ μανθάνειν, καὶ δίαιτα, ἣν δεῖ διαιτᾶσθαι, καὶ καθόλου βίοσ ἄλλοσ μὲν τοῦ φιλοσοφοῦντοσ, ἄλλοσ δὲ τῶν πολλῶν ἀνθρώπων· ὁ μὲν πρὸσ ἀλήθειαν καὶ φρόνησιν τείνων καὶ θεῶν ἐπιμέλειαν καὶ θεραπείαν τῆσ αὑτοῦ ψυχῆσ, μακρὰν ἀλαζονείασ καὶ ἀπάτησ καὶ τρυφῆσ, εὐτέλειάν τε καὶ σωφροσύνην ‐ καὶ γὰρ στολὴ ἑτέρα μὲν τοῦ φιλοσοφοῦντοσ, ἑτέρα δὲ τῶν ἰδιωτῶν καὶ κατάκλισισ καὶ γυμνάσια καὶ λουτρὰ καὶ ἡ ἄλλη δίαιτα, καὶ τὸν μὲν ἀκολουθοῦντα καὶ χρώμενον τούτοισ δεῖ νομίζειν ὡσ φιλοσοφίᾳ προσέχοντα τὸν νοῦν· τὸν δὲ ἐν μηδενὶ τούτων διαφέροντα μηδὲ ὅλωσ ἕτερον ὄντα τῶν πολλῶν οὐχ ἕνα ἐκείνων θετέον, κἂν μυριάκισ εἴπῃ τε καὶ ἐπαγγείληται φιλοσοφεῖν ἐναντίον τοῦ δήμου τοῦ Ἀθηναίων ἢ Μεγαρέων ἢ παρὰ τοῖσ Λακεδαιμονίων βασιλεῦσιν·

ἀλλ̓ ὠστέον τοῦτον τὸν ἄνθρωπον εἰσ τοὺσ ἀλαζόνασ καὶ ἀνοήτουσ καὶ τρυφερούσ.

καίτοι μουσικὸν μὲν οὐκ ἀδύνατον εἷναι μὴ πράττοντα τὰ τοῦ μουσικοῦ·

ἡ γὰρ μουσικὴ οὐκ ἀναγκάζει ἀεὶ προσέχειν αὑτῇ τὸν νοῦν καὶ μηδὲν ἄλλο ποιεῖσθαι περὶ πλείονοσ· καὶ ἀστρονόμον ὄντα οὐδὲν ἴσωσ κωλύει τρέφειν ἀλεκτρυόνασ ἢ κυβεύειν· οὐδὲν γὰρ ἡ ἀστρονομία ἐμποδών ἐστι τὸ μὴ τὰ δέοντα ποιεῖν·

καὶ νὴ Δία ἱππικὸν γενόμενον ἢ κυβερνήτην ἀγαθὸν ἢ γεωμέτρην ἢ γράμματα εἰδότα οὐδὲν θαυμαστὸν παρὰ ταῖσ ἑταίραισ ἢ ταῖσ αὐλητρίσιν ὁρᾶσθαι· τὸ γὰρ ταῦτα ἐπίστασθαι οὐδὲν ποιεῖ βελτίω τὴν τοῦ ἀνθρώπου ψυχὴν οὐδὲ ἀποτρέπει τῶν ἁμαρτημάτων· φιλοσοφίᾳ δὲ προσέχων τισ καὶ μετασχὼν τούτου τοῦ μαθήματοσ οὐκ ἄν ποτε ἀποσταίη τῶν βελτίστων, οὐδὲ τούτων ἀμελήσασ αἰσχρόν τι καὶ φαῦλον προέλοιτ̓ ἂν πράττειν οὐδὲ ἀργεῖν καὶ ὀψοφαγεῖν καὶ μεθύσκεσθαι.

τὸ γὰρ ταῦτα θαυμάζειν καὶ τὴν τούτων ἐπιθυμίαν ἐξαιρεῖ τῆσ ψυχῆσ καὶ τοὐναντίον εἰσ μῖσοσ αὐτῶν καὶ κατάγνωσιν προάγει . τὸ δέ γε φῆσαι φιλοσοφεῖν καὶ ἀλαζονεύεσθαι καὶ αὑτὸν ἐξαπατῆσαι καὶ τοὺσ ἄλλουσ οὐδὲν ἴσωσ κωλύει.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Dio, Chrysostom, Orationes, ΠΕΡΙ ΦΙΛΟΣΟΦΙΑΣ.

(디오, 크리소토모스, 연설 (2), ΠΕΡΙ ΦΙΛΟΣΟΦΙΑΣ.)

상위

목록

SEARCH

MENU NAVIGATION