Dio, Chrysostom, Orationes, ΒΟΡΥΣΘΕΝΙΤΙΚΟΣ ΟΝ ΑΝΕΓΝΩ ΕΝ ΤΗΙ ΠΑΤΡΙΔΙ. 20:

Τοῦτο μέν, ἔφην, ἀπολελαύκασιν ἀπ’ Ὁμήρου ὥσπερ ἀπὸ ὀφθαλμίασ. τὸν δὲ Φωκυλίδην ὑμεῖσ μὲν οὐκ ἐπίστασθε, ὡσ λέγεισ· πάνυ δὲ τῶν ἐνδόξων γέγονε ποιητῶν. ὥσπερ οὖν ἐπειδάν τισ τῶν ἐμπόρων καταπλεύσῃ πρὸσ ὑμᾶσ οὐ πρότερον παρα γεγονώσ, οὐκ εὐθὺσ ἠτιμάσατε αὐτόν, ἀλλὰ πρότερον γευσάμενοι τοῦ οἴνου, κἂν ἄλλο τι φορτίον ἄγῃ, δεῖγμα λαβόντεσ, ἐὰν μὲν ἀρέσῃ ὑμᾶσ, ὠνεῖσθε, εἰ δὲ μή, ἐᾶτε· οὕτωσ, ἔφην, καὶ τῆσ τοῦ Φωκυλίδου ποιήσεωσ ἔξεστί σοι λαβεῖν δεῖγμα ἐν βραχεῖ. καὶ γάρ ἐστιν οὐ τῶν μακράν τινα καὶ συνεχῆ ποίησιν εἰρόντων, ὥσπερ ὁ ὑμέτεροσ μίαν ἑξῆσ διέξεισι μάχην ἐν πλείοσιν ἢ πεντακισχιλίοισ ἔπεσιν, ἀλλὰ κατὰ δύο καὶ τρία ἔπη αὐτῷ καὶ ἀρχὴν ἡ ποίησισ καὶ πέρασ λαμβάνει.