Dio, Chrysostom, Orationes, ΠΑΡΑΙΤΗΣΙΣ ΑΡΧΗΣ ΕΝ ΒΟΥΛΗΙ. 19:

τῷ δὲ τὴν ἀρχὴν ταύτην ἰσχυρῶσ καὶ ἐγκρατῶσ ἄρχοντι οὐ χαλεπὸν ἤδη καὶ συμπάντων ἀνθρώπων κρείττω γίγνεσθαι. ὁπόταν δὲ ταῦτα διεξίω περὶ τῶν φιλοσόφων, μηδείσ με ἡγείσθω πρὸσ τὸ σχῆμα ἀφορῶντα λέγειν καὶ πρὸσ τὸ ὄνομα. οὔτε γὰρ τὸν οἶνον ἐκ τοῦ κεράμου κρίνουσιν οἱ νοῦν ἔχοντεσ· πολλάκισ γὰρ εὑρήσεισ ἐν σπουδαίῳ κεράμῳ τὸν ἐκ τῶν καπηλείων οἶνον ἐξεστηκότα· οὔτε τὸν ἄνδρα τὸν πεπαιδευμένον ἐκ τοῦ σχήματοσ.