Dio, Chrysostom, Orationes, ΑΠΟΛΟΓΙΣΜΟΣ ΟΠΩΣ ΕΣΧΗΚΕ ΠΡΟΣ ΤΗΝ ΠΑΤΡΙΔΑ. 12:

τοῦτο ἴσωσ ἐννοεῖν ἄξιον. καίτοι σμικρῶν γενομένων καὶ οὐδενὸσ ἀξίων, τὸν ἄνδρα τὸν γενναῖον καὶ μὴ φθόνου καὶ βασκανίασ ἥττονα τότε ἐχρῆν λέγειν ὅτι μαίνεσθε καὶ παρανοεῖτε τοιούτων ἐξεχόμενοι σφόδρα οὕτωσ καὶ θεραπεύοντεσ ἀνθρώπουσ οὕτω ταπεινοὺσ ἐπὶ πράγμασιν οὔτε ἀναγκαίοισ οὔτε μεγάλοισ, καὶ ταῦτα ἀδήλοισ ἔτι καὶ μηδὲν ἔχοντεσ βέβαιον. ἀλλ̓ οἶμαι χαλεπὸν μὲν ἦν αὐτοῖσ καὶ ὁπωσοῦν γενόμενόν τι τούτων. οὐ μὴν ὁμοίωσ ἐλύπει τὸ τὸν δεῖνα καὶ τὸν δεῖνα εἶναι τὸν ποιήσαντα καὶ παρασχόντα, μὴ τῶν ἡμετέρων τινὰ πολιτῶν. ἔτι δὲ ἐλπὶσ ὑπῄει καὶ ἔθελγεν αὐτοὺσ ὡσ οὐδέποτε ἂν γενομένων.