헬라어 텍스트

Herodotus, The Histories, book 3, chapter 117

(헤로도토스, The Histories, book 3, chapter 117)

ἔστι δὲ πεδίον ἐν τῇ Ἀσίῃ περικεκληιμένον ὄρεϊ πάντοθεν, διασφάγεσ δὲ τοῦ ὄρεοσ εἰσὶ πέντε. τοῦτο τὸ πεδίον ἦν μὲν κοτὲ Χορασμίων, ἐν οὔροισι ἐὸν Χορασμίων τε αὐτῶν καὶ Ὑρκανίων καὶ Πάρθων καὶ Σαραγγέων καὶ Θαμαναίων, ἐπείτε δὲ Πέρσαι ἔχουσι τὸ κράτοσ, ἐστὶ τοῦ βασιλέοσ. ἐκ δὴ ὦν τοῦ περικληίοντοσ ὄρεοσ τούτου ῥέει ποταμὸσ μέγασ, οὔνομα δέ οἱ ἐστὶ Ἄκησ.

οὗτοσ πρότερον μὲν ἄρδεσκε διαλελαμμένοσ πενταχοῦ τούτων τῶν εἰρημένων τὰσ χώρασ, διὰ διασφάγοσ ἀγόμενοσ ἑκάστησ ἑκάστοισι· ἐπείτε δὲ ὑπὸ τῷ Πέρσῃ εἰσί, πεπόνθασι τοιόνδε· τὰσ διασφάγασ τῶν ὀρέων ἐνδείμασ ὁ βασιλεὺσ πύλασ ἐπ’ ἑκάστῃ διασφάγι ἔστησε·

ἀποκεκληιμένου δὲ τοῦ ὕδατοσ τῆσ ἐξόδου τὸ πεδίον τὸ ἐντὸσ τῶν ὀρέων πέλαγοσ γίνεται, ἐνδιδόντοσ μὲν τοῦ ποταμοῦ, ἔχοντοσ δὲ οὐδαμῇ ἐξήλυσιν. οὗτοι ὦν οἵ περ ἔμπροσθε ἐώθεσαν χρᾶσθαι τῷ ὕδατι, οὐκ ἔχοντεσ αὐτῷ χρᾶσθαι συμφορῇ μεγάλῃ διαχρέωνται.

τὸν μὲν γὰρ χειμῶνα ὑεί σφι ὁ θεὸσ ὥσπερ καὶ τοῖσι ἄλλοισι ἀνθρώποισι, τοῦ δὲ θέρεοσ σπείροντεσ μελίνην καὶ σήσαμον χρηίσκονται τῷ ὕδατι. ἐπεὰν ὦν μηδέν σφι παραδιδῶται τοῦ ὕδατοσ, ἐλθόντεσ ἐσ τοὺσ Πέρσασ αὐτοί τε καὶ γυναῖκεσ, στάντεσ κατὰ τὰσ θύρασ τοῦ βασιλέοσ βοῶσι ὠρυόμενοι, ὁ δὲ βασιλεὺσ τοῖσι δεομένοισι αὐτῶν μάλιστα ἐντέλλεται ἀνοίγειν τὰσ πύλασ τὰσ ἐσ τοῦτο φερούσασ.

ἐπεὰν δὲ διάκοροσ ἡ γῆ σφεων γένηται πίνουσα τὸ ὕδωρ, αὗται μὲν αἱ πύλαι ἀποκληίονται, ἄλλασ δ’ ἐντέλλεται ἀνοίγειν ἄλλοισι τοῖσι δεομένοισι μάλιστα τῶν λοιπῶν.

ὡσ δ’ ἐγὼ οἶδα ἀκούσασ, χρήματα μεγάλα πρησσόμενοσ ἀνοίγει πάρεξ τοῦ φόρου.