Herodotus, The Histories, book 3, chapter 80

(헤로도토스, The Histories, book 3, chapter 80)

ἐπείτε δὲ κατέστη ὁ θόρυβοσ καὶ ἐκτὸσ πέντε ἡμερέων ἐγένετο, ἐβουλεύοντο οἱ ἐπαναστάντεσ τοῖσι Μάγοισι περὶ τῶν πάντων πρηγμάτων καὶ ἐλέχθησαν λόγοι ἄπιστοι μὲν ἐνίοισι Ἑλλήνων, ἐλέχθησαν δ’ ὦν. Ὀτάνησ μὲν ἐκέλευε ἐσ μέσον Πέρσῃσι καταθεῖναι τὰ πρήγματα, λέγων τάδε.

"ἐμοὶ δοκέει ἕνα μὲν ἡμέων μούναρχον μηκέτι γενέσθαι. οὔτε γὰρ ἡδὺ οὔτε ἀγαθόν. εἴδετε μὲν γὰρ τὴν Καμβύσεω ὕβριν ἐπ’ ὅσον ἐπεξῆλθε, μετεσχήκατε δὲ καὶ τῆσ τοῦ Μάγου ὕβριοσ. κῶσ δ’ ἂν εἰή χρῆμα κατηρτημένον μουναρχίη, τῇ ἔξεστι ἀνευθύνῳ ποιέειν τὰ βούλεται;

καὶ γὰρ ἂν τὸν ἄριστον ἀνδρῶν πάντων στάντα ἐσ ταύτην ἐκτὸσ τῶν ἐωθότων νοημάτων στήσειε. ἐγγίνεται μὲν γάρ οἱ ὕβρισ ὑπὸ τῶν παρεόντων ἀγαθῶν, φθόνοσ δὲ ἀρχῆθεν ἐμφύεται ἀνθρώπῳ. δύο δ’ ἔχων ταῦτα ἔχει πᾶσαν κακότητα·

τὰ μὲν γὰρ ὕβρι κεκορημένοσ ἔρδει πολλὰ καὶ ἀτάσθαλα, τὰ δὲ φθόνῳ. καίτοι ἄνδρα γε τύραννον ἄφθονον ἔδει εἶναι, ἔχοντά γε πάντα τὰ ἀγαθά. τὸ δὲ ὑπεναντίον τούτου ἐσ τοὺσ πολιήτασ πέφυκε· φθονέει γὰρ τοῖσι ἀρίστοισι περιεοῦσί τε καὶ ζώουσι, χαίρει δὲ τοῖσι κακίστοισι τῶν ἀστῶν, διαβολὰσ δὲ ἄριστοσ ἐνδέκεσθαι. ἀναρμοστότατον δὲ πάντων·

ἤν τε γὰρ αὐτὸν μετρίωσ θωμάζῃσ, ἄχθεται ὅτι οὐ κάρτα θεραπεύεται, ἤν τε θεραπεύῃ τισ κάρτα, ἄχθεται ἅτε θωπί. τὰ δὲ δὴ μέγιστα ἔρχομαι ἐρέων· νόμαιά τε κινέει πάτρια καὶ βιᾶται γυναῖκασ κτείνει τε ἀκρίτουσ. πλῆθοσ δὲ ἄρχον πρῶτα μὲν οὔνομα πάντων κάλλιστον ἔχει, ἰσονομίην, δεύτερα δὲ τούτων τῶν ὁ μούναρχοσ ποιέει οὐδέν·

πάλῳ μὲν ἀρχὰσ ἄρχει, ὑπεύθυνον δὲ ἀρχὴν ἔχει, βουλεύματα δὲ πάντα ἐσ τὸ κοινὸν ἀναφέρει. τίθεμαι ὦν γνώμην μετέντασ ἡμέασ μουναρχίην τὸ πλῆθοσ ἀέξειν· ἐν γὰρ τῷ πολλῷ ἔνι τὰ πάντα.

상위

The Histories

목록

일치하는 문장이 없습니다.

SEARCH

MENU NAVIGATION