헬라어 텍스트

Dionysius of Halicarnassus, Antiquitates Romanae, Books VII-IX, book 8, chapter 80

(디오니시오스, Antiquitates Romanae, Books VII-IX, book 8, chapter 80)

ἐπιβαλλομένων δέ τινων καὶ τοὺσ παῖδασ ἀποκτεῖναι τοῦ Κασσίου δεινὸν τὸ ἔθοσ ἔδοξεν εἶναι τῇ βουλῇ καὶ ἀσύμφορον· καὶ συνελθοῦσα ἐψηφίσατο ἀφεῖσθαι τὰ μειράκια τῆσ τιμωρίασ καὶ ἐπὶ πάσῃ ἀδείᾳ ζῆν, μήτε φυγῇ μήτ’ ἀτιμίᾳ μήτ’ ἄλλῃ συμφορᾷ ζημιωθέντα. ἐπιχώριον γέγονεν ἑώσ τῆσ καθ’ ἡμᾶσ διατηρούμενον ἡλικίασ, ἀφεῖσθαι τιμωρίασ ἁπάσησ τοὺσ παῖδασ, ὧν ἂν οἱ πατέρεσ ἀδικήσωσιν, ἐάν τε τυράννων ὄντεσ υἱοὶ τύχωσιν, ἐάν τε πατροκτόνων, ἐάν τε προδοτῶν, ὃ μέγιστόν ἐστι παρ’ ἐκείνοισ ἀδίκημα.

οἵ τε καταλῦσαι τὸ ἔθοσ τοῦτ’ ἐπιβαλόμενοι κατὰ τοὺσ ἡμετέρουσ χρόνουσ μετὰ τὴν συντέλειαν τοῦ Μαρσικοῦ τε καὶ ἐμφυλίου πολέμου, καὶ τοὺσ παῖδασ τῶν ἐπικηρυχθέντων ἐπὶ Σύλλα πατέρων ἀφελόμενοι τὸ μετιέναι τὰσ πατρίουσ ἀρχὰσ καὶ βουλῆσ μετέχειν καθ’ ὃν ἐδυνάστευον αὐτοὶ χρόνον, ἐπίφθονόν τ’ ἀνθρώποισ καὶ νεμεσητὸν θεοῖσ ἔργον ἔδοξαν ἀποδείξασθαι.

τοιγάρτοι δίκη μὲν ἐκείνοισ σὺν χρόνῳ τιμωρὸσ οὐ μεμπτὴ παρηκολούθησε, δἰ ἣν ἐκ μεγίστου τέωσ αὐχήματοσ εἰσ ταπεινότατον πτῶμα κατήχθησαν, καὶ οὐδὲ γένοσ τὸ ἐξ αὐτῶν ὅτι μὴ κατὰ γυναῖκασ ἔτι λείπεται. τὸ δ’ ἔθοσ εἰσ τὸν ἐξ ἀρχῆσ κόσμον ὁ τούτουσ καθελὼν ἀνὴρ ἀποκατέστησε.

παρ’ Ἕλλησι δ’ οὐχ οὕτωσ ἐνίοισ ὁ νόμοσ ἔχει, ἀλλὰ τοὺσ ἐκ τυράννων γενομένουσ οἱ μὲν συναποκτίννυσθαι τοῖσ πατράσι δικαιοῦσιν, οἱ δ’ ἀειφυγίᾳ κολάζουσιν, ὥσπερ οὐκ ἐνδεχομένησ τῆσ φύσεωσ χρηστοὺσ παῖδασ ἐκ πονηρῶν πατέρων ἢ κακοὺσ ἐξ ἀγαθῶν γενέσθαι. ἀλλ’ ὑπὲρ μὲν τούτων εἴτε ὁ παρ’ Ἕλλησιν ἀμείνων νόμοσ εἴτε τὸ Ῥωμαίων ἔθοσ κρεῖττον, ἀφίημι τῷ βουλομένῳ σκοπεῖν·

ἐπάνειμι δ’ ἐπὶ τὰ ἑξῆσ.