헬라어 문장 검색 - Διονψσ́Αντιθυι

(디오니시오스, Antiquitates Romanae, Books VII-IX, book 8, chapter 86)

Ῥωμαῖοι μὲν οὖν ἐν τούτοισ ἦσαν· Οὐολοῦσκοι δ’, ἐπειδὴ ἡμέρα τ’ ἐγένετο καὶ ἔγνωσαν τοὺσ πολεμίουσ ἐκλελοιπότασ τὸν χάρακα, προσελθόντεσ κατεστρατοπέδευσαν. σκυλεύσαντεσ δὲ τοὺσ τῶν πολεμίων νεκροὺσ καὶ τοὺσ ἡμιθνῆτασ, οἷσ σωθήσεσθαι ἐλπὶσ ἦν, ἀνελόμενοι ταφάσ τε ποιησάμενοι τῶν σφετέρων νεκρῶν, εἰσ τὴν ἐγγυτάτω πόλιν Ἄντιον ἀνέζευξαν· ἔνθα παιανίζοντεσ ἐπὶ τῇ νίκῃ καὶ θύοντεσ ἐν ἅπασιν ἱεροῖσ εἰσ εὐπαθείασ καὶ ἡδονὰσ ταῖσ ἑξῆσ ἡμέραισ ἐτράποντο. εἰ μὲν οὖν ἐπὶ τῆσ τότε νίκησ διέμειναν καὶ μηδὲν ἐπεξειργάσαντο, καλὸν ἂν αὐτοῖσ εἰλήφει τέλοσ ὁ ἀγών.

Ῥωμαῖοι γὰρ οὐκ ἂν ὑπέμειναν ἔτι προελθεῖν ἐκ τοῦ χάρακοσ ἐπὶ πολέμῳ, ἀγαπητὸν δ’ ἂν ἦν, εἰ ἀπῆλθον ἐκ τῆσ πολεμίασ, κρείττονα τοῦ προδήλου θανάτου τὴν ἄδοξον ἡγησάμενοι φυγήν. νῦν δὲ τοῦ πλείονοσ ὀρεγόμενοι καὶ τὴν ἐκ τῆσ προτέρασ νίκησ δόξαν ἀπέβαλον. καὶ τῶν ἐκ τοῦ χάρακοσ ἀποδεδρακότων, ὅτι κομιδῇ τ’ εἰσὶν οἱ σωθέντεσ Ῥωμαίων ὀλίγοι καὶ τούτων οἱ πλείουσ τραυματίαι, πολλὴν αὐτῶν ἐποιήσαντο καταφρόνησιν, καὶ αὐτίκα τὰ ὅπλα ἁρπάσαντεσ ἔθεον ἐπ’ αὐτούσ.

πολὺ δὲ καὶ τὸ ἄνοπλον αὐτοῖσ ἐκ τῆσ πόλεωσ εἵπετο κατὰ θέαν τοῦ ἀγῶνοσ καὶ ἅμα ἐφ’ ἁρπαγήν τε καὶ ὠφέλειαν. ἐπεὶ δὲ προσβαλόντεσ τῷ λόφῳ τόν τε χάρακα περιέστησαν καὶ τὰ περισταυρώματα διασπᾶν ἐπεχείρουν, πρῶτοι μὲν οἱ τῶν Ῥωμαίων ἱππεῖσ πεζοὶ μαχόμενοι διὰ τὴν τοῦ χωρίου φύσιν ἐξέδραμον ἐπ’ αὐτούσ, ἔπειτα τούτων κατόπιν οἱ καλούμενοι τριάριοι πυκνώσαντεσ τοὺσ λόχουσ·

οὗτοι δ’ εἰσὶν οἱ πρεσβύτατοι τῶν στρατευομένων, οἷσ τὰ στρατόπεδα ἐπιτρέπουσι φυλάττειν, ὅταν ἐξίωσιν εἰσ τὴν μάχην, καὶ ἐφ’ οὓσ τελευταίουσ, ὅταν ἀθρόα γένηται τῶν ἐν ἀκμῇ φθορά, σπανίζοντεσ ἑτέρασ ἐπικουρίασ καταφεύγουσι διὰ τὴν ἀνάγκην.

οἱ δ’ Οὐολοῦσκοι κατ’ ἀρχὰσ μὲν ἐδέξαντο τὴν ἔφοδον αὐτῶν καὶ μέχρι πολλοῦ διέμενον ἐκθύμωσ ἀγωνιζόμενοι, ἔπειτα διὰ τὴν τοῦ χωρίου φύσιν μειονεκτοῦντεσ ὑπεχώρουν, καὶ τέλοσ ὀλίγα μὲν τοὺσ πολεμίουσ καὶ οὐκ ἄξια λόγου ἐργασάμενοι, πλείω δ’ αὐτοὶ παθόντεσ κακὰ ὑπεχώρησαν εἰσ τὸ πεδίον. ἔνθα καταστρατοπεδευσάμενοι ταῖσ ἑξῆσ ἡμέραισ ἐξέταττον τὴν δύναμιν καὶ προὐκαλοῦντο τοὺσ Ῥωμαίουσ εἰσ μάχην, οἱ δ’ οὐκ ἀντεξῄεσαν.

ὡσ δὲ τοῦτ’ εἶδον καταφρονήσαντεσ αὐτῶν οἱ Οὐολοῦσκοι συνεκάλουν ἐκ τῶν πόλεων δυνάμεισ καὶ παρεσκευάζοντο ὡσ ἐξελοῦντεσ πολυχειρίᾳ τὸ φρούριον·

ῥᾳδίωσ τ’ ἂν ἐξειργάσαντο μέγα ἔργον ὑπάτου τε καὶ Ῥωμαϊκῆσ δυνάμεωσ ἢ βίᾳ κρατήσαντεσ ἢ καὶ ὁμολογίαισ· οὐδὲ γὰρ τῶν ἐπιτηδείων ἔτι εὐπόρει τὸ χωρίον·

ἔφθη δὲ πρότερον ἐπικουρία Ῥωμαίοισ ἐλθοῦσα, ὑφ’ ἧσ ἐκωλύθησαν οἱ Οὐολοῦσκοι τὸ κάλλιστον ἐπιθεῖναι τῷ πολέμῳ τέλοσ. ὁ γὰρ ἕτεροσ τῶν ὑπάτων Καίσων Φάβιοσ μαθών, ἐν αἷσ ἦν τύχαισ ἡ παραταξαμένη Οὐολούσκοισ δύναμισ, ἐβούλετο μὲν ὡσ εἶχε τάχουσ ἅπασαν ἄγων τὴν δύναμιν εὐθὺσ ἐπιέναι τοῖσ πολιορκοῦσι τὸ φρούριον.

ὡσ δ’ οὐκ ἐγίνετο αὐτῷ θυομένῳ τε καὶ οἰωνοῖσ χρωμένῳ τὰ ἱερὰ καλά, ἀλλ’ ἠναντιοῦτο πρὸσ τὰσ ἐξόδουσ αὐτοῦ τὸ δαιμόνιον, αὐτὸσ μὲν ὑπέμεινε, τὰσ δὲ κρατίστασ ἐπιλεξάμενοσ σπείρασ ἀπέστειλε τῷ συνάρχοντι. αἱ δὲ διά τ’ ὀρῶν ἀφανῶσ καὶ νύκτωρ τὰ πολλὰ ποιησάμεναι τὰσ ὁδοὺσ εἰσῆλθον εἰσ τὸν χάρακα τοὺσ πολεμίουσ λαθοῦσαι.

ὁ μὲν οὖν Αἰμίλιοσ θρασύτεροσ ἐγεγόνει τῇ παρουσίᾳ τῶν συμμάχων, οἱ δὲ πολέμιοι τῷ τε πλήθει τῷ σφετέρῳ εἰκῆ πίσυνοι καὶ διὰ τὸ μὴ ἐπεξιέναι τοὺσ Ῥωμαίουσ εἰσ μάχην ἐπαρθέντεσ ἀνέβαινον ἐπὶ τὸ ὄροσ πυκνώσαντεσ τοὺσ λόχουσ· καὶ οἱ Ῥωμαῖοι παρέντεσ αὐτοὺσ ἀναβῆναι καθ’ ἡσυχίαν καὶ πολλὰ πονεῖν περὶ τῷ σταυρώματι ἐάσαντεσ, ἐπειδὴ τὰ σημεῖα ἤρθη τῆσ μάχησ διασπάσαντεσ κατὰ πολλὰ μέρη τὸν χάρακα ἐμπίπτουσιν αὐτοῖσ·

καὶ οἱ μὲν εἰσ χεῖρασ καταστάντεσ τοῖσ ξίφεσιν ἐμάχοντο, οἱ δ’ ἀπὸ τῶν ἐρυμάτων λίθοισ τε καὶ σαυνίοισ καὶ λόγχαισ τοὺσ ἐπιόντασ ἔβαλλον, βέλοσ δ’ οὐδὲν ἄσκοπον ἦν πεπιλημένων γ’ ἐν βραχεῖ χωρίῳ πολλῶν. ἀπαράττονται δὴ τοῦ λόφου πολλοὺσ σφῶν ἀποβαλόντεσ οἱ Οὐολοῦσκοι καὶ εἰσ φυγὴν ὁρμήσαντεσ μόγισ εἰσ τὸν ἴδιον ἀποσώζονται χάρακα.

Ῥωμαῖοι δ’ ὡσ ἐν ἀσφαλείᾳ τέωσ ὄντεσ ἤδη κατέβαινον ἐπὶ τοὺσ ἀγροὺσ αὐτῶν· ἐξ ὧν ἐπισιτισμοὺσ καὶ τἆλλα, ὅσων σπάνισ ἦν ἐν τῷ χάρακι, ἐλάμβανον.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Dionysius of Halicarnassus, Antiquitates Romanae, Books VII-IX, book 8, chapter 86

(디오니시오스, Antiquitates Romanae, Books VII-IX, book 8, chapter 86)

상위

목록

SEARCH

MENU NAVIGATION