Dionysius of Halicarnassus, Antiquitates Romanae, Books VII-IX, book 8, chapter 79

(디오니시오스, Antiquitates Romanae, Books VII-IX, book 8, chapter 79)

ὁ μὲν οὖν πιθανώτεροσ τῶν παραδεδομένων ὑπὲρ τοῦ ἀνδρὸσ λόγων τοιόσδε ἐστίν· δεῖ δὲ καὶ τὸν ἧσσον πιθανόν, ἐπειδὴ κἀκεῖνοσ πεπίστευται ὑπὸ πολλῶν καὶ ἐν γραφαῖσ ἀξιοχρέοισ φέρεται, μὴ παρελθεῖν. λέγεται δή τισιν, ὡσ ἀδήλου πᾶσιν οὔσησ ἔτι τῆσ ὑπ’ αὐτοῦ συσκευαζομένησ τυραννίδοσ, πρῶτοσ ὑποπτεύσασ ὁ πατὴρ τοῦ Κασσίου καὶ διὰ τῆσ ἀκριβεστάτησ βασάνου τὸ πρᾶγμα ἐξετάσασ ἧκεν ἐπὶ τὴν βουλήν· ἔπειτα κελεύσασ ἐλθεῖν τὸν υἱὸν μηνυτήσ τε καὶ κατήγοροσ αὐτοῦ ἐγένετο· καταγνούσησ δὲ καὶ τῆσ βουλῆσ ἀγαγὼν αὐτὸν εἰσ τὴν οἰκίαν ἀπέκτεινε. τὸ μὲν οὖν πικρὸν καὶ ἀπαραίτητον τῆσ τῶν πατέρων ὀργῆσ εἰσ υἱοὺσ ἀδικοῦντασ καὶ μάλιστ’ ἐν τοῖσ τότε Ῥωμαίοισ οὐδὲ ταύτην ἀπωθεῖται τὴν πρόφασιν·

ἐπεὶ καὶ πρότερον Βροῦτοσ ὁ τοὺσ βασιλεῖσ ἐκβαλὼν ἀμφοτέρουσ τοὺσ υἱοὺσ ἐδικαίωσε κατὰ τὸν τῶν κακούργων νόμον ἀποθανεῖν, καὶ πελέκεσι τοὺσ αὐχένασ ἀπεκόπησαν, ὅτι συμπράττειν τοῖσ βασιλεῦσιν ἐδόκουν τὴν κάθοδον. καὶ μετὰ ταῦτα Μάλλιοσ τὸν Γαλατικὸν πόλεμον στρατηγῶν τὸν υἱὸν ἀριστεύοντα κατὰ πόλεμον τῆσ μὲν ἀνδρείασ ἕνεκα τοῖσ ἀριστείοισ στεφάνοισ ἐκόσμησεν, ἀπείθειαν δ’ ἐπικαλῶν, ὅτι οὐκ ἐν ᾧ ἐτάχθη φρουρίῳ ἔμεινεν, ἀλλὰ παρὰ τὴν ἐπιταγὴν τοῦ ἡγεμόνοσ ἐξῆλθεν ἀγωνιούμενοσ, ὡσ λιποτάκτην ἀπέκτεινε.

καὶ ἄλλοι πολλοὶ πατέρεσ, οἱ μὲν ἐπὶ μείζοσιν αἰτίαισ, οἱ δ’ ἐπ’ ἐλάττοσιν, οὔτε φειδὼ τῶν παίδων οὔτ’ ἔλεον ἔσχον.

κατὰ μὲν δὴ τοῦτ’ οὐκ ἀξιῶ, ὥσπερ ἔφην, προβεβλῆσθαι τὸν λόγον ὡσ ἀπιθανόν· ἐκεῖνα δέ με ἀνθέλκει τεκμηρίων ὄντα οὔτ’ ἐλάχιστα οὔτ’ ἀπίθανα καὶ πρὸσ τὴν ἑτέραν ἄγει συγκατάθεσιν, ὅτι μετὰ τὸν θάνατον τοῦ Κασσίου ἥ τ’ οἰκία κατεσκάφη, καὶ μέχρι τοῦδε ἀνεῖται ὁ τόποσ αὐτῆσ αἴθριοσ ἔξω τοῦ νεὼ τῆσ Γῆσ, ὃν ὑστέροισ ἡ πόλισ κατεσκεύασε χρόνοισ ἐν μέρει τινὶ αὐτῆσ κατὰ τὴν ἐπὶ Καρίνασ φέρουσαν ὁδόν, καὶ τὰ χρήματα αὐτοῦ τὸ κοινὸν ἀνέλαβεν· ἀφ’ ὧν εἰσι χρημάτων ἀπαρχαί.

εἰ δέ γ’ ὁ πατὴρ μηνυτήσ τε καὶ κατήγοροσ καὶ κολαστὴσ αὐτοῦ ἐγένετο, οὔτ’ ἂν ἡ οἰκία αὐτοῦ κατεσκάφη οὔτε ἡ οὐσία ἐδημεύθη. Ῥωμαίοισ γὰρ οὐθὲν ἴδιόν ἐστι κτῆμα ζώντων ἔτι τῶν πατέρων, ἀλλὰ καὶ τὰ χρήματα καὶ τὰ σώματα τῶν παίδων, ὅ τι βούλονται διατιθέναι, τοῖσ πατράσιν ἀποδέδοται.

ὥστ’ οὐκ ἂν δήπου τὴν τοῦ πατρὸσ οὐσίαν τοῦ μηνύσαντοσ τὴν τυραννίδα ἐπὶ τοῖσ τοῦ παιδὸσ ἀδικήμασιν ἀφαιρεῖσθαι καὶ δημεύειν ἡ πόλισ ἠξίου. διὰ μὲν δὴ ταῦτα τῷ προτέρῳ συγκατατίθεμαι τῶν λόγων μᾶλλον· ἔθηκα δ’ ἀμφοτέρουσ, ἵνα ἐξῇ τοῖσ ἀναγνωσομένοισ, ὁποτέρῳ βούλονται τῶν λόγων, προσέχειν.

일치하는 문장이 없습니다.

SEARCH

MENU NAVIGATION