헬라어 문장 검색 - Διονψσ́Αντιθυι

(디오니시오스, Antiquitates Romanae, Books VII-IX, book 8, chapter 74)

ταύτην εἰσηγησαμένου τὴν γνώμην Ἀππίου καὶ σφόδρα δόξαντοσ εὐδοκιμεῖν δεύτεροσ ἐρωτηθεὶσ Αὖλοσ Σεμπρώνιοσ Ἀτρατῖνοσ ἔλεξεν· Ἄππιον μὲν οὐ νῦν ἔχω πρῶτον ἐπαινεῖν, ὡσ φρονῆσαί τε ἱκανώτατον πρὸ πολλοῦ τὰ μέλλοντα καὶ γνώμασ τὰσ καλλίστασ τε καὶ ὠφελιμωτάτασ ἀποδεικνύμενον βέβαιόν τε καὶ ἀμετακίνητον ἐν τοῖσ κριθεῖσι καὶ οὔτε φόβῳ εἴκοντα οὔτε χάρισιν ὑποκατακλινόμενον. ἀεὶ γὰρ ἐπαινῶν αὐτὸν καὶ θαυμάζων διατελῶ τοῦ τε φρονίμου καὶ τῆσ γενναιότητοσ, ἣν παρὰ τὰ δεινὰ ἔχει. γνώμην τ’ οὐχ ἑτέραν, ἀλλὰ καὶ αὐτὸσ ταύτην ἀποδείκνυμαι, μικρὰ ἔτι προσθεὶσ αὐτῇ, ἅ μοι παραλιπεῖν Ἄππιοσ ἐδόκει. Ἕρνικασ μὲν γὰρ καὶ Λατίνουσ, οἷσ νεωστὶ δεδώκαμεν τὴν ἰσοπολιτείαν, οὐδ’ αὐτὸσ οἶμαι δεῖν κληρουχεῖν τὰ ἡμέτερα.

οὐ γάρ, ἐξ οὗ προσῆλθον εἰσ τὴν φιλίαν ἡμῖν, ταύτην τὴν γῆν κτησάμενοι ἔχομεν, ἀλλὰ παλαίτερον ἔτι τοῖσ ἑαυτῶν κινδύνοισ οὐθενὸσ ἄλλου προσωφελήσαντοσ ἀφελόμενοι τοὺσ ἐχθρούσ.

ἀποκρινώμεθά τ’ αὐτοῖσ, ὅτι τὰσ μὲν πρότερον ὑπαρχούσασ ἡμῖν κτήσεισ, ὅσασ ἕκαστοι εἴχομεν, ὅτε τὴν φιλίαν συνετιθέμεθα, ἰδίασ τε καὶ ἀναφαιρέτουσ ἑκάστοισ δεῖ μένειν, ὅσων δ’ ἄν, ἀφ’ οὗ τὰσ συνθήκασ ἐποιησάμεθα, κοινῇ στρατεύσαντεσ ἐκ πολέμου κύριοι γενώμεθα, τούτων ὑπάρξει τὸ ἐπιβάλλον ἑκάστοισ λάχοσ. ταῦτα γὰρ οὔτε τοῖσ συμμάχοισ ὡσ ἀδικουμένοισ ὀργῆσ παρέξει δικαίασ προφάσεισ, οὔτε τῷ δήμῳ δέοσ, μὴ δόξῃ τὰ κερδαλεώτερα πρὸ τῶν εὐπρεπεστέρων αἱρεῖσθαι.

τῇ τε αἱρέσει τῶν ἀνδρῶν, οὓσ Ἄππιοσ ἠξίου ὁριστὰσ γενέσθαι τῆσ δημοσίασ γῆσ, πάνυ εὐδοκῶ. πολλὴν γὰρ ἡμῖν τοῦτ’ οἴσει παρρησίαν πρὸσ τοὺσ δημοτικούσ, ἐπεὶ νῦν γ’ ἄχθονται κατ’ ἀμφότερα, καὶ ὅτι αὐτοὶ τῶν δημοσίων οὐθὲν ἀπολαύουσι κτημάτων, καὶ ὅτι ἐξ ἡμῶν τινεσ οὐ δικαίωσ αὐτὰ καρποῦνται. ἐὰν δὲ δημοσιωθέντα ἴδωσι καὶ τὰσ ἀπ’ αὐτῶν προσόδουσ εἰσ τὰ κοινὰ καὶ ἀναγκαῖα δαπανωμένασ, οὐδὲν ὑπολήψονται σφίσι διαφέρειν τῆσ γῆσ ἢ τῶν ἐξ αὐτῆσ καρπῶν μετέχειν.

ἐῶ γὰρ λέγειν, ὅτι τῶν ἀπόρων ἐνίουσ μᾶλλον εὐφραίνουσιν αἱ ἀλλότριαι βλάβαι τῶν ἰδίων ὠφελειῶν. οὐ μὴν ἀποχρῆν γ’ οἰόμαι τούτων ἑκάτερον ἐν τῷ ψηφίσματι γράφειν, ἀλλὰ καὶ δι’ ἄλλησ τινὸσ οἰόμαι δεῖν θεραπείασ μετρίασ τὸν δῆμον οἰκειώσασθαί τε καὶ ἀναλαβεῖν· ἣν μετὰ μικρὸν ἐρῶ, τὴν αἰτίαν πρῶτον ὑμῖν ἀποδειξάμενοσ, μᾶλλον δὲ τὴν ἀνάγκην, δι’ ἣν καὶ τοῦτο πρακτέον ἡμῖν.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Dionysius of Halicarnassus, Antiquitates Romanae, Books VII-IX, book 8, chapter 74

(디오니시오스, Antiquitates Romanae, Books VII-IX, book 8, chapter 74)

상위

목록

SEARCH

MENU NAVIGATION