Diodorus Siculus, Bibliotheca Historica, book 1, chapter 66

(디오도로스 시켈로스, Bibliotheca Historica, book 1, chapter 66)

ἀναρχίασ δὲ γενομένησ κατὰ τὴν Αἴγυπτον ἐπ’ ἔτη δύο, καὶ τῶν ὄχλων εἰσ ταραχὰσ καὶ φόνουσ ἐμφυλίουσ τρεπομένων, ἐποιήσαντο συνωμοσίαν οἱ μέγιστοι τῶν ἡγεμόνων δώδεκα· συνεδρεύσαντεσ δὲ ἐν Μέμφει καὶ συνθήκασ γραψάμενοι περὶ τῆσ πρὸσ ἀλλήλουσ ὁμονοίασ καὶ πίστεωσ ἀνέδειξαν ἑαυτοὺσ βασιλεῖσ. ἐπ’ ἔτη δὲ πεντεκαίδεκα κατὰ τοὺσ ὁρ́κουσ καὶ τὰσ ὁμολογίασ ἄρξαντεσ καὶ τὴν πρὸσ ἀλλήλουσ ὁμόνοιαν διατηρήσαντεσ, ἐπεβάλοντο κατασκευάσαι κοινὸν ἑαυτῶν τάφον, ἵνα καθάπερ ἐν τῷ ζῆν εὐνοοῦντεσ ἀλλήλοισ τῶν ἴσων ἐτύγχανον τιμῶν, οὕτω καὶ μετὰ τὴν τελευτὴν ἐν ἑνὶ τόπῳ τῶν σωμάτων κειμένων τὸ κατασκευασθὲν μνῆμα κοινῇ περιέχῃ τὴν τῶν ἐνταφέντων δόξαν.

εἰσ ταύτην δὲ τὴν ἐπιβολὴν φιλοκαλοῦντεσ ἔσπευσαν ὑπερβαλέσθαι τῷ μεγέθει τῶν ἔργων ἅπαντασ τοὺσ πρὸ αὑτῶν.

ἐκλεξάμενοι γὰρ τόπον παρὰ τὸν εἴσπλουν τὸν εἰσ τὴν Μοίριδοσ λίμνην ἐν τῇ Λιβύῃ κατεσκεύαζον τὸν τάφον ἐκ τῶν καλλίστων λίθων, καὶ τῷ μὲν σχήματι τετράγωνον ὑπεστήσαντο, τῷ δὲ μεγέθει σταδιαίαν ἑκάστην πλευράν, ταῖσ δὲ γλυφαῖσ καὶ ταῖσ ἄλλαισ χειρουργίαισ ὑπερβολὴν οὐκ ἀπέλιπον τοῖσ ἐπιγινομένοισ. εἰσελθόντι μὲν γὰρ τὸν περίβολον οἶκοσ ἦν περίστυλοσ, ἑκάστησ πλευρᾶσ ἐκ τετταράκοντα κιόνων ἀναπληρουμένησ, καὶ τούτου μονόλιθοσ ἦν ὀροφή, φάτναισ διαγεγλυμμένη καὶ γραφαῖσ διαφόροισ πεποικιλμένη.

εἶχε δὲ τῆσ πατρίδοσ τῆσ ἑκάστου τῶν βασιλέων ὑπομνήματα καὶ τῶν ἱερῶν καὶ θυσιῶν τῶν ἐν αὐτῇ ταῖσ καλλίσταισ γραφαῖσ φιλοτέχνωσ δεδημιουργημένα.

καθόλου δὲ τοιαύτην τῇ πολυτελείᾳ καὶ τηλικαύτην τῷ μεγέθει τὴν ὑπόστασιν τοῦ τάφου λέγεται ποιήσασθαι τοὺσ βασιλεῖσ, ὥστ’ εἰ μὴ πρὸ τοῦ συντελέσαι τὴν ἐπιβολὴν κατελύθησαν, μηδεμίαν ἂν ὑπερβολὴν ἑτέροισ πρὸσ κατασκευὴν ἔργων ἀπολιπεῖν.

ἀρξάντων δὲ τούτων τῆσ Αἰγύπτου πεντεκαίδεκα ἔτη συνέβη τὴν βασιλείαν εἰσ ἕνα περιστῆναι διὰ τοιαύτασ αἰτίασ.

Ψαμμήτιχοσ ὁ Σαΐτησ, εἷσ ὢν τῶν δώδεκα βασιλέων καὶ τῶν παρὰ θάλατταν μερῶν κυριεύων, παρείχετο φορτία πᾶσι τοῖσ ἐμπόροισ, μάλιστα δὲ τοῖσ τε Φοίνιξι καὶ τοῖσ Ἕλλησι·

διὰ δὲ τοιούτου τρόπου τά τε ἐκ τῆσ ἰδίασ χώρασ λυσιτελῶσ διατιθέμενοσ καὶ τῶν παρὰ τοῖσ ἄλλοισ ἔθνεσι φυομένων μεταλαμβάνων, οὐ μόνον εὐπορίαν εἶχε μεγάλην ἀλλὰ καὶ φιλίαν πρὸσ ἔθνη καὶ δυνάστασ.

διὰ δὲ ταῦτά φασι φθονήσαντασ αὐτῷ τοὺσ ἄλλουσ βασιλεῖσ πόλεμον ἐξενεγκεῖν.

ἔνιοι δὲ τῶν ἀρχαίων συγγραφέων μυθολογοῦσι χρησμὸν γενέσθαι τοῖσ ἡγεμόσιν, ὃσ ἂν αὐτῶν ἐκ χαλκῆσ φιάλησ πρῶτοσ ἐν Μέμφει σπείσῃ τῷ θεῷ, κρατήσειν αὐτὸν πάσησ τῆσ Αἰγύπτου· τὸν δὲ Ψαμμήτιχον, ἐξενέγκαντοσ ἐκ τοῦ ἱεροῦ τῶν ἱερέων τινὸσ φιάλασ δώδεκα χρυσᾶσ, περιελόμενον τὴν περικεφαλαίαν σπεῖσαι. ὑπιδομένουσ οὖν τοὺσ συνάρχοντασ τὸ πραχθὲν ἀποκτεῖναι μὲν αὐτὸν μὴ βουληθῆναι, φυγαδεῦσαι δὲ καὶ προστάξαι διατρίβειν ἐν τοῖσ ἕλεσι τοῖσ παρὰ θάλατταν.

εἴτε δὴ διὰ ταύτην τὴν αἰτίαν εἴτε διὰ τὸν φθόνον, καθότι προείρηται, γενομένησ τῆσ διαφορᾶσ, ὁ μὲν Ψαμμήτιχοσ ἔκ τε τῆσ Καρίασ καὶ τῆσ Ιὠνίασ μισθοφόρουσ μεταπεμψάμενοσ ἐνίκησε παρατάξει περὶ πόλιν τὴν ὀνομαζομένην Μώμεμφιν, τῶν δ’ ἀντιταξαμένων βασιλέων οἱ μὲν κατὰ τὴν μάχην ἀνῃρέθησαν, οἱ δ’ εἰσ Λιβύην ἐκδιωχθέντεσ οὐκέτι περὶ τῆσ ἀρχῆσ ἴσχυσαν ἀμφισβητῆσαι.

일치하는 문장이 없습니다.

SEARCH

MENU NAVIGATION