헬라어 문장 검색 - Διοδορ́Βιβλιοτ́4́24́

(디오도로스 시켈로스, Bibliotheca Historica, book 4, chapter 23)

μετὰ δὲ ταῦτα βουλόμενοσ ἐγκυκλωθῆναι πᾶσαν Σικελίαν, ἐποιεῖτο τὴν πορείαν ἀπὸ τῆσ Πελωριάδοσ ἐπὶ τὸν Ἔρυκα. διεξιόντοσ δ’ αὐτοῦ τὴν παράλιον τῆσ νήσου, μυθολογοῦσι τὰσ Νύμφασ ἀνεῖναι θερμὰ λουτρὰ πρὸσ τὴν ἀνάπαυσιν τῆσ κατὰ τὴν ὁδοιπορίαν αὐτῷ γενομένησ κακοπαθείασ. τούτων δ’ ὄντων διττῶν, τὰ μὲν Ἱμεραῖα, τὰ δ’ Ἐγεσταῖα προσαγορεύεται, τὴν ὀνομασίαν ἔχοντα ταύτην ἀπὸ τῶν τόπων. τοῦ δ’ Ἡρακλέουσ πλησιάσαντοσ τοῖσ κατὰ τὸν Ἔρυκα τόποισ, προεκαλέσατο αὐτὸν Ἔρυξ εἰσ πάλην, υἱὸσ ὢν Ἀφροδίτησ καὶ Βούτα τοῦ τότε βασιλεύοντοσ τῶν τόπων.

γενομένησ δὲ τῆσ φιλοτιμίασ μετὰ προστίμου, καὶ τοῦ μὲν Ἔρυκοσ διδόντοσ τὴν χώραν, τοῦ δ’ Ἡρακλέουσ τὰσ βοῦσ, τὸ μὲν πρῶτον ἀγανακτεῖν τὸν Ἔρυκα, διότι πολὺ λείπονται τῆσ ἀξίασ αἱ βόεσ, συγκρινομένησ τῆσ χώρασ πρὸσ αὐτάσ· πρὸσ ταῦτα δὲ τοῦ Ἡρακλέουσ ἀποφαινομένου διότι, ταύτασ ἂν ἀποβάλῃ, στερήσεται τῆσ ἀθανασίασ, εὐδοκήσασ ὁ Ἔρυξ τῇ συνθήκῃ καὶ παλαίσασ ἐλείφθη καὶ τὴν χώραν ἀπέβαλεν. ὁ δ’ Ἡρακλῆσ τὴν μὲν χώραν παρέθετο τοῖσ ἐγχωρίοισ, συγχωρήσασ αὐτοῖσ λαμβάνειν τοὺσ καρπούσ, μέχρι ἄν τισ τῶν ἐκγόνων αὐτοῦ παραγενόμενοσ ἀπαιτήσῃ·

ὅπερ καὶ συνέβη γενέσθαι. πολλαῖσ γὰρ ὕστερον γενεαῖσ Δωριεὺσ ὁ Λακεδαιμόνιοσ καταντήσασ εἰσ τὴν Σικελίαν καὶ τὴν χώραν ἀπολαβὼν ἔκτισε πόλιν Ἡράκλειαν. ταχὺ δ’ αὐτῆσ αὐξομένησ, οἱ Καρχηδόνιοι φθονήσαντεσ ἅμα καὶ φοβηθέντεσ μήποτε πλέον ἰσχύσασα τῆσ Καρχηδόνοσ ἀφέληται τῶν Φοινίκων τὴν ἡγεμονίαν, στρατεύσαντεσ ἐπ’ αὐτὴν μεγάλαισ δυνάμεσι καὶ κατὰ κράτοσ ἑλόντεσ κατέσκαψαν. ἀλλὰ περὶ μὲν τούτων τὰ κατὰ μέροσ ἐν τοῖσ οἰκείοισ χρόνοισ ἀναγράψομεν. τότε δ’ ὁ Ἡρακλῆσ ἐγκυκλούμενοσ τὴν Σικελίαν, καταντήσασ εἰσ τὴν νῦν οὖσαν τῶν Συρακοσίων πόλιν καὶ πυθόμενοσ τὰ μυθολογούμενα κατὰ τὴν τῆσ Κόρησ ἁρπαγήν, ἔθυσέ τε ταῖσ θεαῖσ μεγαλοπρεπῶσ καὶ εἰσ τὴν Κυάνην τὸν καλλιστεύοντα τῶν ταύρων καθαγίσασ κατέδειξε θύειν τοὺσ ἐγχωρίουσ κατ’ ἐνιαυτὸν τῇ Κόρῃ καὶ πρὸσ τῇ Κυάνῃ λαμπρῶσ ἄγειν πανήγυρίν τε καὶ θυσίαν.

αὐτὸσ δὲ μετὰ τῶν βοῶν διὰ τῆσ μεσογείου διεξιών, καὶ τῶν ἐγχωρίων Σικανῶν μεγάλαισ δυνάμεσιν ἀντιταξαμένων, ἐνίκησεν ἐπιφανεῖ παρατάξει καὶ πολλοὺσ ἀπέκτεινεν, ἐν οἷσ μυθολογοῦσί τινεσ καὶ στρατηγοὺσ ἐπιφανεῖσ γεγενῆσθαι τοὺσ μέχρι τοῦ νῦν ἡρωικῆσ τιμῆσ τυγχάνοντασ, Λεύκασπιν καὶ Πεδιακράτην καὶ Βουφόναν καὶ Γλυχάταν, ἔτι δὲ Βυταίαν καὶ Κρυτίδαν.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Diodorus Siculus, Bibliotheca Historica, book 4, chapter 23

(디오도로스 시켈로스, Bibliotheca Historica, book 4, chapter 23)

상위

목록

SEARCH

MENU NAVIGATION