Diodorus Siculus, Bibliotheca Historica, Books XVIII-XX, book 19, chapter 64

(디오도로스 시켈로스, Bibliotheca Historica, Books XVIII-XX, book 19, chapter 64)

ὁ δὲ Κάσανδροσ παρελθὼν εἰσ τὴν Μεσσηνίαν καὶ καταλαβὼν φρουρουμένην ὑπὸ Πολυπέρχοντοσ τὴν πόλιν τὸ μὲν πολιορκεῖν αὐτὴν ἐπὶ τοῦ παρόντοσ ἀπέγνω, παρελθὼν δ’ εἰσ Ἀρκαδίαν Δάμιν μὲν ἐπιμελητὴν τῆσ Μεγάλησ πόλεωσ ἀπέλιπεν, αὐτὸσ δὲ παρελθὼν εἰσ τὴν Ἀργείαν καὶ θεὶσ τὸν τῶν Νεμέων ἀγῶνα τὴν εἰσ Μακεδονίαν ἐπάνοδον ἐποιήσατο. τούτου δὲ χωρισθέντοσ Ἀλέξανδροσ ἐπιὼν τὰσ ἐν Πελοποννήσῳ πόλεισ μετ’ Ἀριστοδήμου τὰσ μὲν ὑπὸ Κασάνδρου καθεσταμένασ φρουρὰσ ἐκβαλεῖν ἐπειρᾶτο, ταῖσ δὲ πόλεσιν ἀποκαθιστᾶν τὴν ἐλευθερίαν.

ἃ δὴ πυθόμενοσ ὁ Κάσανδροσ ἔπεμψε πρὸσ αὐτὸν Πρεπέλαον, ἀξιῶν Ἀντιγόνου μὲν ἀποστῆναι, συμμαχεῖν δ’ αὐτῷ γνησίωσ.

τοῦτο δ’ αὐτοῦ πράξαντοσ στρατηγίαν δώσειν ἔφησε πάσησ Πελοποννήσου καὶ δυνάμεωσ ἀποδείξειν κύριον, ἔτι δὲ κατ’ ἀξίαν τιμήσειν. ὁ δ’ Ἀλέξανδροσ ὁρῶν αὑτῷ συγχωρούμενον οὗ χάριν ἐξ ἀρχῆσ ἐπολέμει πρὸσ Κάσανδρον, συμμαχίαν ποιησάμενοσ ἀπεδείχθη στρατηγὸσ Πελοποννήσου.

ἅμα δὲ τούτοισ πραττομένοισ Πολύκλειτοσ ὁ πεμφθεὶσ ὑπὸ τῶν περὶ Σέλευκον ἐκ Κύπρου πλεύσασ κατῆρεν εἰσ Κεγχρεάσ, ἀκούσασ δὲ τὴν Ἀλεξάνδρου μετάθεσιν καὶ θεωρῶν μηδὲν ὑπάρχον πολέμιον σύστημα τὸν πλοῦν ἐπὶ Παμφυλίασ ἐποιήσατο. ἐντεῦθεν δὲ παρακομισθεὶσ εἰσ Ἀφροδισιάδα τῆσ Κιλικίασ, ὡσ ἤκουσεν ὅτι Θεόδοτοσ μὲν ὁ Ἀντιγόνου ναύαρχοσ ἐκ Πατάρων τῆσ Δυκίασ παραπλεῖ ταῖσ ἀπὸ Ῥόδου ναυσίν, ἐχούσαισ ἀπὸ Καρίασ πληρώματα, καὶ διότι περίλαοσ μετὰ στρατιωτῶν παράγει πεζῇ, παρεχόμενοσ τῷ στόλῳ τῆσ ἀγωγῆσ τὴν ἀσφάλειαν, ἀμφοτέρουσ κατεστρατήγησε.

τοὺσ μὲν γὰρ στρατιώτασ ἀποβιβάσασ ἔκρυψεν ἐν εὐθέτῳ τόπῳ, καθ’ ὃν ἀναγκαῖον ἦν τοὺσ πολεμίουσ τὴν πάροδον ποιήσασθαι, αὐτὸσ δὲ πάσαισ ταῖσ ναυσὶν ἐπιπλεύσασ καὶ πρὸ αὑτοῦ λαβὼν ἀκρωτήριον ἐπετήρει τὴν τῶν πολεμίων παρουσίαν.

ἐμπεσόντων δὲ πρῶτον τῶν πεζῶν εἰσ τὴν ἐνέδραν συνέβη τόν τε περίλαον ἁλῶναι καὶ τῶν ἄλλων τοὺσ μὲν πεσεῖν μαχομένουσ, οὓσ δὲ ζωγρηθῆναι. ἐπιχειρούντων δὲ τῶν ἀπὸ Ῥόδου νεῶν παραβοηθεῖν τοῖσ ἰδίοισ ἐπιπλεύσασ ὁ Πολύκλειτοσ ἄφνω συντεταγμένῳ τῷ στόλῳ ῥᾳδίωσ ἐτρέψατο τεταραγμένουσ τοὺσ πολεμίουσ.

διόπερ συνέβη τάσ τε ναῦσ ἁλῶναι πάσασ καὶ τῶν ἀνδρῶν οὐκ ὀλίγουσ, ἐν οἷσ καὶ αὐτὸν τὸν Θεόδοτον τραυματίαν γενόμενον μετ’ ὀλίγασ ἡμέρασ τελευτῆσαι. Πολύκλειτοσ μὲν οὖν χωρὶσ κινδύνων τηλικαῦτα πλεονεκτήσασ ἀπέπλευσεν εἰσ Κύπρον, ἐντεῦθεν δ’ εἰσ Πηλούσιον·

ὁ δὲ Πτολεμαῖοσ τοῦτον μὲν ἐπαινέσασ δωρεαῖσ μεγάλαισ ἐτίμησε καὶ πολὺ μᾶλλον προῆγεν ὡσ ἀρχηγὸν γεγονότα μεγάλου προτερήματοσ, τὸν δὲ περίλαον καὶ τῶν ἄλλων αἰχμαλώτων τινὰσ ἀπέλυσεν, ἐλθούσησ περὶ τούτων πρεσβείασ παρ’ Ἀντιγόνου. αὐτὸσ δὲ παρῆλθεν ἐπὶ τὸ καλούμενον Ἔκρηγμα κἀκεῖ συνελθὼν εἰσ λόγουσ Ἀντιγόνῳ πάλιν ἀπῆλθεν, οὐ συγχωροῦντοσ Ἀντιγόνου τὰ ἀξιούμενα.

일치하는 문장이 없습니다.

SEARCH

MENU NAVIGATION