Diodorus Siculus, Library, book xi, chapter 4

(디오도로스 시켈로스, Library, book xi, chapter 4)

τοῖσ δὲ συνέδροισ τῶν Ἑλλήνων, ἐπειδὴ πλησίον εἶναι προσαπηγγέλθησαν αἱ τῶν Περσῶν δυνάμεισ, ἔδοξε ταχέωσ ἀποστέλλειν τὴν μὲν ναυτικὴν δύναμιν ἐπ’ Ἀρτεμίσιον τῆσ Εὐβοίασ, εὔθετον ὁρῶσι τὸν τόπον τοῦτον πρὸσ τὴν ἀπάντησιν τῶν πολεμίων, εἰσ δὲ τὰσ Θερμοπύλασ τοὺσ ἱκανοὺσ ὁπλίτασ, προκαταληψομένουσ τὰσ ἐν τοῖσ στενοῖσ παρόδουσ καὶ κωλύσοντασ προάγειν ἐπὶ τὴν Ἑλλάδα τοὺσ βαρβάρουσ· ἔσπευδον γὰρ τοὺσ τὰ τῶν Ἑλλήνων προελομένουσ ἐντὸσ περιλαβεῖν καὶ σώζειν εἰσ τὸ δυνατὸν τοὺσ συμμάχουσ. ἡγεῖτο δὲ τοῦ μὲν στόλου παντὸσ Εὐρυβιάδησ ὁ Λακεδαιμόνιοσ, τῶν δὲ εἰσ Θερμοπύλασ ἐκπεμφθέντων Λεωνίδησ ὁ τῶν Σπαρτιατῶν βασιλεύσ, μέγα φρονῶν ἐπ’ ἀνδρείᾳ καὶ στρατηγίᾳ.

οὗτοσ δὲ λαβὼν τὴν ἐξουσίαν ἐπήγγειλε χιλίουσ μόνον ἐπὶ τὴν στρατείαν ἀκολουθεῖν αὐτῷ. τῶν δὲ ἐφόρων λεγόντων ὡσ ὀλίγουσ παντελῶσ ἄγει πρὸσ μεγάλην δύναμιν, καὶ προσταττόντων πλείονασ παραλαμβάνειν, εἶπε πρὸσ αὐτοὺσ ἐν ἀπορρήτοισ ὅτι πρὸσ μὲν τὸ κωλῦσαι τοὺσ βαρβάρουσ διελθεῖν τὰσ παρόδουσ ὀλίγοι, πρὸσ μέντοι γε τὴν πρᾶξιν ἐφ’ ἣν πορεύονται νῦν πολλοί.

αἰνιγματώδουσ δὲ καὶ ἀσαφοῦσ τῆσ ἀποκρίσεωσ γενομένησ, ἐπηρώτησαν αὐτὸν εἰ πρὸσ εὐτελῆ τινα πρᾶξιν αὐτοὺσ ἄγειν διανοεῖται.

ἀπεκρίθη δὲ ὅτι τῷ λόγῳ μὲν ἐπὶ τὴν φυλακὴν ἄγει τῶν παρόδων, τῷ δ’ ἔργῳ περὶ τῆσ κοινῆσ ἐλευθερίασ ἀποθανουμένουσ· ὥστε ἐὰν μὲν οἱ χίλιοι πορευθῶσιν, ἐπιφανεστέραν ἔσεσθαι τὴν Σπάρτην τούτων τελευτηκότων, ἐὰν δὲ πανδημεὶ στρατεύσωσι Λακεδαιμόνιοι, παντελῶσ ἀπολεῖσθαι τὴν Λακεδαίμονα· οὐδένα γὰρ αὐτῶν τολμήσειν φεύγειν, ἵνα τύχῃ σωτηρίασ. τῶν μὲν οὖν Λακεδαιμονίων ἦσαν χίλιοι, καὶ σὺν αὐτοῖσ Σπαρτιᾶται τριακόσιοι, τῶν δ’ ἄλλων Ἑλλήνων τῶν ἅμ’ αὐτοῖσ συνεκπεμφθέντων ἐπὶ τὰσ Θερμοπύλασ τρισχίλιοι.

ὁ μὲν οὖν Λεωνίδησ μετὰ τετρακισχιλίων προῆγεν ἐπὶ τὰσ Θερμοπύλασ, Λοκροὶ δὲ οἱ πλησίον τῶν παρόδων κατοικοῦντεσ ἐδεδώκεσαν μὲν γῆν καὶ ὕδωρ τοῖσ Πέρσαισ, κατεπηγγελμένοι δ’ ἦσαν προκαταλήψεσθαι τὰσ παρόδουσ·

ὡσ δ’ ἐπύθοντο τὸν Λεωνίδην ἥκειν εἰσ Θερμοπύλασ, μετενόησαν καὶ μετέθεντο πρὸσ τοὺσ Ἕλληνασ. ἧκον δὲ εἰσ τὰσ Θερμοπύλασ καὶ Λοκροὶ χίλιοι καὶ Μηλιέων τοσοῦτοι καὶ Φωκέων οὐ πολὺ λειπόμενοι τῶν χιλίων, ὁμοίωσ δὲ καὶ Θηβαίων ἀπὸ τῆσ ἑτέρασ μερίδοσ ὡσ τετρακόσιοι·

διεφέροντο γὰρ οἱ τὰσ Θήβασ κατοικοῦντεσ πρὸσ ἀλλήλουσ περὶ τῆσ πρὸσ τοὺσ Πέρσασ συμμαχίασ. οἱ μὲν οὖν μετὰ Λεωνίδου συνταχθέντεσ Ἕλληνεσ τοσοῦτοι τὸν ἀριθμὸν ὄντεσ διέτριβον περὶ τὰσ Θερμοπύλασ, ἀναμένοντεσ τὴν τῶν Περσῶν παρουσίαν. Ξέρξησ δὲ μετὰ τὸν ἐξετασμὸν τῶν δυνάμεων προῆγε μετὰ παντὸσ τοῦ στρατεύματοσ, καὶ μέχρι μὲν Ἀκάνθου πόλεωσ τῇ πεζῇ στρατιᾷ πορευομένῳ συμπαρέπλει πᾶσ ὁ στόλοσ, ἐκεῖθεν δὲ κατὰ τὸν διορυχθέντα τόπον διεκομίσθησαν εἰσ τὴν ἑτέραν θάλατταν συντόμωσ καὶ ἀσφαλῶσ.

ὡσ δ’ ἧκεν ἐπὶ τὸν Μηλιακὸν κόλπον, ἐπύθετο τοὺσ πολεμίουσ προκατειληφέναι τὰσ παρόδουσ.

διόπερ ἐνταῦθα προσαναλαβὼν τὴν δύναμιν μετεπέμψατο τοὺσ ἀπὸ τῆσ Εὐρώπησ συμμάχουσ, οὐ πολὺ λείποντασ τῶν εἴκοσι μυριάδων, ὥστ’ ἔχειν αὐτὸν τοὺσ σύμπαντασ οὐκ ἐλάττουσ τῶν ἑκατὸν μυριάδων χωρὶσ τῆσ ναυτικῆσ δυνάμεωσ. ὁ δὲ σύμπασ ὄχλοσ τῶν τε ἐν ταῖσ μακραῖσ ναυσὶν ὄντων καὶ τῶν τὴν ἀγορὰν καὶ τὴν ἄλλην παρασκευὴν κομιζόντων οὐκ ἐλάττων ἦν τῶν προειρημένων, ὥστε μηδὲν θαυμαστὸν εἶναι τὸ λεγόμενον ὑπὲρ τοῦ πλήθουσ τῶν ὑπὸ Ξέρξου συναχθέντων·

φασὶ γὰρ τοὺσ ἀενάουσ ποταμοὺσ διὰ τὴν τοῦ πλήθουσ συνέχειαν ἐπιλιπεῖν, τὰ δὲ πελάγη τοῖσ τῶν νεῶν ἱστίοισ κατακαλυφθῆναι. μέγισται μὲν οὖν δυνάμεισ τῶν εἰσ ἱστορικὴν μνήμην παραδεδομένων αἱ μετὰ Ξέρξου γενόμεναι παραδέδονται. τῶν δὲ Περσῶν κατεστρατοπεδευκότων παρὰ τὸν Σπερχειὸν ποταμόν, ὁ μὲν Ξέρξησ ἀπέστειλεν ἀγγέλουσ εἰσ τὰσ Θερμοπύλασ, τοὺσ ἅμα μὲν κατασκεψομένουσ τίνα διάνοιαν ἔχουσι περὶ τοῦ πρὸσ αὐτὸν πολέμου·

προσέταξε δ’ αὐτοῖσ παραγγέλλειν,ὅτι βασιλεὺσ Ξέρξησ κελεύει τὰ μὲν ὅπλα πάντασ ἀποθέσθαι, αὐτοὺσ δὲ ἀκινδύνουσ εἰσ τὰσ πατρίδασ ἀπιέναι καὶ συμμάχουσ εἶναι Περσῶν· καὶ ταῦτα πράξασιν αὐτοῖσ ἐπηγγείλατο δώσειν χώραν τοῖσ Ἕλλησι πλείω καὶ βελτίω τῆσ νῦν ὑπ’ αὐτῶν κατεχομένησ. οἱ δὲ περὶ τὸν Λεωνίδην ἀκούσαντεσ τῶν ἀγγέλων ἀπεκρίναντο, ὅτι καὶ συμμαχοῦντεσ τῷ βασιλεῖ χρησιμώτεροι μετὰ τῶν ὅπλων ἔσονται καὶ πολεμεῖν ἀναγκαζόμενοι μετὰ τούτων γενναιότερον ὑπὲρ τῆσ ἐλευθερίασ ἀγωνιοῦνται·

περὶ δὲ τῆσ χώρασ ἣν ὑπισχνεῖται δώσειν, ὅτι πάτριόν ἐστι τοῖσ Ἕλλησι μὴ διὰ κακίαν, ἀλλὰ δι’ ἀρετὴν κτᾶσθαι χώραν.

일치하는 문장이 없습니다.

SEARCH

MENU NAVIGATION