Diodorus Siculus, Library, book xi, chapter 2

(디오도로스 시켈로스, Library, book xi, chapter 2)

ὁ δὲ Ξέρξησ ἁμιλλώμενοσ πρὸσ τὴν τῶν Καρχηδονίων σπουδήν, ὑπερεβάλετο πάσαισ ταῖσ παρασκευαῖσ τοσοῦτον ὅσον καὶ τῷ πλήθει τῶν ἐθνῶν ὑπερεῖχε Καρχηδονίων. ἤρξατο δὲ ναυπηγεῖσθαι κατὰ πᾶσαν τὴν παραθαλάττιον τὴν ὑπ’ αὐτὸν ταττομένην, Αἴγυπτόν τε καὶ Φοινίκην καὶ Κύπρον, πρὸσ δὲ τούτοισ Κιλικίαν καὶ Παμφυλίαν καὶ Πισιδικήν, ἔτι δὲ Λυκίαν καὶ Καρίαν καὶ Μυσίαν καὶ Τρῳάδα καὶ τὰσ ἐφ’ Ἑλλησπόντῳ πόλεισ καὶ τὴν Βιθυνίαν καὶ τὸν Πόντον. ὁμοίωσ δὲ τοῖσ Καρχηδονίοισ τριετῆ χρόνον παρασκευασάμενοσ κατεσκεύασε ναῦσ μακρὰσ πλείουσ τῶν χιλίων καὶ διακοσίων. συνεβάλετο δὲ αὐτῷ καὶ ὁ πατὴρ Δαρεῖοσ, πρὸ τῆσ τελευτῆσ παρασκευὰσ πεποιημένοσ μεγάλων δυνάμεων·

καὶ γὰρ ἐκεῖνοσ ἡττημένοσ ὑπὸ Ἀθηναίων ἐν Μαραθῶνι Δάτιδοσ ἡγουμένου, χαλεπῶσ διέκειτο πρὸσ τοὺσ νενικηκότασ Ἀθηναίουσ. ἀλλὰ Δαρεῖοσ μὲν μέλλων ἤδη διαβαίνειν ἐπὶ τοὺσ Ἕλληνασ ἐμεσολαβήθη τελευτήσασ, ὁ δὲ Ξέρξησ διά τε τὴν τοῦ πατρὸσ ἐπιβολὴν καὶ τὴν τοῦ Μαρδονίου συμβουλίαν, καθότι προείρηται, διέγνω πολεμεῖν τοῖσ Ἕλλησιν. ὡσ δ’ αὐτῷ πάντα τὰ πρὸσ τὴν στρατείαν ἡτοίμαστο, τοῖσ μὲν ναυάρχοισ παρήγγειλεν ἀθροίζειν τὰσ ναῦσ εἰσ Κύμην καὶ Φώκαιαν, αὐτὸσ δ’ ἐξ ἁπασῶν τῶν σατραπειῶν συναγαγὼν τὰσ πεζὰσ καὶ ἱππικὰσ δυνάμεισ, προῆγεν ἐκ τῶν Σούσων.

ὡσ δ’ ἧκεν εἰσ Σάρδεισ, κήρυκασ ἐξέπεμψεν εἰσ τὴν Ἑλλάδα, προστάξασ εἰσ πάσασ τὰσ πόλεισ ἰέναι καὶ τοὺσ Ἕλληνασ αἰτεῖν ὕδωρ καὶ γῆν. τὴν δὲ στρατιὰν διελόμενοσ ἐξαπέστειλε τοὺσ ἱκανοὺσ ζεῦξαι μὲν τὸν Ἑλλήσποντον, διασκάψαι δὲ τὸν Ἄθω κατὰ τὸν αὐχένα τῆσ Χερρονήσου, ἅμα μὲν ταῖσ δυνάμεσιν ἀσφαλῆ καὶ σύντομον τὴν διέξοδον ποιούμενοσ, ἅμα δὲ τῷ μεγέθει τῶν ἔργων ἐλπίζων προκαταπλήξεσθαι τοὺσ Ἕλληνασ.

οἱ μὲν οὖν πεμφθέντεσ ἐπὶ τὴν κατασκευὴν τῶν ἔργων ταχέωσ ἤνυον διὰ τὴν πολυχειρίαν τῶν ἐργαζομένων. οἱ δ’ Ἕλληνεσ πυθόμενοι τὸ μέγεθοσ τῆσ τῶν Περσῶν δυνάμεωσ, ἐξέπεμψαν εἰσ Θετταλίαν μυρίουσ ὁπλίτασ τοὺσ καταληψομένουσ τὰσ περὶ τὰ Τέμπη παρόδουσ·

ἡγεῖτο δὲ τῶν μὲν Λακεδαιμονίων Συνετόσ, τῶν δὲ Ἀθηναίων Θεμιστοκλῆσ. οὗτοι δὲ πρὸσ τὰσ πόλεισ πρεσβευτὰσ ἀποστείλαντεσ ἠξίουν ἀποστέλλειν στρατιώτασ τοὺσ κοινῇ φυλάξοντασ τὰσ παρόδουσ· ἔσπευδον γὰρ ἁπάσασ τὰσ Ἑλληνίδασ πόλεισ διαλαβεῖν ταῖσ προφυλακαῖσ καὶ κοινοποιήσασθαι τὸν πρὸσ τοὺσ Πέρσασ πόλεμον. ἐπεὶ δὲ τῶν Θετταλῶν καὶ τῶν ἄλλων Ἑλλήνων τῶν πλησιοχώρων ταῖσ παρόδοισ ἔδωκαν οἱ πλείουσ ὕδωρ τε καὶ γῆν τοῖσ ἀφιγμένοισ ἀγγέλοισ ἀπὸ Ξέρξου, ἀπογνόντεσ τὴν περὶ τὰ Τέμπη φυλακὴν ἐπανῆλθον εἰσ τὴν οἰκείαν.

χρήσιμον δὲ διορίσαι τῶν Ἑλλήνων τοὺσ τὰ τῶν βαρβάρων ἑλομένουσ, ἵνα τυγχάνοντεσ ὀνείδουσ ἀποτρέπωσι ταῖσ βλασφημίαισ τοὺσ προδότασ ἂν γενομένουσ τῆσ κοινῆσ ἐλευθερίασ.

Αἰνιᾶνεσ μὲν οὖν καὶ Δόλοπεσ καὶ Μηλιεῖσ καὶ Περραιβοὶ καὶ Μάγνητεσ μετὰ τῶν βαρβάρων ἐτάχθησαν, ἔτι παρούσησ τῆσ ἐν τοῖσ Τέμπεσι φυλακῆσ, Ἀχαιοὶ δὲ Φθιῶται καὶ Λοκροὶ καὶ Θετταλοὶ καὶ Βοιωτοὶ οἱ πλείουσ τούτων ἀπελθόντων ἀπέκλιναν πρὸσ τοὺσ βαρβάρουσ.

οἱ δ’ ἐν Ἰσθμῷ συνεδρεύοντεσ τῶν Ἑλλήνων ἐψηφίσαντο τοὺσ μὲν ἐθελοντὶ τῶν Ἑλλήνων ἑλομένουσ τὰ Περσῶν δεκατεῦσαι τοῖσ θεοῖσ, ἐπὰν τῷ πολέμῳ κρατήσωσι, πρὸσ δὲ τοὺσ τὴν ἡσυχίαν ἔχοντασ ἐκπέμψαι πρέσβεισ τοὺσ παρακαλέσοντασ συναγωνίζεσθαι περὶ τῆσ κοινῆσ ἐλευθερίασ.

ὧν οἱ μὲν εἵλοντο γνησίωσ τὴν συμμαχίαν, οἱ δὲ παρῆγον ἐφ’ ἱκανὸν χρόνον, ἀντεχόμενοι τῆσ ἰδίασ μόνον ἀσφαλείασ καὶ καραδοκοῦντεσ τὸ τοῦ πολέμου τέλοσ·

Ἀργεῖοι δὲ πρέσβεισ ἀποστείλαντεσ εἰσ τὸ κοινὸν συνέδριον ἐπηγγέλλοντο συμμαχήσειν, ἐὰν αὐτοῖσ μέροσ τι τῆσ ἡγεμονίασ συγχωρήσωσιν. οἷσ οἱ σύνεδροι διεσάφησαν, εἰ μὲν δεινότερον ἡγοῦνται τὸ στρατηγὸν ἔχειν Ἕλληνα ἢ δεσπότην βάρβαρον, ὀρθῶσ αὐτοὺσ ἔχειν ἡσυχίαν, εἰ δὲ φιλοτιμοῦνται λαβεῖν τὴν τῶν Ἑλλήνων ἡγεμονίαν, ἄξια ταύτησ δεῖν ἔφασαν αὐτοὺσ πεπραχότασ ἐπιζητεῖν τὴν τηλικαύτην δόξαν.

μετὰ δὲ ταῦτα τῶν παρὰ Ξέρξου πρέσβεων ἐπιόντων τὴν Ἑλλάδα καὶ γῆν καὶ ὕδωρ αἰτούντων, αἱ πόλεισ ἅπασαι διὰ τῶν ἀποκρίσεων ἀπεδείκνυντο τὴν περὶ τῆσ κοινῆσ ἐλευθερίασ σπουδήν. Ξέρξησ δὲ ὡσ ἐπύθετο τὸν Ἑλλήσποντον ἐζεῦχθαι καὶ τὸν Ἄθω διεσκάφθαι, προῆγεν ἐκ τῶν Σάρδεων ἐφ’ Ἑλλησπόντου τὴν πορείαν ποιούμενοσ·

ὡσ δὲ ἧκεν εἰσ Ἄβυδον, διὰ τοῦ ζεύγματοσ τὴν δύναμιν διήγαγεν εἰσ τὴν Εὐρώπην. πορευόμενοσ δὲ διὰ τῆσ Θρᾴκησ πολλοὺσ προσελαμβάνετο στρατιώτασ καὶ τῶν Θρᾳκῶν καὶ τῶν ὁμόρων τούτοισ Ἑλλήνων. ὡσ δ’ ἧκεν εἰσ τὸν ὀνομαζόμενον Δορίσκον, ἐνταῦθα μετεπέμψατο τὸ ναυτικόν, ὥστε ἀμφοτέρασ τὰσ δυνάμεισ εἰσ ἕνα τόπον ἀθροισθῆναι.

ἐποιήσατο δὲ καὶ τὸν ἐξετασμὸν τῆσ στρατιᾶσ ἁπάσησ· ἠριθμήθησαν δὲ τῆσ πεζῆσ δυνάμεωσ μυριάδεσ πλείουσ τῶν ὀγδοήκοντα, νῆεσ δὲ αἱ σύμπασαι μακραὶ πλείουσ τῶν χιλίων καὶ διακοσίων, καὶ τούτων Ἑλληνίδεσ τριακόσιαι καὶ εἴκοσι, τὰ μὲν πληρώματα τῶν ἀνδρῶν παρεχομένων τῶν Ἑλλήνων, τὰ δὲ σκάφη τοῦ βασιλέωσ χορηγοῦντοσ· αἱ δὲ λοιπαὶ πᾶσαι βαρβαρικαὶ κατηριθμοῦντο· καὶ τούτων Αἰγύπτιοι μὲν διακοσίασ παρέσχοντο, Φοίνικεσ δὲ τριακοσίασ, Κίλικεσ δὲ ὀγδοήκοντα, Πάμφυλοι δὲ τετταράκοντα, καὶ Λύκιοι τὰσ ἴσασ, πρὸσ δὲ τούτοισ Κᾶρεσ μὲν ὀγδοήκοντα, Κύπριοι δὲ ἑκατὸν καὶ πεντήκοντα. τῶν δὲ Ἑλλήνων ἔπεμψαν Δωριεῖσ μὲν οἱ πρὸσ τῇ Καρίᾳ κατοικοῦντεσ μετὰ Ῥοδίων καὶ Κῴων τετταράκοντα, Ιὤνεσ δὲ μετὰ Χίων καὶ Σαμίων ἑκατόν, Αἰολεῖσ δὲ μετὰ Λεσβίων καὶ Τενεδίων τετταράκοντα, Ἑλλησπόντιοι δὲ ὀγδοήκοντα σὺν τοῖσ περὶ τὸν Πόντον κατοικοῦσι, νησιῶται δὲ πεντήκοντα·

τὰσ γὰρ νήσουσ τὰσ ἐντὸσ Κυανέων καὶ Τριοπίου καὶ Σουνίου προσηγμένοσ ἦν ὁ βασιλεύσ. τριήρεισ μὲν οὖν τοσαῦται τὸ πλῆθοσ ὑπῆρχον, ἱππαγωγοὶ δὲ ὀκτακόσιαι πεντήκοντα, αἱ δὲ τριηκόντοροι τρισχίλιαι.

ὁ μὲν οὖν Ξέρξησ περὶ τὸν ἐξετασμὸν τῶν δυνάμεων διέτριβε περὶ τὸν Δορίσκον.

일치하는 문장이 없습니다.

SEARCH

MENU NAVIGATION