Pausanias, Description of Greece, Κορινθιακά, chapter 9

(파우사니아스, Description of Greece, Κορινθιακά, chapter 9)

Κλεομένησ ὁ Λεωνίδου τοῦ Κλεωνύμου παραλαβὼν τὴν βασιλείαν ἐν Σπάρτῃ Παυσανίαν ἐμιμεῖτο τυραννίδοσ τε ἐπιθυμῶν καὶ νόμοισ τοῖσ καθεστηκόσιν οὐκ ἀρεσκόμενοσ. ἅτε δὲ ὄντι αὐτῷ Παυσανίου θερμοτέρῳ καὶ οὐ φιλοψύχῳ ταχὺ τὰ πάντα ὑπὸ φρονήματοσ καὶ τόλμησ κατείργαστο, καὶ βασιλέα τε οἰκίασ τῆσ ἑτέρασ Εὐρυδαμίδαν παῖδα ἔτι ἀνελὼν φαρμάκῳ διὰ τῶν ἐφορευόντων ἐσ Ἐπικλείδαν τὸν ἀδελφὸν μετέστησε τὴν ἀρχὴν καὶ τὸ κράτοσ τῆσ γερουσίασ καταλύσασ πατρονόμουσ τῷ λόγῳ κατέστησεν ἀντ’ αὐτῶν. ἐπιθυμῶν δὲ πραγμάτων μειζόνων καὶ ἀρχῆσ τῶν Ἑλλήνων, ἐπέθετο Ἀχαιοῖσ πρώτοισ, συμμάχουσ ἐλπίζων ἕξειν ἢν κρατήσῃ καὶ μάλιστα ἐμποδὼν οὐκ ἐθέλων εἶναί οἱ τοῖσ δρωμένοισ. συμβαλὼν δὲ περὶ Δύμην τὴν ὑπὲρ Πατρῶν, Ἀράτου καὶ τότε ἡγουμένου τῶν Ἀχαιῶν, νικᾷ τῇ μάχῃ.

τοῦτο Ἄρατον ἠνάγκασεν ὑπέρ τε Ἀχαιῶν καὶ αὐτῆσ Σικυῶνοσ δείσαντα Ἀντίγονον ἐπάγεσθαι. Κλεομένουσ δὲ παραβάντοσ ἣν πρὸσ Ἀντίγονον συνέθετο εἰρήνην καὶ παράσπονδα ἐκ τοῦ φανεροῦ καὶ ἄλλα δράσαντοσ καὶ Μεγαλοπολίτασ ποιήσαντοσ ἀναστάτουσ, οὕτω διαβάντοσ ἐσ Πελοπόννησον Ἀντιγόνου συμβάλλουσιν Ἀχαιοὶ Κλεομένει περὶ Σελλασίαν. νικησάντων δὲ τῶν Ἀχαιῶν Σελλασία τε ἠνδραποδίσθη καὶ αὐτὴ Λακεδαίμων ἑάλω. ἀπέδωκεν Ἀντίγονοσ καὶ Ἀχαιοὶ πολιτείαν τὴν πάτριον·

τῶν δὲ Λεωνίδου παίδων Ἐπικλείδασ μὲν ἀπέθανεν ἐν τῇ μάχῃ, Κλεομένην δὲ φεύγοντα ἐσ Αἴγυπτον καὶ τιμῆσ παρὰ Πτολεμαίῳ πρῶτα ἔχοντα συνέβη δεθῆναι, καταγνωσθέντα Αἰγυπτίων ἄνδρασ ἐπὶ τὸν βασιλέα συνιστάναι.

καὶ ἀπέδρα μὲν ἐκ τοῦ δεσμωτηρίου καὶ τοῖσ Ἀλεξανδρεῦσιν ἀρχὴν θορύβου παρέσχε· τέλοσ δέ, ὡσ ἡλίσκετο, ἀπέσφαξεν αὑτόν. Λακεδαιμόνιοι δὲ ἄσμενοι Κλεομένουσ ἀπαλλαγέντεσ βασιλεύεσθαι μὲν οὐκέτι ἠξίωσαν, τὰ δὲ λοιπὰ καὶ ἐσ τόδε διαμένει σφίσιν ἐκείνησ τῆσ πολιτείασ. Ἀράτῳ δὲ Ἀντίγονοσ ἅτε ἀνδρὶ εὐεργέτῃ καὶ συγκατειργασμένῳ λαμπρὰ οὕτω διέμεινεν εὔνουσ. Φίλιπποσ δὲ ὡσ παρέλαβε τὴν ἀρχήν ‐ οὐ γὰρ αὐτὸν Ἄρατοσ θυμῷ πολλὰ ἐσ τοὺσ ἀρχομένουσ χρώμενον ἐπῄνει, τὰ δὲ καὶ ὡρμημένον ἐπεῖχε μὴ ποιεῖν ‐ , τούτων ἕνεκεν ἀπέκτεινεν Ἄρατον, οὐδὲν προϊδομένῳ δούσ οἱ φάρμακον.

καὶ τὸν μὲν ἐξ Αἰγίου ‐ ταύτῃ γὰρ τὸ χρεὼν ἐπέλαβεν αὐτὸν ‐ ἐσ Σικυῶνα κομίσαντεσ θάπτουσι, καὶ τὸ ἡρῷον Ἀράτειον ἔτι ὀνομάζεται· Φιλίππῳ δὲ καὶ ἐσ Εὐρυκλείδην καὶ Μίκωνα Ἀθηναίουσ ὅμοια εἰργάσθη· καὶ γὰρ τούσδε ὄντασ ῥήτορασ καὶ οὐκ ἀπιθάνουσ τῷ δήμῳ φαρμάκοισ ἔκτεινεν. ἔμελλε δὲ ἄρα καὶ αὐτῷ Φιλίππῳ τὸ ἀνδροφόνον φάρμακον ἔσεσθαι συμφορά·

τὸν γάρ οἱ παῖδα Δημήτριον ὁ νεώτεροσ τῶν Φιλίππου παίδων Περσεὺσ φαρμάκῳ διέφθειρε καὶ δι’ αὐτὸ καὶ τῷ πατρὶ ἀθυμήσαντι παρέσχεν αἰτίαν ἀποθανεῖν. παρεδήλωσα δὲ τάδε ἀπιδὼν ἐσ <τὸ> Ἡσιόδου σὺν θεῷ πεποιημένον, τὸν ἐπ’ ἄλλῳ βουλεύοντα ἄδικα ἐσ αὑτὸν πρῶτον τρέπειν. μετὰ δὲ <τὸ> Ἀράτου ἡρῷον ἔστι μὲν Ποσειδῶνι Ἰσθμίῳ βωμόσ, ἔστι δὲ Ζεὺσ Μειλίχιοσ καὶ Ἄρτεμισ ὀνομαζομένη Πατρῴα, σὺν τέχνῃ πεποιημένα οὐδεμιᾷ·

πυραμίδι δὲ ὁ Μειλίχιοσ, ἡ δὲ κίονί ἐστιν εἰκασμένη. ἐνταῦθα καὶ βουλευτήριόν σφισι πεποίηται καὶ στοὰ καλουμένη Κλεισθένειοσ ἀπὸ τοῦ οἰκοδομήσαντοσ· ᾠκοδόμησε δὲ ἀπὸ λαφύρων ὁ Κλεισθένησ αὐτὴν τὸν πρὸσ Κίρρᾳ πόλεμον συμπολεμήσασ Ἀμφικτύοσι. τῆσ δὲ ἀγορᾶσ ἐστιν ἐν τῷ ὑπαίθρῳ Ζεὺσ χαλκοῦσ, τέχνη Λυσίππου, παρὰ δὲ αὐτὸν Ἄρτεμισ ἐπίχρυσοσ. πλησίον δὲ Ἀπόλλωνόσ ἐστιν ἱερὸν Λυκίου, κατερρυηκόσ τε ἤδη καὶ ἥκιστα θέασ ἄξιον.

φοιτώντων γὰρ λύκων σφίσιν ἐπὶ τὰσ ποίμνασ ὡσ μηδένα εἶναι καρπὸν ἔτι ἀπ’ αὐτῶν, ὁ θεὸσ τόπον τινὰ εἰπὼν ἔνθα ἔκειτο αὐο͂ν ξύλον, τούτου φλοιὸν ἔχρησε τοῦ ξύλου καὶ κρέασ ὁμοῦ προθεῖναι τοῖσ θηρίοισ· καὶ τοὺσ μὲν αὐτίκα ὡσ ἐγεύσαντο διέφθειρεν ὁ φλοιόσ, τὸ ξύλον δὲ ἐκεῖνο ἔκειτο μὲν ἐν τῷ ἱερῷ τοῦ Λυκίου, ὅ τι δὲ ἦν δένδρον οὐδὲ οἱ τῶν Σικυωνίων ἐξηγηταὶ συνίεσαν. τούτου δέ εἰσιν εἰκόνεσ ἐφεξῆσ χαλκαῖ·

τὰσ Προίτου θυγατέρασ λέγουσιν εἶναι σφᾶσ, τὸ δὲ ἐπίγραμμα ἐσ γυναῖκασ ἄλλασ εἶχεν. ἐνταῦθα Ἡρακλῆσ χαλκοῦσ ἐστι· Λύσιπποσ ἐποίησεν αὐτὸν Σικυώνιοσ, καὶ πλησίον Ἑρμῆσ ἕστηκεν Ἀγοραῖοσ.

일치하는 문장이 없습니다.

SEARCH

MENU NAVIGATION