헬라어 텍스트

Polybius, Histories, book 1, chapter 75

(폴리비오스, Histories, book 1, chapter 75)

καὶ τοῦτον ἐξέπεμπον εἰσ τὸν ἐνεστῶτα πόλεμον στρατηγόν, δόντεσ ἑβδομήκοντα μὲν ἐλέφαντασ καὶ τοὺσ ἐπισυνηγμένουσ τῶν μισθοφόρων καὶ τοὺσ ηὐτομοληκότασ ἀπὸ τῶν πολεμίων, ἅμα δὲ τούτοισ πολιτικοὺσ ἱππεῖσ καὶ πεζούσ, ὥστε τοὺσ σύμπαντασ εἰσ μυρίουσ ὑπάρχειν. ὃσ κατὰ τὴν πρώτην εὐθέωσ ἔξοδον καταπληξάμενοσ τῷ παραδόξῳ τῆσ ἐπιβολῆσ ἥττησε μὲν τὰσ ψυχὰσ τῶν ὑπεναντίων, ἔλυσε δὲ τὴν τῆσ Ἰτύκησ πολιορκίαν, ἐφάνη δ’ ἄξιοσ τῶν προγεγονότων ἔργων καὶ τῆσ παρὰ τῷ πλήθει προσδοκίασ.

τὸ δὲ πραχθὲν ἦν ὑπ’ αὐτοῦ περὶ τὴν χρείαν ταύτην τοιοῦτον.

πρὸσ δὲ τούτοισ τοῦ προσαγορευομένου Μακάρα ποταμοῦ διείργοντοσ κατά τινασ τόπουσ παραπλησίωσ τὴν ἐπὶ τὴν χώραν τοῖσ ἐκ τῆσ πόλεωσ ἔξοδον καὶ διὰ τὸ πλῆθοσ τοῦ ῥεύματοσ ἀβάτου κατὰ τὸ πλεῖστον ὑπάρχοντοσ, μιᾶσ δ’ οὔσησ ἐπ’ αὐτῷ γεφύρασ, καὶ ταύτην τηρεῖν τὴν δίοδον ἀσφαλῶσ, πόλιν ἐπ’ αὐτῆσ ᾠκοδομηκότασ.

ἐξ ὧν συνέβαινε τοὺσ Καρχηδονίουσ μὴ οἱο͂ν στρατοπέδῳ τῆσ χώρασ ἐπιβαίνειν, ἀλλὰ μηδὲ τοὺσ κατ’ ἰδίαν θέλοντασ διαπεσεῖν ῥᾳδίωσ ἂν δύνασθαι λαθεῖν τοὺσ ὑπεναντίουσ.

εἰσ ἃ βλέπων Ἀμίλκασ καὶ παντὸσ πράγματοσ καὶ καιροῦ πεῖραν λαμβάνων διὰ τὸ δυσχρηστεῖν περὶ τὴν ἔξοδον διενοήθη τι τοιοῦτον.

τοῦ προειρημένου ποταμοῦ κατὰ τὴν εἰσ θάλατταν ἐκβολὴν συνθεωρήσασ κατά τινασ ἀνέμων στάσεισ ἀποθινούμενον τὸ στόμα καὶ τεναγώδη γινομένην τὴν παρ’ αὐτὸ τὸ στόμα πάροδον, ποιήσασ εὐτρεπῆ τῷ στρατοπέδῳ τὰ πρὸσ τὴν ἔξοδον καὶ κρύπτων ἐν αὑτῷ τὴν ἐπιβολὴν ἐτήρει τὸ προειρημένον σύμπτωμα.

παραπεσόντοσ δὲ τοῦ καιροῦ, νυκτὸσ ἐξορμήσασ ἔλαθε πάντασ ἅμα τῷ φωτὶ τὸν προειρημένον τόπον διαβιβάσασ τὴν δύναμιν.