Diodorus Siculus, Library, book xiii, chapter 98

(디오도로스 시켈로스, Library, book xiii, chapter 98)

Καλλικρατίδασ δ’ ὁ ναύαρχοσ συναγαγὼν τὰ πλήθη καὶ παραθαρσύνασ τοῖσ οἰκείοισ λόγοισ, τὸ τελευταῖον εἶπεν· εἰσ τὸν ὑπὲρ τῆσ πατρίδοσ κίνδυνον οὕτωσ εἰμὶ πρόθυμοσ αὐτόσ, ὥστε τοῦ μάντεωσ λέγοντοσ διὰ τῶν ἱερείων ὑμῖν μὲν προσημαίνεσθαι νίκην, ἐμοὶ δὲ θάνατον, ὅμωσ ἕτοιμόσ εἰμι τελευτᾶν. εἰδὼσ οὖν μετὰ τὸν τῶν ἡγεμόνων θάνατον ἐν θορύβῳ τὰ στρατόπεδα γινόμενα, νῦν ἀναδεικνύω ναύαρχον, ἂν ἐγώ τι πάθω, τὸν διαδεξόμενον Κλέαρχον, ἄνδρα πεῖραν δεδωκότα τῶν κατὰ τὸν πόλεμον ἔργων. ὁ μὲν οὖν Καλλικρατίδασ ταῦτ’ εἰπὼν οὐκ ὀλίγουσ ἐποίησε ζηλῶσαι τὴν ἀρετὴν αὐτοῦ καὶ προθυμοτέρουσ γενέσθαι πρὸσ τὴν μάχην.

καὶ Λακεδαιμόνιοι μὲν παρακαλοῦντεσ ἀλλήλουσ ἀνέβαινον εἰσ τὰσ ναῦσ· οἱ δ’ Ἀθηναῖοι, παρακληθέντεσ ὑπὸ τῶν στρατηγῶν εἰσ τὸν ἀγῶνα, κατὰ σπουδὴν ἐπλήρουν τὰσ τριήρεισ καὶ πάντεσ εἰσ τάξιν καθίσταντο. τοῦ μὲν οὖν δεξιοῦ κέρατοσ Θράσυλλοσ ἡγεῖτο καὶ Περικλῆσ ὁ Περικλέουσ τοῦ προσαγορευθέντοσ κατὰ τὴν δύναμιν Ὀλυμπίου·

συμπαρέλαβε δὲ καὶ Θηραμένην εἰσ τὸ δεξιὸν κέρασ, ἐφ’ ἡγεμονίασ τάξασ· ὃσ ἰδιώτησ ὢν μὲν συνεστράτευε τότε, πρότερον δὲ πολλάκισ ἦν ἀφηγημένοσ δυνάμεων· τοὺσ δ’ ἄλλουσ στρατηγοὺσ παρ’ ὅλην τὴν φάλαγγα διέταξε, καὶ τὰσ καλουμένασ Ἀργινούσασ νήσουσ συμπεριέλαβε τῇ τάξει, σπεύδων ὅτι πλεῖστον παρεκτεῖναι τὰσ ναῦσ. ὁ δὲ Καλλικρατίδασ ἀνήχθη τὸ μὲν δεξιὸν μέροσ αὐτὸσ ἔχων, τὸ δ’ εὐώνυμον παρέδωκε Βοιωτοῖσ, ὧν Θρασώνδασ ὁ Θηβαῖοσ τὴν ἡγεμονίαν ἔσχεν.

οὐ δυνάμενοσ δὲ τὴν τάξιν ἐξισῶσαι τοῖσ πολεμίοισ διὰ τὸ τὰσ νήσουσ πολὺν ἐπέχειν τόπον, διείλατο τὴν δύναμιν, καὶ δύο ποιήσασ στόλουσ πρὸσ ἑκάτερον μέροσ δίχα διηγωνίζετο. διὸ καὶ παρείχετο μεγάλην κατάπληξιν πολλαχῇ τοῖσ θεωμένοισ, ὡσ ἂν τεττάρων μὲν στόλων ναυμαχούντων, τῶν δὲ νεῶν συνηθροισμένων εἰσ ἕνα τόπον οὐ πολλαῖσ ἐλάττω τῶν τριακοσίων·

μεγίστη γὰρ αὕτη μνημονεύεται ναυμαχία γεγενημένη Ἕλλησι πρὸσ Ἕλληνασ. ἅμα δ’ οἵ τε ναύαρχοι τοῖσ σαλπιγκταῖσ παρεκελεύοντο σημαίνειν καὶ τὸ παρ’ ἑκατέροισ πλῆθοσ ἐναλλὰξ ἐπαλαλάζον ἐξαίσιον ἐποίει βοήν·

πάντεσ δὲ μετὰ σπουδῆσ ἐλαύνοντεσ τὸ ῥόθιον ἐφιλοτιμοῦντο πρὸσ ἀλλήλουσ, ἑκάστου σπεύδοντοσ πρώτου κατάρξασθαι τῆσ μάχησ. ἔμπειροί τε γὰρ ἦσαν τῶν κινδύνων οἱ πλεῖστοι διὰ τὸ μῆκοσ τοῦ πολέμου καὶ σπουδὴν ἀνυπέρβλητον εἰσεφέροντο διὰ τὸ τοὺσ κρατίστουσ εἰσ τὸν ὑπὲρ τῶν ὅλων ἀγῶνα συνηθροῖσθαι·

πάντεσ γὰρ ὑπελάμβανον τοὺσ ταύτῃ τῇ μάχῃ νικήσαντασ πέρασ ἐπιθήσειν τῷ πολέμῳ. οὐ μὴν ἀλλ’ ὁ Καλλικρατίδασ ἀκηκοὼσ τοῦ μάντεωσ τὴν περὶ αὐτὸν ἐσομένην τελευτήν, ἔσπευδεν ἐπιφανέστατον ἑαυτῷ περιποιήσασθαι θάνατον.

διόπερ πρῶτοσ ἐπὶ τὴν Λυσίου τοῦ στρατηγοῦ ναῦν ἐπιπλεύσασ, καὶ σὺν ταῖσ ἅμα πλεούσαισ τριήρεσιν ἐξ ἐφόδου τρώσασ, κατέδυσε· τῶν δ’ ἄλλων τὰσ μὲν τοῖσ ἐμβόλοισ τύπτων ἄπλουσ ἐποίει, τῶν δὲ τοὺσ ταρσοὺσ παρασύρων ἀχρήστουσ ἀπετέλει πρὸσ τὴν μάχην. τὸ δὲ τελευταῖον δοὺσ ἐμβολὴν τῇ τοῦ Περικλέουσ τριήρει βιαιότερον, τῆσ μὲν τριήρουσ ἐπὶ πολὺν ἀνέρρηξε τόπον, τοῦ δὲ στόματοσ ἐναρμοσθέντοσ εἰσ τὴν λακίδα, καὶ μὴ δυναμένων αὐτῶν ἀνακρούσασθαι, Περικλῆσ μὲν ἐπέβαλε τῇ τοῦ Καλλικρατίδα νηὶ σιδηρᾶν χεῖρα, προσαφθείσησ δ’ αὐτῆσ οἱ μὲν Ἀθηναῖοι περιστάντεσ τὴν ναῦν εἰσήλλοντο, καὶ περιχυθέντεσ τοὺσ ἐν αὐτῇ πάντασ ἀπέσφαξαν.

τότε δή φασι τὸν Καλλικρατίδαν λαμπρῶσ ἀγωνισάμενον καὶ πολὺν ἀντισχόντα χρόνον, τὸ τελευταῖον ὑπὸ τοῦ πλήθουσ πανταχόθεν τιτρωσκόμενον καταπονηθῆναι.

ὡσ δὲ τὸ περὶ τὸν ναύαρχον ἐλάττωμα συμφανὲσ ἐγένετο, συνέβη τοὺσ Πελοποννησίουσ δείσαντασ ἐγκλῖναι. τοῦ δὲ δεξιοῦ μέρουσ τῶν Πελοποννησίων φυγόντοσ, οἱ τὸ λαιὸν ἔχοντεσ Βοιωτοὶ χρόνον μέν τινα διεκαρτέρουν εὐρώστωσ ἀγωνιζόμενοι·

εὐλαβοῦντο γὰρ αὐτοί τε καὶ οἱ συγκινδυνεύοντεσ Εὐβοεῖσ καὶ πάντεσ οἱ τῶν Ἀθηναίων ἀφεστηκότεσ, μήποτε Ἀθηναῖοι τὴν ἀρχὴν ἀνακτησάμενοι τιμωρίαν παρ’ αὐτῶν λάβωσιν ὑπὲρ τῆσ ἀποστάσεωσ· ἐπειδὴ δὲ τὰσ πλείστασ ναῦσ ἑώρων τετρωμένασ καὶ τὸ πλῆθοσ τῶν νικώντων ἐπ’ αὐτοὺσ ἐπιστραφέν, ἠναγκάσθησαν φυγεῖν. τῶν μὲν οὖν Πελοποννησίων οἱ μὲν εἰσ Χίον, οἱ δ’ εἰσ Κύμην διεσώθησαν.

일치하는 문장이 없습니다.

SEARCH

MENU NAVIGATION