Diodorus Siculus, Library, book xiii, chapter 93

(디오도로스 시켈로스, Library, book xiii, chapter 93)

ἐκ δὲ τῆσ Γέλασ ἐνεχθέντων γραμμάτων, ὅπωσ ἀποσταλῶσι στρατιῶται πλείουσ, ἔλαβεν ὁ Διονύσιοσ οἰκείαν ἔφοδον τῆσ ἰδίασ προαιρέσεωσ. ἀποσταλεὶσ γὰρ μετὰ στρατιωτῶν πεζῶν μὲν δισχιλίων, ἱππέων δὲ τετρακοσίων, ἦλθε συντόμωσ εἰσ τὴν πόλιν τῶν Γελῴων, ἣν τότε παρεφύλαττε Δέξιπποσ ὁ Λακεδαιμόνιοσ, κατασταθεὶσ ὑπὸ Συρακοσίων. ὁ δ’ οὖν Διονύσιοσ καταλαβὼν τοὺσ εὐπορωτάτουσ στασιάζοντασ πρὸσ τὸν δῆμον, καὶ κατηγορήσασ αὐτῶν ἐν ἐκκλησίᾳ καὶ κατακρίνασ, αὐτοὺσ μὲν ἀπέκτεινε, τὰσ δ’ οὐσίασ αὐτῶν ἐδήμευσεν, ἐκ δὲ τῶν χρημάτων τούτων τοῖσ μὲν φρουροῦσι τὴν πόλιν, ὧν ἡγεῖτο Δέξιπποσ, ἀπέδωκε τοὺσ ὀφειλομένουσ μισθούσ·

τοῖσ δὲ μετ’ αὐτοῦ παραγεγονόσιν ἐκ Συρακουσῶν ἐπηγγείλατο διπλοῦσ ποιήσειν τοὺσ μισθούσ, ὧν ἡ πόλισ ἔταξε. διὰ δὲ τούτου τοῦ τρόπου τούσ τ’ ἐν Γέλᾳ στρατιώτασ καὶ τοὺσ μετ’ αὐτοῦ ταῖσ εὐνοίαισ ἰδίουσ κατεσκεύασεν.

ἐπῃνεῖτο δὲ καὶ ὑπὸ τοῦ δήμου τῶν Γελῴων ὡσ αἴτιοσ αὐτοῖσ γεγενημένοσ τῆσ ἐλευθερίασ· τοῖσ γὰρ δυνατωτάτοισ φθονοῦντεσ τὴν ἐκείνων ὑπεροχὴν δεσποτείαν αὐτῶν ἀπεκάλουν. διόπερ ἐξέπεμψαν πρέσβεισ τοὺσ ἐπαινοῦντασ ἐν Συρακούσαισ καὶ τὰ ψηφίσματα φέροντασ, ἐν οἷσ αὐτὸν μεγάλαισ δωρεαῖσ ἐτίμησαν.

ὁ δὲ Διονύσιοσ ἐπεβάλετο μὲν τὸν Δέξιππον πείθειν κοινωνῆσαι τῆσ ἐπιβολῆσ· ἐπεὶ δ’ οὐ συγκατετίθετο, μετὰ τῶν ἰδίων στρατιωτῶν ἕτοιμοσ ἦν ἀνακάμπτειν εἰσ Συρακούσασ. οἱ δὲ Γελῷοι πυνθανόμενοι τοὺσ Καρχηδονίουσ μέλλειν μετὰ πάσησ τῆσ δυνάμεωσ ἐπὶ πρώτην στρατεύειν τὴν Γέλαν, ἐδέοντο τοῦ Διονυσίου μεῖναι καὶ μὴ περιιδεῖν αὐτοὺσ τὰ αὐτὰ τοῖσ Ἀκραγαντίνοισ παθόντασ.

οἷσ ἐπαγγειλάμενοσ ὁ Διονύσιοσ συντόμωσ ἥξειν μετὰ πλείονοσ δυνάμεωσ, ἐξώρμησεν ἐκ τῆσ Γέλασ μετὰ τῶν ἰδίων στρατιωτῶν. θέασ δ’ οὔσησ ἐν ταῖσ Συρακούσαισ, κατὰ τὴν ὡρ́αν τῆσ ἀπαλλαγῆσ τῶν ἐκ τοῦ θεάτρου παρῆν εἰσ τὴν πόλιν.

συνδραμόντων δὲ τῶν ὄχλων ἐπ’ αὐτὸν καὶ πυνθανομένων περὶ τῶν Καρχηδονίων, ἀγνοεῖν αὐτοὺσ ἔφη, διότι τῶν ἔξωθεν πολεμιωτέρουσ ἔχουσι τοὺσ ἔνδον τῶν κοινῶν προεστῶτασ, οἷσ οἱ μὲν πολῖται πιστεύοντεσ ἑορτάζουσιν, αὐτοὶ δὲ διαφοροῦντεσ τὰ δημόσια τοὺσ στρατιώτασ ἀμίσθουσ πεποιήκασι, καὶ τῶν πολεμίων ἀνυπερβλήτουσ ποιουμένων τὰσ εἰσ τὸν πόλεμον παρασκευὰσ καὶ μελλόντων ἐπὶ Συρακούσασ τὴν δύναμιν ἄγειν, τούτων οὐδ’ ἡντινοῦν ποιοῦνται φροντίδα. δι’ ἣν δ’ αἰτίαν ταῦτα πράττουσιν, εἰδέναι μὲν καὶ πρότερον, νῦν δὲ σαφέστερον ἀνεγνωκέναι·

Ἰμίλκωνα γὰρ πρὸσ αὐτὸν ἀπεσταλκέναι κήρυκα, πρόφασιν μὲν ὑπὲρ τῶν αἰχμαλώτων, παρακαλεῖν δὲ ‐ πλῆθοσ τῶν συναρχόντων περιποιησάμενον μηδὲν τῶν πραττομένων πολυπραγμονεῖν ‐ μή γ’ ἀντιπράττειν, ἐπειδὴ συνεργεῖν οὐ προαιρεῖται. μηκέτ’ οὖν βούλεσθαι στρατηγεῖν, ἀλλὰ παρεῖναι τὴν ἀρχὴν ἀποθησόμενοσ·

οὐ γὰρ ἀνεκτὸν εἶναι, τῶν ἄλλων πωλούντων τὴν πατρίδα, μόνον κινδυνεύειν μετὰ τῶν πολιτῶν ἅμα καὶ δόξειν μετεσχηκέναι τῆσ προδοσίασ. παροξυνθέντων δὲ ἐπὶ τοῖσ ῥηθεῖσι καὶ τοῦ λόγου διὰ πάσησ τῆσ δυνάμεωσ ῥυέντοσ, τότε μὲν εἷσ ἕκαστοσ ἀγωνιῶν εἰσ οἶκον ἐχωρίσθη·

τῇ δ’ ὑστεραίᾳ συναχθείσησ ἐκκλησίασ, ἐν ᾗ τῶν ἀρχόντων πολλὰ κατηγορήσασ οὐ μετρίωσ εὐδοκίμησε, τὸν δὲ δῆμον κατὰ τῶν στρατηγῶν παρώξυνε. τέλοσ δὲ τῶν καθημένων τινὲσ ἀνεβόησαν στρατηγὸν αὐτὸν αὐτοκράτορα καθιστάναι καὶ μὴ περιμένειν, ἄχρισ ἂν οἱ πολέμιοι τοῖσ τείχεσιν ἐπεισίωσι·

χρείαν γὰρ ἔχειν τὸ μέγεθοσ τοῦ πολέμου τοιούτου στρατηγοῦ, δι’ οὗ δυνατὸν εἶναι εὐπορεῖν τοῖσ πράγμασιν· τὰ δὲ περὶ τῶν προδοτῶν ἐν ἐκκλησίᾳ ἑτέρᾳ βουλεύεσθαι· τῶν γὰρ ἐνεστώτων καιρῶν ἀλλότριον εἶναι· καὶ πρότερον δὲ Καρχηδονίων τὰσ τριάκοντα μυριάδασ περὶ τὴν Ἱμέραν νενικῆσθαι στρατηγοῦντοσ Γέλωνοσ αὐτοκράτοροσ. ταχὺ δὲ τῶν πολλῶν, ὥσπερ εἰώθασιν, ἐπὶ τὸ χεῖρον ῥεπόντων, ὁ Διονύσιοσ ἀπεδείχθη στρατηγὸσ αὐτοκράτωρ.

ἐπεὶ δ’ οὖν αὐτῷ τὰ πράγματα κατὰ νοῦν ἠκολούθει, ψήφισμα ἔγραψε τοὺσ μισθοὺσ διπλασίουσ εἶναι· πάντασ γὰρ ἔφησε τούτου γενομένου προθυμοτέρουσ ἔσεσθαι πρὸσ τὸν ἀγῶνα, καὶ περὶ τῶν χρημάτων παρεκάλει μηθὲν ἀγωνιᾶν· ἔσεσθαι γὰρ αὐτῶν τὸν πόρον ῥᾴδιον. διαλυθείσησ δὲ τῆσ ἐκκλησίασ οὐκ ὀλίγοι τῶν Συρακοσίων κατηγόρουν τῶν πραχθέντων, ὥσπερ οὐκ αὐτοὶ ταῦτα κεκυρωκότεσ·

τοῖσ γὰρ λογισμοῖσ εἰσ ἑαυτοὺσ ἐρχόμενοι τὴν ἐσομένην δυναστείαν ἀνεθεώρουν. οὗτοι μὲν οὖν βεβαιῶσαι βουλόμενοι τὴν ἐλευθερίαν ἔλαθον ἑαυτοὺσ δεσπότην τῆσ πατρίδοσ καθεστακότεσ· ὁ δὲ Διονύσιοσ τὴν μετάνοιαν τῶν ὄχλων φθάσαι βουλόμενοσ, ἐπεζήτει δι’ οὗ τρόπου δύναιτο φύλακασ αἰτήσασθαι τοῦ σώματοσ·

τούτου γὰρ συγχωρηθέντοσ ῥᾳδίωσ ἤμελλε κυριεύσειν τῆσ τυραννίδοσ. εὐθὺσ οὖν παρήγγειλε τοὺσ ἐν ἡλικίᾳ πάντασ ἑώσ ἐτῶν τεσσαράκοντα λαβόντασ ἐπισιτισμὸν ἡμερῶν τριάκοντα καταντᾶν μετὰ τῶν ὅπλων εἰσ Λεοντίνουσ. αὕτη δ’ ἡ πόλισ τότε φρούριον ἦν τῶν Συρακοσίων, πλῆρεσ ὑπάρχον φυγάδων καὶ ξένων ἀνθρώπων. ἤλπιζε γὰρ τούτουσ συναγωνιστὰσ ἕξειν, ἐπιθυμοῦντασ μεταβολῆσ, τῶν δὲ Συρακοσίων τοὺσ πλείστουσ οὐδ’ ἥξειν εἰσ Λεοντίνουσ. οὐ μὴν ἀλλὰ νυκτὸσ ἐπὶ τῆσ χώρασ στρατοπεδεύων, καὶ προσποιηθεὶσ ἐπιβουλεύεσθαι, κραυγὴν ἐποίησε καὶ θόρυβον διὰ τῶν ἰδίων οἰκετῶν·

τοῦτο δὲ πράξασ συνέφυγεν εἰσ τὴν ἀκρόπολιν, καὶ διενυκτέρευσε πυρὰ καίων καὶ τοὺσ γνωριμωτάτουσ τῶν στρατιωτῶν μεταπεμπόμενοσ. ἅμα δ’ ἡμέρᾳ τοῦ πλήθουσ ἀθροισθέντοσ εἰσ Λεοντίνουσ, πολλὰ πρὸσ τὴν τῆσ ἐπιβολῆσ ὑπόθεσιν πιθανολογήσασ ἔπεισε τοὺσ ὄχλουσ δοῦναι φύλακασ αὐτῷ τῶν στρατιωτῶν ἑξακοσίουσ, οὓσ ἂν προαιρῆται.

λέγεται δὲ τοῦτο πρᾶξαι τὸν Διονύσιον ἀπομιμούμενον Πεισίστρατον τὸν Ἀθηναῖον· καὶ γὰρ ἐκεῖνόν φασιν ἑαυτὸν κατατραυματίσαντα προελθεῖν εἰσ τὴν ἐκκλησίαν ὡσ ἐπιβεβουλευμένον, καὶ διὰ τοῦτο φυλακὴν λαβεῖν παρὰ τῶν πολιτῶν, ᾗ χρησάμενον τὴν τυραννίδα περιπεποιῆσθαι.

καὶ τότε Διονύσιοσ τῇ παραπλησίᾳ μηχανῇ τὸ πλῆθοσ ἐξαπατήσασ ἐνήργει τὰ τῆσ τυραννίδοσ.

일치하는 문장이 없습니다.

SEARCH

MENU NAVIGATION