Plutarch, Antony, chapter 39

(플루타르코스, Antony, chapter 39)

τοῦτο πάντασ μέν, ὡσ εἰκόσ, ἠνίασε τοὺσ περὶ Ἀντώνιον ἀνελπίστωσ ἐν ἀρχῇ πληγέντασ· ὁ δὲ Ἀρμένιοσ Ἀρταουάσδησ ἀπογνοὺσ τὰ Ῥωμαίων ᾤχετο τὴν αὑτοῦ στρατιὰν ἀναλαβών, καίπερ αἰτιώτατοσ τοῦ πολέμου γενόμενοσ. ἐπιφανέντων δὲ λαμπρῶσ τοῖσ πολιορκοῦσι τῶν Πάρθων καὶ χρωμένων ἀπειλαῖσ πρὸσ ὕβριν, οὐ βουλόμενοσ Ἀντώνιοσ ἡσυχάζοντι τῷ στρατῷ τὸ δυσθυμοῦν καὶ καταπεπληγμένον ἐμμένειν καὶ αὔξεσθαι, δέκα τάγματα λαβὼν καὶ τρεῖσ στρατηγίδασ σπείρασ ὁπλιτῶν, τοὺσ δ’ ἱππεῖσ ἅπαντασ, ἐξήγαγε πρὸσ σιτολογίαν, οἰόμενοσ οὕτωσ ἂν ἐπισπασθέντων μάλιστα τῶν πολεμίων ἐκ παρατάξεωσ μάχην γενέσθαι.

προελθὼν δὲ μιᾶσ ὁδὸν ἡμέρασ, ὡσ ἑώρα τοὺσ Πάρθουσ κύκλῳ περιχεομένουσ καὶ προσπεσεῖν καθ’ ὁδὸν αὐτῷ ζητοῦντασ, ἐξέθηκε μὲν τὸ τῆσ μάχησ σύμβολον ἐν τῷ στρατοπέδῳ, καθελὼν δὲ τὰσ σκηνὰσ ὡσ οὐ μαχησόμενοσ, ἀλλ’ ἀπάξων, παρημείβετο τῶν βαρβάρων τὴν τάξιν οὖσαν μηνοειδῆ, κελεύσασ ὅταν οἱ πρῶτοι τοῖσ ὁπλίταισ ἐν ἐφικτῷ δοκῶσιν εἶναι, τοὺσ ἱππεῖσ ἐναντίουσ εἰσελαύνειν.

τοῖσ δὲ Πάρθοισ παρακεκριμένοισ λόγου κρείττων ἡ τάξισ ἐφαίνετο τῶν Ῥωμαίων, καὶ κατεθεῶντο παρεξιόντασ ἐν διαστήμασιν ἴσοισ ἀθορύβωσ καὶ σιωπῇ τοὺσ ὑσσοὺσ κραδαίνοντασ.

ὡσ δὲ τὸ σημεῖον ἤρθη καὶ προσεφέροντο μετὰ κραυγῆσ ἐπιστρέψαντεσ οἱ ἱππεῖσ, τούτουσ μὲν ἠμύνοντο δεξάμενοι, καίπερ εὐθὺσ ἐντὸσ τοξεύματοσ γενομένουσ, τῶν δὲ ὁπλιτῶν συναπτόντων ἅμα βοῇ καὶ πατάγῳ τῶν ὅπλων, οἵ τε ἵπποι τοῖσ Πάρθοισ ἐξίσταντο ταρβοῦντεσ καὶ αὐτοὶ πρὶν εἰσ χεῖρασ ἐλθεῖν ἔφευγον. ὁ δὲ Ἀντώνιοσ ἐνέκειτο τῇ διώξει, καὶ μεγάλασ εἶχεν ἐλπίδασ ὡσ τοῦ πολέμου τὸ σύμπαν ἢ τὸ πλεῖστον ἐκείνῃ τῇ μάχῃ διαπεπραγμένοσ.

ἐπεὶ δὲ τῆσ διώξεωσ γενομένησ τοῖσ μὲν πεζοῖσ ἐπὶ πεντήκοντα στάδια, τοῖσ δὲ ἱππεῦσιν ἐπὶ τρὶσ τοσαῦτα, τοὺσ πεπτωκότασ τῶν πολεμίων καὶ τοὺσ ἡλωκότασ ἐπισκοποῦντεσ εὑρ͂ον αἰχμαλώτουσ μὲν τριάκοντα, νεκροὺσ δὲ ὀγδοήκοντα μόνουσ, ἀπορία καὶ δυσθυμία πᾶσι παρέστη, δεινὸν εἶναι λογιζομένοισ εἰ νικῶντεσ μὲν οὕτωσ ὀλίγουσ κτείνουσιν, ἡττώμενοι δὲ στερήσονται τοσούτων ὅσουσ ἀπέβαλον περὶ ταῖσ ἁμάξαισ. τῇ δ’ ὑστεραίᾳ συσκευασάμενοι τὴν ἐπὶ Φραάτων καὶ τοῦ στρατοπέδου προῆγον.

ἐντυχόντεσ δὲ κατὰ τὴν ὁδὸν πρῶτον μὲν ὀλίγοισ τῶν πολεμίων, ἔπειτα πλείοσι, τέλοσ δὲ πᾶσιν ὥσπερ ἀηττήτοισ καὶ νεαλέσι προκαλουμένοισ καὶ προσβάλλουσι πανταχόθεν, μοχθηρῶσ καὶ πολυπόνωσ ἀπεσώθησαν εἰσ τὸ στρατόπεδον. τῶν δὲ Μήδων ἐκδρομήν τινα ποιησαμένων ἐπὶ τὸ χῶμα καὶ τοὺσ προμαχομένουσ φοβησάντων, ὀργισθεὶσ ὁ Ἀντώνιοσ ἐχρήσατο τῇ λεγομένῃ δεκατείᾳ πρὸσ τοὺσ ἀποδειλιάσαντασ.

διελὼν γὰρ εἰσ δεκάδασ τὸ πλῆθοσ ἀφ’ ἑκάστησ ἕνα τὸν λαχόντα κλήρῳ διέφθειρε, τοῖσ δὲ ἄλλοισ ἀντὶ πυρῶν ἐκέλευε κριθὰσ μετρεῖσθαι.

일치하는 문장이 없습니다.

SEARCH

MENU NAVIGATION