헬라어 텍스트

Dionysius of Halicarnassus, Antiquitates Romanae, Books IV-VI, book 6, chapter 37

(디오니시오스, Antiquitates Romanae, Books IV-VI, book 6, chapter 37)

ταύτην ἀποφηναμένου τὴν γνώμην Λαρκίου καὶ πάντων ἐπαινεσάντων, τότε μὲν αἱ πρεσβεῖαι λαβοῦσαι τὰσ εἰρημένασ ἀποκρίσεισ ἀπηλλάγησαν· τῇ δ’ ἑξῆσ ἡμέρᾳ συναγαγόντεσ τὴν βουλὴν οἱ ὕπατοι περὶ τῆσ ἐπανορθώσεωσ τῶν πολιτικῶν θορύβων προὔθεσαν σκοπεῖν. πρῶτοσ οὖν ἐρωτηθεὶσ γνώμην Πόπλιοσ Οὐεργίνιοσ, ἀνὴρ δημοτικόσ, τὴν διὰ μέσου πορευόμενοσ ὁδὸν ἔλεξεν· ἐπειδὴ τὸ δημοτικὸν πλῆθοσ ἐν τῷ παρελθόντι ἐνιαυτῷ προθυμίαν πλείστην εἰσ τοὺσ ὑπὲρ τῆσ πόλεωσ ἀγῶνασ ἐπεδείξατο, Οὐολούσκοισ καὶ Ἀρούγκοισ πολλῇ στρατιᾷ ἐπιοῦσιν ἀντιταξάμενον μεθ’ ἡμῶν, οἰόμαι δεῖν τοὺσ συναραμένουσ ἡμῖν τότε καὶ τῶνδε τῶν πολέμων μετασχόντασ ἀφεῖσθαι καὶ μηδενὸσ αὐτῶν μήτε τὸ σῶμα μήτε τὴν οὐσίαν ὑπὸ τῶν δανειστῶν κρατεῖσθαι· τὸ δ’ αὐτὸ δίκαιον εἶναι καὶ γονεῦσι τοῖσ τούτων ἄχρι καὶ πάππων, καὶ παισὶν ἑώσ ἐγγόνων· τοὺσ δ’ ἄλλουσ ἀγωγίμουσ εἶναι τοῖσ δεδανεικόσιν, ὡσ ἑκάστοισ συνέβαλον. μετὰ δὲ ταῦτα Τῖτοσ Λάρκιοσ εἶπεν·

ἐμοὶ δ’, ὦ βουλή, δοκεῖ κράτιστον μὴ μόνον τοὺσ ἐν τοῖσ πολέμοισ ἀγαθοὺσ γενομένουσ, ἀλλὰ καὶ τὸν ἄλλον ἅπαντα δῆμον ἐλεύθερον τῶν συμβολαίων ἀφεῖσθαι. μόνωσ γὰρ ἂν οὕτωσ ὅλην τὴν πόλιν ὁμονοοῦσαν ἐργασαίμεθα.

τρίτοσ δὲ παρελθὼν Ἄππιοσ Κλαύδιοσ ὁ τὴν ὕπατον ἀρχὴν τῷ παρελθόντι ἔτει σχὼν ἔλεξεν·