헬라어 텍스트

Polybius, Histories, book 4, chapter 11

(폴리비오스, Histories, book 4, chapter 11)

Μεθύδριον τῆσ Μεγαλοπολίτιδοσ· οἱ δὲ τῶν Ἀχαιῶν ἡγεμόνεσ, συνέντεσ τὴν παρουσίαν τῶν Αἰτωλῶν, οὕτωσ κακῶσ ἐχρήσαντο τοῖσ πράγμασιν ὥσθ’ ὑπερβολὴν ἀνοίασ μὴ καταλιπεῖν. ἀναστρέψαντεσ γὰρ ἐκ τῆσ Κλειτορίασ κατεστρατοπέδευσαν περὶ Καφύασ.

τῶν δ’ Αἰτωλῶν ποιουμένων τὴν πορείαν ἀπὸ Μεθυδρίου παρὰ τὴν τῶν Ὀρχομενίων πόλιν, ἐξάγοντεσ τοὺσ Ἀχαιοὺσ ἐν τῷ τῶν Καφυέων πεδίῳ παρενέβαλον, πρόβλημα ποιούμενοι τὸν δι’ αὐτοῦ ῥέοντα ποταμόν.

μετὰ δὲ πολλῆσ εὐταξίασ ἐποιοῦντο τὴν πορείαν ὡσ ἐπὶ τὰσ ὑπερβολὰσ ἐπὶ τὸν Ὀλύγυρτον, ἀσμενίζοντεσ, εἰ μή τισ αὐτοῖσ ἐγχειροίη καὶ βιάζοιτο κινδυνεύειν.

οἱ δὲ περὶ τὸν Ἄρατον, τῆσ μὲν πρωτοπορείασ τῶν Αἰτωλῶν ἤδη προσβαινούσησ πρὸσ τὰσ ὑπερβολάσ, τῶν δ’ ἱππέων οὐραγούντων διὰ τοῦ πεδίου καὶ συνεγγιζόντων τῷ προσαγορευομένῳ Πρόποδι τῆσ παρωρείασ, ἐξαποστέλλουσι τοὺσ ἱππεῖσ καὶ τοὺσ εὐζώνουσ, Ἐπίστρατον ἐπιστήσαντεσ τὸν Ἀκαρνᾶνα, καὶ συντάξαντεσ ἐξάπτεσθαι τῆσ οὐραγίασ καὶ καταπειράζειν τῶν πολεμίων.

καίτοι γ’ εἰ μὲν ἦν κινδυνευτέον, οὐ πρὸσ τὴν οὐραγίαν ἐχρῆν συμπλέκεσθαι, διηνυκότων ἤδη τῶν πολεμίων τοὺσ ὁμαλοὺσ τόπουσ, πρὸσ δὲ τὴν πρωτοπορείαν, εὐθέωσ ἐμβαλόντων εἰσ τὸ πεδίον.

οὕτωσ γὰρ ἂν τὸν ἀγῶνα συνέβη γενέσθαι τὸν ὅλον ἐν τοῖσ ἐπιπέδοισ καὶ πεδινοῖσ τόποισ, οὗ τοὺσ μὲν Αἰτωλοὺσ δυσχρηστοτάτουσ εἶναι συνέβαινε διά τε τὸν καθοπλισμὸν καὶ τὴν ὅλην σύνταξιν, τοὺσ δ’ Ἀχαιοὺσ εὐχρηστοτάτουσ καὶ δυναμικωτάτουσ διὰ τἀναντία τῶν προειρημένων.

νῦν δ’ ἀφέμενοι τῶν οἰκείων τόπων καὶ καιρῶν εἰσ τὰ τῶν πολεμίων προτερήματα συγκατέβησαν.