헬라어 문장 검색 - ΠολψβίΗιστορί02́008́

(폴리비오스, Histories, book 2, chapter 8)

τοσοῦτον ἔκρινον ποιήσασθαι μνήμην. οἱ δ’ Ἰλλυριοὶ καὶ κατὰ τοὺσ ἀνωτέρω μὲν χρόνουσ συνεχῶσ ἠδίκουν τοὺσ πλοϊζομένουσ ἀπ’ Ἰταλίασ· καθ’ οὓσ δὲ καιροὺσ περὶ τὴν Φοινίκην διέτριβον, καὶ πλείουσ ἀπὸ τοῦ στόλου χωριζόμενοι πολλοὺσ τῶν Ἰταλικῶν ἐμπόρων ἔσθ’ οὓσ μὲν ἐσύλησαν, οὓσ δ’ ἀπέσφαξαν, οὐκ ὀλίγουσ δὲ καὶ ζωγρίᾳ τῶν ἁλισκομένων ἀνῆγον.

οἱ δὲ Ῥωμαῖοι παρακούοντεσ τὸν πρὸ τοῦ χρόνον τῶν ἐγκαλούντων τοῖσ Ἰλλυριοῖσ, τότε καὶ πλειόνων ἐπελθόντων ἐπὶ τὴν σύγκλητον, κατέστησαν πρεσβευτὰσ εἰσ τὴν Ἰλλυρίδα τοὺσ ἐπίσκεψιν ποιησομένουσ περὶ τῶν προειρημένων Γάϊον καὶ Λεύκιον Κορογκανίουσ.

ἡ δὲ Τεύτα, καταπλευσάντων πρὸσ αὐτὴν τῶν ἐκ τῆσ Ἠπείρου λέμβων, καταπλαγεῖσα τὸ πλῆθοσ καὶ τὸ κάλλοσ τῆσ ἀγομένησ κατασκευῆσ ‐ πολὺ γὰρ ἡ Φοινίκη διέφερε τότε τῶν κατὰ τὴν Ἤπειρον πόλεων εὐδαιμονίᾳ ‐ διπλασίωσ ἐπερρώσθη πρὸσ τὴν κατὰ τῶν Ἑλλήνων ἀδικίαν.

οὐ μὴν ἀλλὰ τότε μὲν ἐπέσχεν διὰ τὰσ ἐγχωρίουσ ταραχάσ, καταστησαμένη δὲ ταχέωσ τὰ κατὰ τοὺσ ἀποστάντασ Ἰλλυριοὺσ ἐπολιόρκει τὴν Ἴσσαν διὰ τὸ ταύτην ἔτι μόνην ἀπειθεῖν αὐτῇ.

κατὰ δὲ τὸν καιρὸν τοῦτον κατέπλευσαν οἱ τῶν Ῥωμαίων πρέσβεισ·

καὶ δοθέντοσ αὐτοῖσ καιροῦ πρὸσ ἔντευξιν διελέγοντο περὶ τῶν εἰσ αὐτοὺσ γεγονότων ἀδικημάτων. ἡ δὲ Τεύτα καθόλου μὲν παρ’ ὅλην τὴν κοινολογίαν ἀγερώχωσ καὶ λίαν ὑπερηφάνωσ αὐτῶν διήκουεν.

καταπαυσάντων δὲ τὸν λόγον, κοινῇ μὲν ἔφη πειρᾶσθαι φροντίζειν ἵνα μηδὲν ἀδίκημα γίνηται Ῥωμαίοισ ἐξ Ἰλλυριῶν·

ἰδίᾳ γε μὴν οὐ νόμιμον εἶναι τοῖσ βασιλεῦσι κωλύειν Ἰλλυριοῖσ τὰσ κατὰ θάλατταν ὠφελείασ. ὁ δὲ νεώτεροσ τῶν πρεσβευτῶν δυσχεράνασ ἐπὶ τοῖσ εἰρημένοισ ἐχρήσατο παρρησίᾳ καθηκούσῃ μέν, οὐδαμῶσ δὲ πρὸσ καιρόν.

ὦ Τεύτα, κάλλιστον ἔθοσ ἐστὶ τὰ κατ’ ἰδίαν ἀδικήματα κοινῇ μεταπορεύεσθαι καὶ βοηθεῖν τοῖσ ἀδικουμένοισ·

πειρασόμεθα δὴ θεοῦ βουλομένου σφόδρα καὶ ταχέωσ ἀναγκάσαι σε τὰ βασιλικὰ νόμιμα διορθώσασθαι πρὸσ Ἰλλυριούσ.

ἡ δὲ γυναικοθύμωσ καὶ ἀλογίστωσ δεξαμένη τὴν παρρησίαν ἐπὶ τοσοῦτον ἐξωργίσθη πρὸσ τὸ ῥηθὲν ὡσ ὀλιγωρήσασα τῶν παρ’ ἀνθρώποισ ὡρισμένων δικαίων ἀποπλέουσιν αὐτοῖσ ἐπαποστεῖλαί τινασ τὸν παρρησιασάμενον τῶν πρέσβεων ἀποκτεῖναι.

προσπεσόντοσ δὲ τοῦ γεγονότοσ εἰσ τὴν Ῥώμην, διοργισθέντεσ ἐπὶ τῇ παρανομίᾳ τῆσ γυναικὸσ εὐθέωσ περὶ παρασκευὴν ἐγίνοντο καὶ στρατόπεδα κατέγραφον καὶ στόλον συνήθροιζον.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Polybius, Histories, book 2, chapter 8

(폴리비오스, Histories, book 2, chapter 8)

상위

목록

SEARCH

MENU NAVIGATION