Dionysius of Halicarnassus, Antiquitates Romanae, Books IV-VI, book 4, chapter 65

(디오니시오스, Antiquitates Romanae, Books IV-VI, book 4, chapter 65)

ἐπιστὰσ δὲ τῇ κλίνῃ διεγερθείσησ ἅμα τῷ συνεῖναι τὸν ψόφον τῆσ γυναικὸσ καὶ πυνθανομένησ, ὅστισ εἰή, φράσασ τοὔνομα σιωπᾶν ἐκέλευε καὶ μένειν ἐν τῷ δωματίῳ σφάξειν αὐτὴν ἀπειλήσασ, ἐὰν ἐπιχειρήσῃ φεύγειν ἢ βοᾶν. τούτῳ καταπληξάμενοσ τῷ τρόπῳ τὴν ἄνθρωπον αἱρέσεισ αὐτῇ δύο προὔτεινεν, ὧν ποτέραν αὐτὴ προῃρεῖτο λαβεῖν ἠξίου, θάνατον μετ’ αἰσχύνησ ἢ βίον μετ’ εὐδαιμονίασ. εἰ μὲν γὰρ ὑπομενεῖσ, ἔφη, χαρίσασθαί μοι, γυναῖκά σε ποιήσομαι καὶ βασιλεύσεισ σὺν ἐμοὶ νῦν μὲν ἧσ ὁ πατήρ μοι ἔδωκε πόλεωσ, μετὰ δὲ τὴν ἐκείνου τελευτὴν Ῥωμαίων τε καὶ Λατίνων καὶ Τυρρηνῶν καὶ τῶν ἄλλων ὅσων ἐκεῖνοσ ἄρχει.

ἐγὼ γὰρ οἶδ’, ὅτι παραλήψομαι τὴν τοῦ πατρὸσ βασιλείαν, ὥσπερ ἐστὶ δίκαιον, τῶν υἱῶν αὐτοῦ πρεσβύτατοσ ὤν.

ὅσα δ’ ὑπάρχει τοῖσ βασιλεῦσιν ἀγαθά, ὧν ἁπάντων ἔσῃ σὺν ἐμοὶ κυρία, τί δεῖ σε καλῶσ ἐπισταμένην διδάσκειν; εἰ δ’ ἀντιπράττειν ἐπιχειρήσεισ σώζειν βουλομένη τὸ σῶφρον, ἀποκτενῶ σε καὶ τῶν θεραπόντων ἐπικατασφάξασ ἕνα θήσω τὰ σώματα ὑμῶν ἅμα καὶ φήσω κατειληφὼσ ἀσχημονοῦσάν σε μετὰ τοῦ δούλου τετιμωρῆσθαι τὴν τοῦ συγγενοῦσ ὕβριν μετερχόμενοσ, ὥστ’ αἰσχρὰν καὶ ἐπονείδιστόν σου γενέσθαι τὴν τελευτὴν καὶ μηδὲ ταφῆσ τὸ σῶμά σου τυχεῖν μηδ’ ἄλλου τῶν νομίμων μηδενόσ.

ὡσ δὲ πολὺσ ἦν ἀπειλῶν θ’ ἅμα καὶ ἀντιβολῶν καὶ διομνύμενοσ ἀληθεύειν τῶν λεγομένων ἑκάτερον, εἰσ ἀνάγκην ἦλθεν ἡ Λουκρητία φοβηθεῖσα τὴν περὶ τὸν θάνατον ἀσχημοσύνην εἶξαί τε καὶ περιιδεῖν αὐτὸν ἃ προῃρεῖτο διαπραξάμενον.

일치하는 문장이 없습니다.

SEARCH

MENU NAVIGATION