헬라어 텍스트

Polybius, Histories, book 5, chapter 13

(폴리비오스, Histories, book 5, chapter 13)

σπεύδων ὡσ τάχιστα διανύσαι τὰσ δυσχωρίασ διὰ τὸ προσδοκᾶν τοὺσ Αἰτωλοὺσ ἐξάψεσθαι τῆσ οὐραγίασ, πιστεύοντασ ταῖσ ὀχυρότησι τῶν τόπων. ὃ καὶ συνέβη γενέσθαι παρὰ πόδασ.

οἱ γὰρ Αἰτωλοὶ προσβεβοηθηκότεσ καὶ συνηθροισμένοι σχεδὸν εἰσ τρισχιλίουσ, ἑώσ μὲν ὁ Φίλιπποσ ἦν ἐπὶ τῶν μετεώρων, οὐκ ἤγγιζον, ἀλλ’ ἔμενον ἔν τισι τόποισ ἀδήλοισ, Ἀλεξάνδρου τοῦ Τριχωνέωσ προεστῶτοσ αὐτῶν· ἅμα δὲ τῷ κινῆσαι τὴν οὐραγίαν ἐπέβαλον εὐθέωσ εἰσ τὸν Θέρμον καὶ προσέκειντο τοῖσ ἐσχάτοισ. γινομένησ δὲ ταραχῆσ περὶ τὴν οὐραγίαν, ἔτι μᾶλλον ἐκθύμωσ οἱ παρὰ τῶν Αἰτωλῶν ἐπέκειντο καὶ προσέφερον τὰσ χεῖρασ, πιστεύοντεσ τοῖσ τόποισ.

ὁ δὲ Φίλιπποσ, προειδὼσ τὸ μέλλον, ὑπό τινα λόφον ὑπεστάλκει τοὺσ Ἰλλυριοὺσ ἐν τῇ καταβάσει καὶ τῶν πελταστῶν τοὺσ ἐπιτηδειοτάτουσ.

ὧν διαναστάντων ἐπὶ τοὺσ ἐπικειμένουσ καὶ προπεπτωκότασ τῶν ὑπεναντίων, τοὺσ μὲν λοιποὺσ τῶν Αἰτωλῶν ἀνοδίᾳ καὶ προτροπάδην συνέβη φυγεῖν, ἑκατὸν δὲ καὶ τριάκοντα πεσεῖν, ἁλῶναι δ’ οὐ πολὺ τούτων ἐλάττουσ.

γενομένου δὲ τοῦ προτερήματοσ τούτου, ταχέωσ οἱ περὶ τὴν οὐραγίαν, ἐμπρήσαντεσ τὸ Πάμφιον καὶ μετ’ ἀσφαλείασ διελθόντεσ τὰ στενά, συνέμιξαν τοῖσ Μακεδόσιν·

ὁ γὰρ Φίλιπποσ ἐστρατοπεδευκὼσ περὶ τὴν Μέταπαν ἐνταυθοῖ προσανεδέχετο τοὺσ ἀπὸ τῆσ οὐραγίασ.

εἰσ δὲ τὴν ὑστεραίαν κατασκάψασ τὴν Μέταπαν προῆγε, καὶ παρενέβαλε περὶ τὴν καλουμένην πόλιν Ἄκρασ. τῇ δ’ ἑξῆσ ἅμα προάγων ἐπόρθει τὴν χώραν, καὶ καταστρατοπεδεύσασ περὶ Κωνώπην ἐπέμεινε τὴν ἐχομένην ἡμέραν.

τῇ δ’ ἐπιούσῃ πάλιν ἀναζεύξασ ἐποιεῖτο τὴν πορείαν παρὰ τὸν Ἀχελῷον ἑώσ ἐπὶ τὸν Στράτον.