헬라어 텍스트

Polybius, Histories, book 5, chapter 93

(폴리비오스, Histories, book 5, chapter 93)

Ταῦτα δ’ ἁρμοσάμενοσ διέλυε τοὺσ Μεγαλοπολίτασ πρὸσ αὑτοὺσ κατὰ τὸ τῶν Ἀχαιῶν δόγμα. συνέβαινε γὰρ τούτουσ προσφάτωσ ὑπὸ Κλεομένουσ ἐπταικότασ τῇ πατρίδι καὶ τὸ δὴ λεγόμενον ἐκ θεμελίων ἐσφαλμένουσ πολλῶν μὲν ἐπιδεῖσθαι, πάντων δὲ σπανίζειν·

τοῖσ μὲν γὰρ φρονήμασιν ἔμενον, ταῖσ δὲ χορηγίαισ καὶ κοινῇ καὶ κατ’ ἰδίαν πρὸσ πᾶν ἀδυνάτωσ εἶχον.

διόπερ ἦν ἀμφισβητήσεωσ, φιλοτιμίασ, ὀργῆσ τῆσ ἐν ἀλλήλοισ πάντα πλήρη·

τοῦτο γὰρ δὴ φιλεῖ γίνεσθαι καὶ περὶ τὰ κοινὰ πράγματα καὶ περὶ τοὺσ κατ’ ἰδίαν βίουσ, ὅταν ἐλλίπωσιν αἱ χορηγίαι τὰσ ἑκάστων ἐπιβολάσ. πρῶτον μὲν οὖν ἠμφισβήτουν ὑπὲρ τοῦ τειχισμοῦ τῆσ πόλεωσ, φάσκοντεσ οἱ μὲν συνάγειν αὐτὴν δεῖν καὶ ποιεῖν τηλικαύτην ἡλίκην καὶ τειχίζειν ἐπιβαλλόμενοι καθίξονται καὶ φυλάττειν καιροῦ περιστάντοσ δυνήσονται·

καὶ γὰρ νῦν παρὰ τὸ μέγεθοσ αὐτῆσ καὶ τὴν ἐρημίαν ἐσφάλθαι. πρὸσ δὲ τούτοισ εἰσφέρειν ᾤοντο δεῖν τοὺσ κτηματικοὺσ τὸ τρίτον μέροσ τῆσ γῆσ εἰσ τὴν τῶν προσλαμβανομένων οἰκητόρων ἀναπλήρωσιν.

οἱ δ’ οὔτε τὴν πόλιν ἐλάττω ποιεῖν ὑπέμενον οὔτε τὸ τρίτον τῶν κτήσεων εὐδόκουν εἰσφέρειν μέροσ.

μάλιστά τε τῶν νόμων ὑπὸ Πρυτάνιδοσ γεγραμμένων πρὸσ ἀλλήλουσ ἐφιλονείκουν, ὃν ἔδωκε μὲν αὐτοῖσ νομοθέτην Ἀντίγονοσ, ἦν δὲ τῶν ἐπιφανῶν ἀνδρῶν ἐκ τοῦ Περιπάτου καὶ ταύτησ τῆσ αἱρέσεωσ.

τοιαύτησ δ’ οὔσησ τῆσ ἀμφισβητήσεωσ ποιησάμενοσ Ἄρατοσ τὴν ἐνδεχομένην ἐπιστροφὴν κατέπαυσε τὴν φιλοτιμίαν αὐτῶν.

ἐφ’ οἷσ δ’ ἔληξαν τῆσ πρὸσ ἀλλήλουσ διαφορᾶσ, γράψαντεσ εἰσ στήλην παρὰ τὸν τῆσ Ἑστίασ ἀνέθεσαν βωμὸν ἐν Ὁμαρίῳ.