Plutarch, Cleomenes, chapter 13

(플루타르코스, Cleomenes, chapter 13)

πάντων δ’ αὐτὸσ ἐγίγνετο διδάσκαλοσ, εὐτελῆ καὶ ἀφελῆ καὶ φορτικὸν οὐδὲν οὐδὲ ὑπὲρ τοὺσ πολλοὺσ ἔχοντα τὸν ἑαυτοῦ βίον ὥσπερ παράδειγμα σωφροσύνησ ἐν μέσῳ θέμενοσ· ὃ καὶ πρὸσ τὰσ Ἑλληνικὰσ πράξεισ ῥοπήν τινα παρέσχεν αὐτῷ. τοῖσ μὲν γὰρ ἄλλοισ ἐντυγχάνοντεσ οἱ ἄνθρωποι βασιλεῦσιν οὐχ οὕτω κατεπλήττοντο τοὺσ πλούτουσ καὶ τὰσ πολυτελείασ, ὡσ ἐβδελύττοντο τήν ὑπεροψίαν αὐτῶν καὶ τὸν ὄγκον ἐπαχθῶσ καὶ τραχέωσ προσφερομένων τοῖσ ἐντυγχάνουσι · ὄντα τε δὴ βασιλέα καὶ καλούμενον, εἶτα ὁρῶντεσ οὐ πορφύρασ τινὰσ οὐ χλαίνασ περὶ αὐτὸν οὐδὲ κλινιδίων καὶ φορείων κατασκευάσ, οὐδ’ ὑπ’ ἀγγέλων ὄχλου καὶ θυρωρῶν ἢ διὰ γραμματείων χρηματίζοντα χαλεπῶσ καὶ μόλισ, ἀλλ’ αὐτὸν ἐν ἱματίῳ τῷ τυχόντι πρὸσ τὰσ δεξιώσεισ ἀπαντῶντα καὶ διαλεγόμενον καὶ σχολάζοντα τοῖσ χρῄζουσιν ἱλαρῶσ καὶ φιλανθρώπωσ, ἐκηλοῦντο καὶ κατεδημαγωγοῦντο, καὶ μόνον ἀφ’ Ἡρακλέουσ ἐκεῖνον ἔφασαν γεγονέναι.

τῶν δὲ δείπνων αὐτοῦ τὸ μὲν καθημερινὸν ἦν ἐν τρικλίνῳ σφόδρα συνεσταλμένον καὶ Λακωνικόν, εἰ δὲ πρέσβεισ ἢ ξένουσ δέχοιτο, δύο μὲν ἄλλαι προσπαρεβάλλοντο κλῖναι, μικρῷ δὲ μᾶλλον οἱ ὑπηρέται τὴν τράπεζαν ἐπελάμπρυνον, οὐ καρυκείαισ τισὶν οὐδὲ πέμμασιν, ἀλλ’ ὥστε ἀφθονωτέρασ εἶναι τὰσ παραθέσεισ καὶ φιλανθρωπότερον τὸν οἶνον.

καὶ γὰρ ἐπετίμησέ τινα τῶν φίλων ἀκούσασ ὅτι ξένουσ ἑστιῶν ζωμὸν αὐτοῖσ μέλανα καὶ μάζαν, ὥσπερ ἔθοσ ἦν ἐν τοῖσ φιδιτίοισ, παρέθηκεν· οὐ γὰρ ἔφη δεῖν ἐν τούτοισ οὐδὲ πρὸσ τοὺσ ξένουσ λίαν ἀκριβῶσ λακωνίζειν. ἀπαρθείσησ δὲ τῆσ τραπέζησ εἰσεκομίζετο τρίπουσ κρατῆρα χαλκοῦν ἔχων οἴνου μεστὸν καὶ φιάλασ ἀργυρᾶσ δικοτύλουσ δύο καὶ ποτήρια τῶν ἀργυρῶν ὀλίγα παντάπασιν, ἐξ ὧν ἔπινεν ὁ βουλόμενοσ, ἄκοντι δὲ οὐδεὶσ ποτήριον προσέφερεν.

ἀκρόαμα δὲ οὔτ’ ἦν οὔτ’ ἐπεζητεῖτο· ἐπαιδαγώγει γὰρ αὐτὸσ ὁμιλίᾳ τὸν πότον, τὰ μὲν ἐρωτῶν, τὰ δὲ διηγούμενοσ, οὔτε τήν σπουδὴν ἀηδῆ τῶν λόγων τήν τε παιδιὰν ἐπίχαριν καὶ ἀσόλοικον ἐχόντων, ἃσ μὲν γὰρ οἱ λοιποὶ τῶν βασιλέων ἐπὶ τοὺσ ἀνθρώπουσ θήρασ ἐποιοῦντο, χρήμασι καὶ δωρεαῖσ δελεάζοντεσ αὐτοὺσ καὶ διαφθείροντεσ, ἀτέχνουσ καὶ ἀδίκουσ ἐνόμιζεν εἶναι· τὸ δὲ ὁμιλίᾳ καὶ λόγῳ χάριν ἔχοντι καὶ πίστιν οἰκειοῦσθαι καὶ προσάγεσθαι τοὺσ ἐντυγχάνοντασ ἐφαίνετο κάλλιστον αὐτῷ καὶ βασιλικώτατον, ὡσ οὐδενὶ φίλου διαφέροντα μισθωτὸν ἢ τῷ τὸν μὲν ἤθει καὶ λόγῳ, τὸν δὲ ὑπὸ χρημάτων ἁλίσκεσθαι.

일치하는 문장이 없습니다.

SEARCH

MENU NAVIGATION