헬라어 텍스트

Dionysius of Halicarnassus, Antiquitates Romanae, Books IV-VI, book 5, chapter 12

(디오니시오스, Antiquitates Romanae, Books IV-VI, book 5, chapter 12)

καὶ τῶν πολιτῶν ἐπαινεσάντων τὸν λόγον, ὁ μὲν Κολλατῖνοσ πολλὰ κατολοφυρόμενοσ ἑαυτόν, εἰ διὰ συγγενῶν ἔλεον ἐκλιπεῖν ἀναγκασθήσεται τὴν πατρίδα μηδὲν ἀδικῶν, ἀποτίθεται τὴν ἀρχήν. ὁ δὲ Βροῦτοσ ἐπαινέσασ αὐτὸν ὡσ τὰ κράτιστα καὶ συμφορώτατα ἑαυτῷ τε καὶ τῇ πόλει βεβουλευμένον παρεκάλει μήτ’ αὐτῷ μήτε τῇ πατρίδι μνησικακεῖν·

ἑτέραν δὲ μεταλαβόντα οἴκησιν τὴν καταλειπομένην πατρίδα ἡγεῖσθαι, μηδενὸσ μήτ’ ἔργου μήτε λόγου κοινωνοῦντα τοῖσ ἐχθροῖσ κατ’ αὐτῆσ· τὸ δ’ ὅλον ἀποδημίαν ὑπολαβόντα τὴν μετανάστασιν, οὐκ ἐξορισμὸν οὐδὲ φυγήν, τὸ μὲν σῶμα παρὰ τοῖσ ὑποδεξαμένοισ ἔχειν, τὴν δὲ ψυχὴν παρὰ τοῖσ προπέμπουσι. ταῦτα δ’ ὑποθέμενοσ τῷ ἀνδρὶ πείθει τὸν δῆμον εἴκοσι ταλάντων δοῦναι αὐτῷ δωρεὰν καὶ αὐτὸσ πέντε τάλαντα προστίθησιν ἐκ τῶν ἰδίων. Ταρκύνιοσ μὲν δὴ Κολλατῖνοσ τοιαύτῃ τύχῃ περιπεσὼν εἰσ Λαουίνιον ᾤχετο τὴν μητρόπολιν τοῦ Λατίνων γένουσ, ἐν ᾗ γηραιὸσ ἐτελεύτα·

ὁ δὲ Βροῦτοσ οὐκ ἀξιῶν μόνοσ ἄρχειν οὐδ’ εἰσ ὑπόνοιαν ἐλθεῖν τοῖσ πολίταισ, ὅτι μοναρχίασ ὑπαχθεὶσ πόθῳ τὸν συνύπατον ἐξήλασεν ἐκ τῆσ πατρίδοσ, καλέσασ τὸν δῆμον εἰσ τὸ πεδίον, ἔνθα σύνηθεσ αὐτοῖσ ἦν τούσ τε βασιλεῖσ καὶ τὰσ ἄλλασ ἀρχὰσ καθιστάναι, συνάρχοντα αἱρεῖται Πόπλιον Οὐαλέριον, ἀπόγονον, ὡσ καὶ πρότερον εἶπον, τοῦ Σαβίνου Οὐαλερίου, ἄνδρα πολλῶν μὲν καὶ ἄλλων ἐπιτηδευμάτων χάριν ἐπαινεῖσθαί τε καὶ θαυμάζεσθαι ἄξιον, μάλιστα δὲ τῆσ αὐταρκείασ τοῦ βίου.

φιλοσοφία γάρ τισ αὐτοδίδακτοσ ἐγένετο περὶ αὐτόν, ἣν ἐν πολλοῖσ ἀπεδείξατο πράγμασιν, ὑπὲρ ὧν ὀλίγον ὕστερον ἐρῶ.