Dionysius of Halicarnassus, Antiquitates Romanae, Books IV-VI, book 5, chapter 6

(디오니시오스, Antiquitates Romanae, Books IV-VI, book 5, chapter 6)

ταῦτα δὲ τῶν ὑπάτων λεγόντων καὶ πολλῶν συναγορευόντων ἀμφοτέροισ ἀποροῦσα, ὅ τι χρὴ πράττειν, ἡ βουλὴ καὶ ἐφ’ ἡμέρασ συχνὰσ σκοποῦσα, ἐπεὶ συμφορώτερα μὲν ὁ Βροῦτοσ ἐδόκει λέγειν, δικαιότερα δ’ ὁ Κολλατῖνοσ παρῄνει, τελευτῶσα διέγνω τὸν δῆμον ποιῆσαι τοῦ τε συμφέροντοσ καὶ τοῦ δικαίου κριτήν. πολλῶν δὲ λεχθέντων ὑφ’ ἑκατέρου τῶν ὑπάτων ἀναλαβοῦσαι ψῆφον αἱ φρᾶτραι τριάκοντα οὖσαι τὸν ἀριθμὸν οὕτω μικρὰν ἐποιήσαντο τὴν ἐπὶ θάτερα ῥοπήν, ὥστε μιᾷ ψήφῳ πλείουσ γενέσθαι τῶν κατέχειν τὰ χρήματα βουλομένων τὰσ ἀποδιδόναι κελευούσασ.

λαβόντεσ δὲ παρὰ τῶν ὑπάτων τὰσ ἀποκρίσεισ οἱ Τυρρηνοὶ καὶ πολλὰ τὴν πόλιν ἐπαινέσαντεσ, ὅτι τὰ δίκαια πρὸ τῶν συμφερόντων εἵλοντο, Ταρκυνίῳ μὲν ἐπέστειλαν τοὺσ ἀποληψομένουσ τὰ χρήματα πέμπειν, αὐτοὶ δ’ ἐπέμειναν ἐν τῇ πόλει συναγωγήν τε τῶν ἐπίπλων καὶ διάθεσιν τῶν μὴ δυναμένων ἄγεσθαί τε καὶ φέρεσθαι σκηπτόμενοι·

ὡσ δὲ τἀληθὲσ εἶχε ταράττοντεσ καὶ σκευωρούμενοι τὰ κατὰ τὴν πόλιν, ὡσ ὁ τύραννοσ αὐτοῖσ ἐπέστειλε. τάσ τε γὰρ ἐπιστολὰσ τὰσ παρὰ τῶν φυγάδων τοῖσ ἐπιτηδείοισ αὐτῶν ἀπεδίδοσαν καὶ παρ’ ἐκείνων ἑτέρασ πρὸσ τοὺσ φυγάδασ ἐλάμβανον·

συνιόντεσ δὲ πολλοῖσ εἰσ ὁμιλίαν καὶ διάπειραν αὐτῶν τῆσ προαιρέσεωσ λαμβάνοντεσ, οὓσ εὑρίσκοιεν εὐαλώτουσ δἰ ἀσθένειαν γνώμησ ἢ βίου σπάνιν ἢ πόθον τῶν ἐν τῇ τυραννίδι πλεονεξιῶν, ἐλπίδασ τε χρηστὰσ ὑποτείνοντεσ αὐτοῖσ καὶ χρήματα διδόντεσ ἐπεχείρουν διαφθείρειν. ἔμελλον δ’ ὥσπερ εἰκὸσ ἐν πόλει μεγάλῃ καὶ πολυοχλούσῃ φανήσεσθαί τινεσ οἱ τὴν χείρω πολιτείαν αἱρησόμενοι πρὸ τῆσ κρείττονοσ οὐ τῶν ἀσήμων μόνον, ἀλλὰ καὶ τῶν ἐπιφανῶν, ἐν οἷσ ἦσαν Ιοὔνιοί τε δύο Τίτοσ καὶ Τιβέριοσ Βρούτου παῖδεσ τοῦ ὑπατεύοντοσ ἀρτίωσ ἀρχόμενοι γενειᾶν καὶ σὺν αὐτοῖσ Οὐιτέλλιοί τε δύο Μάρκοσ καὶ Μάνιοσ, ἀδελφοὶ τῆσ Βρούτου γυναικόσ, ἱκανοὶ τὰ κοινὰ πράττειν, καὶ Κολλατίνου θατέρου τῶν ὑπάτων ἀδελφῆσ υἱοὶ δύο Λεύκιοσ καὶ Μάρκοσ Ἀκύλλιοι τὴν αὐτὴν ἔχοντεσ τοῖσ Βρούτου παισὶν ἡλικίαν, παρ’ οἷσ αἱ σύνοδοι τὰ πολλὰ ἐγίνοντο πατρὸσ οὐκέτι περιόντοσ αὐτοῖσ καὶ τὰ περὶ τῆσ καθόδου τῶν τυράννων βουλεύματα συνετίθετο.

일치하는 문장이 없습니다.

SEARCH

MENU NAVIGATION