헬라어 텍스트

Plutarch, Brutus, chapter 35

(플루타르코스, Brutus, chapter 35)

τῇ δ’ ὑστεραίᾳ Βροῦτοσ ἄνδρα Ῥωμαῖον ἐστρατηγηκότα καὶ πεπιστευμένον ὑπ’ αὐτοῦ, Λεύκιον Πέλλαν, Σαρδιανῶν κατηγορούντων ἐπὶ κλοπαῖσ δημοσίᾳ καταγνοὺσ ἠτίμωσε· καὶ τὸ πρᾶγμα Κάσσιον οὐ μετρίωσ ἐλύπησεν. αὐτὸσ γὰρ ὀλίγαισ ἡμέραισ ἔμπροσθεν ἐπὶ τοῖσ αὐτοῖσ ἐλεγχθέντασ ἀδικήμασι δύο φίλουσ ἰδίᾳ νουθετήσασ φανερῶσ ἀφῆκε καὶ διετέλει χρώμενοσ, ὅθεν ᾐτιᾶτο τὸν Βροῦτον ὡσ ἄγαν ὄντα νόμιμον καὶ δίκαιον ἐν καιρῷ πολιτείασ δεομένῳ καὶ φιλανθρωπίασ. ὁ δὲ τῶν εἰδῶν τῶν Μαρτίων ἐκέλευεν αὐτὸν μνημονεύειν ἐκείνων, ἐν αἷσ Καίσαρα ἔκτειναν, οὐκ αὐτὸν ἄγοντα καὶ φέροντα πάντασ ἀνθρώπουσ, ἀλλ’ ἑτέρων δύναμιν ὄντα ταῦτα πρασσόντων·

ὡσ, εἴ τισ ἔστι πρόφασισ καλὴ μεθ’ ἧσ ἀμελεῖται τὸ δίκαιον, ἄμεινον ἦν τοὺσ Καίσαροσ φίλουσ ὑπομένειν ἢ τοὺσ ἑαυτῶν περιορᾶν ἀδικοῦντασ.

"ἐκείνοισ μὲν γὰρ ἀνανδρίασ, ἀδικίασ δὲ δόξα μετὰ κινδύνων ἡμῖν καὶ πόνων πρόσεστι. τοιαύτη μὲν ἡ τοῦ Βρούτου προαίρεσισ ἦν.