Plutarch, Aratus, chapter 45

(플루타르코스, Aratus, chapter 45)

τρέφειν τε καὶ μισθοδοτεῖν ἠναγκάζοντο τοὺσ Μακεδόνασ, θυσίασ δὲ καὶ πομπὰσ καὶ ἀγῶνασ Ἀντιγόνῳ συνετέλουν, ἀρξαμένων τῶν Ἀράτου πολιτῶν καὶ δεξαμένων τῇ πόλει τὸν Ἀντίγονον ὑπ’ Ἀράτου ξενιζόμενον, ᾐτιῶντο πάντων ἐκεῖνον, ἀγνοοῦντεσ ὅτι τὰσ ἡνίασ ἐκείνῳ παραδεδωκὼσ καὶ τῇ ῥύμῃ τῆσ βασιλικῆσ ἐφελκόμενοσ ἐξουσίασ οὐδενὸσ ἦν ἢ μόνησ φωνῆσ ἔτι κύριοσ, ἐπισφαλῆ τὴν παρρησίαν ἐχούσησ. ἐπεὶ φανερῶσ γε πολλὰ τῶν πραττομένων ἐλύπει τὸν Ἄρατον, ὥσπερ τὸ περὶ τῶν εἰκόνων ὁ γὰρ Ἀντίγονοσ τὰσ μὲν τῶν ἐν Ἄργει τυράννων καταβεβλημένασ ἀνέστησε, τὰσ δὲ τῶν ἑλόντων τὸν Ἀκροκόρινθον ἑστώσασ ἀνέτρεψε πλὴν μιᾶσ τῆσ ἐκείνου·

καὶ πολλὰ περὶ τούτων δεηθεὶσ ὁ Ἄρατοσ οὐκ ἔπεισεν. ἐδόκει δὲ καὶ τὰ περὶ Μαντίνειαν οὐχ Ἑλληνικῶσ διῳκῆσθαι τοῖσ Ἀχαιοῖσ.

κρατήσαντεσ γὰρ αὐτῶν δι’ Ἀντιγόνου τοὺσ μὲν ἐνδοξοτάτουσ καὶ πρώτουσ ἀπέκτειναν, τῶν δ’ ἄλλων τοὺσ μὲν ἀπέδοντο, τοὺσ δ’ εἰσ Μακεδονίαν ἀπέστειλαν ἐν πέδαισ δεδεμένουσ, παῖδασ δὲ καὶ γυναῖκασ ἠνδραποδίσαντο, τοῦ δὲ συναχθέντοσ ἀργυρίου τὸ τρίτον αὐτοὶ διείλοντο, τὰσ δὲ δύο μοίρασ ἔνειμαν τοῖσ Μακεδόσι. καὶ ταῦτα μὲν ἔσχε τὸν τῆσ ἀμύνησ νόμον καὶ γὰρ εἰ δεινὸν ἄνδρασ ὁμοφύλουσ καὶ συγγενεῖσ οὕτω μεταχειρίσασθαι δι’ ὀργήν, ἀλλ’ ἐν ἀνάγκαισ γλυκὺ γίνεται καὶ σκληρόν, κατὰ Σιμωνίδην, ὥσπερ ἀλγοῦντι τῷ θυμῷ καὶ φλεγμαίνοντι θεραπείαν καὶ ἀναπλήρωσιν προσφερόντων.

τὰ δὲ μετὰ ταῦτα πραχθέντα περὶ τὴν πόλιν οὔτ’ εἰσ καλὴν οὔτ’ εἰσ ἀναγκαίαν ἔστι θέσθαι τῷ Ἀράτῳ πρόφασιν. τῶν γὰρ Ἀχαιῶν τὴν πόλιν παρ’ Ἀντιγόνου δωρεὰν λαβόντων καὶ κατοικίζειν ἐγνωκότων αὐτὸσ οἰκιστὴσ αἱρεθεὶσ καὶ στρατηγὸσ ὢν ἐψηφίσατο μηκέτι καλεῖν Μαντίνειαν, ἀλλ’ Ἀντιγόνειαν, ὃ καὶ μέχρι νῦν καλεῖται, καὶ δοκεῖ δι’ ἐκεῖνον ἡ μὲν ἐρατεινὴ Μαντίνεια παντάπασιν ἐξαληλίφθαι, διαμένει δὲ ἡ πόλισ ἐπώνυμοσ τῶν ἀπολεσάντων καὶ ἀνελόντων τοὺσ πολίτασ.

일치하는 문장이 없습니다.

SEARCH

MENU NAVIGATION