헬라어 텍스트

Dionysius of Halicarnassus, Antiquitates Romanae, book 2, chapter 11

(디오니시오스, Antiquitates Romanae, book 2, chapter 11)

οὐ μόνον δ’ ἐν αὐτῇ τῇ πόλει τὸ δημοτικὸν ὑπὸ τὴν προστασίαν τῶν πατρικίων ἦν, ἀλλὰ καὶ τῶν ἀποίκων αὐτῆσ πόλεων καὶ τῶν ἐπὶ συμμαχίᾳ καὶ φιλίᾳ προσελθουσῶν καὶ τῶν ἐκ πολέμου κεκρατημένων ἑκάστη φύλακασ εἶχε καὶ προστάτασ οὓσ ἐβούλετο Ῥωμαίων. καὶ πολλάκισ ἡ βουλὴ τὰ ἐκ τούτων ἀμφισβητήματα τῶν πόλεων καὶ ἐθνῶν ἐπὶ τοὺσ προϊσταμένουσ αὐτῶν ἀποστέλλουσα, τὰ ὑπ’ ἐκείνων δικασθέντα κύρια ἡγεῖτο. οὕτω δὲ ἄρα βέβαιοσ ἦν ἡ Ῥωμαίων ὁμόνοια τὴν ἀρχὴν ἐκ τῶν ὑπὸ Ῥωμύλου κατασκευασθέντων λαβοῦσα ἐθῶν, ὥστε οὐδέποτε δι’ αἵματοσ καὶ φόνου τοῦ κατ’ ἀλλήλων ἐχώρησαν ἐντὸσ ἑξακοσίων καὶ τριάκοντα ἐτῶν, πολλῶν καὶ μεγάλων ἀμφισβητημάτων γενομένων τῷ δήμῳ πρὸσ τοὺσ ἐν τέλει περὶ τῶν κοινῶν, ὡσ ἐν ἁπάσαισ φιλεῖ γίγνεσθαι μικραῖσ τε καὶ μεγάλαισ πόλεσιν·

ἀλλὰ πείθοντεσ καὶ διδάσκοντεσ ἀλλήλουσ καὶ τὰ μὲν εἴκοντεσ, τὰ δὲ παρ’ εἰκόντων λαμβάνοντεσ, πολιτικὰσ ἐποιοῦντο τὰσ τῶν ἐγκλημάτων διαλύσεισ.

ἐξ οὗ δὲ Γάιοσ Γράκχοσ ἐπὶ τῆσ δημαρχικῆσ ἐξουσίασ γενόμενοσ διέφθειρε τὴν τοῦ πολιτεύματοσ ἁρμονίαν, οὐκέτι πέπαυνται σφάττοντεσ ἀλλήλουσ καὶ φυγάδασ ἐλαύνοντεσ ἐκ τῆσ πόλεωσ καὶ οὐδενὸσ τῶν ἀνηκέστων ἀπεχόμενοι παρὰ τὸ νικᾶν.

ἀλλὰ περὶ μὲν τούτων ἕτεροσ ἔσται τοῖσ λόγοισ καιρὸσ ἐπιτηδειότεροσ.