Diodorus Siculus, Bibliotheca Historica, book 2, chapter 40

(디오도로스 시켈로스, Bibliotheca Historica, book 2, chapter 40)

τὸ δὲ πᾶν πλῆθοσ τῶν Ἰνδῶν εἰσ ἑπτὰ μέρη διῄρηται, ὧν ἐστι τὸ μὲν πρῶτον σύστημα φιλοσόφων, πλήθει μὲν τῶν ἄλλων μερῶν λειπόμενον, τῇ δ’ ἐπιφανείᾳ πάντων πρωτεῦον. ἀλειτούργητοι γὰρ ὄντεσ οἱ φιλόσοφοι πάσησ ὑπουργίασ οὔθ’ ἑτέρων κυριεύουσιν οὔθ’ ὑφ’ ἑτέρων δεσπόζονται. παραλαμβάνονται δ’ ὑπὸ μὲν τῶν ἰδιωτῶν εἴσ τε τὰσ ἐν τῷ βίῳ θυσίασ καὶ εἰσ τὰσ τῶν τετελευτηκότων ἐπιμελείασ, ὡσ θεοῖσ γεγονότεσ προσφιλέστατοι καὶ περὶ τῶν ἐν ᾅδου μάλιστ’ ἐμπείρωσ ἔχοντεσ, ταύτησ τε τῆσ ὑπουργίασ δῶρά τε καὶ τιμὰσ λαμβάνουσιν ἀξιολόγουσ·

τῷ δὲ κοινῷ τῶν Ἰνδῶν μεγάλασ παρέχονται χρείασ παραλαμβανόμενοι μὲν κατὰ τὸ νέον ἔτοσ ἐπὶ τὴν μεγάλην σύνοδον, προλέγοντεσ δὲ τοῖσ πλήθεσι περὶ αὐχμῶν καὶ ἐπομβρίασ, ἔτι δ’ ἀνέμων εὐπνοίασ καὶ νόσων καὶ τῶν ἄλλων τῶν δυναμένων τοὺσ ἀκούοντασ ὠφελῆσαι. τὰ μέλλοντα γὰρ προακούσαντεσ οἵ τε πολλοὶ καὶ ὁ βασιλεὺσ ἐκπληροῦσιν ἀεὶ τὸ μέλλον ἐκλείπειν καὶ προκατασκευάζουσιν ἀεί τι τῶν χρησίμων.

ὁ δ’ ἀποτυχὼν τῶν φιλοσόφων ἐν ταῖσ προρρήσεσιν ἄλλην μὲν οὐδεμίαν ἀναδέχεται τιμωρίαν ἢ βλασφημίαν, ἄφωνοσ δὲ διατελεῖ τὸν λοιπὸν βίον. δεύτερον δ’ ἐστὶ μέροσ τὸ τῶν γεωργῶν, οἳ τῷ πλήθει τῶν ἄλλων πολὺ προέχειν δοκοῦσιν.

οὗτοι δὲ πολέμων καὶ τῆσ ἄλλησ λειτουργίασ ἀφειμένοι περὶ τὰσ γεωργίασ ἀσχολοῦνται· καὶ οὐδεὶσ ἂν πολέμιοσ περιτυχὼν γεωργῷ κατὰ τὴν χώραν ἀδικήσειεν ἄν, ἀλλ’ ὡσ κοινοὺσ εὐεργέτασ ἡγούμενοι πάσησ ἀδικίασ ἀπέχονται. διόπερ ἀδιάφθοροσ ἡ χώρα διαμένουσα καὶ καρποῖσ βρίθουσα πολλὴν ἀπόλαυσιν παρέχεται τῶν ἐπιτηδείων τοῖσ ἀνθρώποισ.

βιοῦσι δ’ ἐπὶ τῆσ χώρασ μετὰ τέκνων καὶ γυναικῶν οἱ γεωργοί, καὶ τῆσ εἰσ τὴν πόλιν καταβάσεωσ παντελῶσ ἀφεστήκασι. τῆσ δὲ χώρασ μισθοὺσ τελοῦσι τῷ βασιλεῖ διὰ τὸ πᾶσαν τὴν Ἰνδικὴν βασιλικὴν εἶναι, ἰδιώτῃ δὲ μηδενὶ γῆν ἐξεῖναι κεκτῆσθαι· χωρὶσ δὲ τῆσ μισθώσεωσ τετάρτην εἰσ τὸ βασιλικὸν τελοῦσι. τρίτον δ’ ἐστὶ φῦλον τὸ τῶν βουκόλων καὶ ποιμένων καὶ καθόλου πάντων τῶν νομέων, οἳ πόλιν μὲν ἢ κώμην οὐκ οἰκοῦσι, σκηνίτῃ δὲ βίῳ χρῶνται, οἱ δ’ αὐτοὶ καὶ κυνηγοῦντεσ καθαρὰν ποιοῦσι τὴν χώραν ὀρνέων τε καὶ θηρίων.

εἰσ ταῦτα δ’ ἀσκοῦντεσ καὶ φιλοτεχνοῦντεσ ἐξημεροῦσι τὴν Ἰνδικήν, πλήθουσαν πολλῶν καὶ παντοδαπῶν θηρίων τε καὶ ὀρνέων τῶν κατεσθιόντων τὰ σπέρματα τῶν γεωργῶν.

일치하는 문장이 없습니다.

SEARCH

MENU NAVIGATION