Diodorus Siculus, Bibliotheca Historica, book 2, chapter 22

(디오도로스 시켈로스, Bibliotheca Historica, book 2, chapter 22)

τὰ δ’ ὀνόματα πάντα τῶν βασιλέων καὶ τὸ πλῆθοσ τῶν ἐτῶν ὧν ἕκαστοσ ἐβασίλευσεν οὐ κατεπείγει γράφειν διὰ τὸ μηδὲν ὑπ’ αὐτῶν πεπρᾶχθαι μνήμησ ἄξιον. μόνη γὰρ τέτευχεν ἀναγραφῆσ ἡ πεμφθεῖσα συμμαχία τοῖσ Τρωσὶν ὑπ’ Ἀσσυρίων, ἧσ ἐστρατήγει Μέμνων ὁ Τιθωνοῦ. Τευτάμου γὰρ βασιλεύοντοσ τῆσ Ἀσίασ, ὃσ ἦν εἰκοστὸσ ἀπὸ Νινύου τοῦ Σεμιράμιδοσ, φασὶ τοὺσ μετ’ Ἀγαμέμνονοσ Ἕλληνασ ἐπὶ Τροίαν στρατεῦσαι, τὴν ἡγεμονίαν ἐχόντων τῆσ Ἀσίασ τῶν Ἀσσυρίων ἔτη πλείω τῶν χιλίων. καὶ τὸν μὲν Πρίαμον βαρυνόμενον τῷ πολέμῳ καὶ βασιλεύοντα τῆσ Τρῳάδοσ, ὑπήκοον δ’ ὄντα τῷ βασιλεῖ τῶν Ἀσσυρίων, πέμψαι πρὸσ αὐτὸν πρεσβευτὰσ περὶ βοηθείασ·

τὸν δὲ Τεύταμον μυρίουσ μὲν Αἰθίοπασ, ἄλλουσ δὲ τοσούτουσ Σουσιανοὺσ σὺν ἁρ́μασι διακοσίοισ ἐξαποστεῖλαι, στρατηγὸν ἐπικαταστήσαντα Μέμνονα τὸν Τιθωνοῦ. καὶ τὸν μὲν Τιθωνόν, κατ’ ἐκείνουσ τοὺσ χρόνουσ τῆσ Περσίδοσ ὄντα στρατηγόν, εὐδοκιμεῖν παρὰ τῷ βασιλεῖ μάλιστα τῶν καθεσταμένων ἐπάρχων, τὸν δὲ Μέμνονα τὴν ἡλικίαν ἀκμάζοντα διαφέρειν ἀνδρείᾳ τε καὶ ψυχῆσ λαμπρότητι.

οἰκοδομῆσαι δ’ αὐτὸν ἐπὶ τῆσ ἄκρασ τὰ ἐν Σούσοισ βασίλεια τὰ διαμείναντα μέχρι τῆσ Περσῶν ἡγεμονίασ, κληθέντα δ’ ἀπ’ ἐκείνου Μεμνόνεια· κατασκευάσαι δὲ καὶ διὰ τῆσ χώρασ λεωφόρον ὁδὸν τὴν μέχρι τῶν νῦν χρόνων ὀνομαζομένην Μεμνόνειαν. ἀμφισβητοῦσι δὲ καὶ οἱ περὶ τὴν Αἴγυπτον Αἰθίοπεσ, λέγοντεσ ἐν ἐκείνοισ τοῖσ τόποισ γεγονέναι τὸν ἄνδρα τοῦτον, καὶ βασίλεια παλαιὰ δεικνύουσιν, ἃ μέχρι τοῦ νῦν ὀνομάζεσθαί φασι Μεμνόνεια.

οὐ μὴν ἀλλὰ τοῖσ Τρωσὶ λέγεται βοηθῆσαι τὸν Μέμνονα μετὰ δισμυρίων μὲν πεζῶν, ἁρμάτων δὲ διακοσίων·

ὃν θαυμασθῆναί τε δι’ ἀνδρείαν καὶ πολλοὺσ ἀνελεῖν ἐν ταῖσ μάχαισ τῶν Ἑλλήνων, τὸ δὲ τελευταῖον ὑπὸ Θετταλῶν ἐνεδρευθέντα κατασφαγῆναι· τοῦ δὲ σώματοσ τοὺσ Αἰθίοπασ ἐγκρατεῖσ γενομένουσ κατακαῦσαί τε τὸν νεκρὸν καὶ τὰ ὀστᾶ πρὸσ Τιθωνὸν ἀποκομίσαι. περὶ μὲν οὖν Μέμνονοσ τοιαῦτ’ ἐν ταῖσ βασιλικαῖσ ἀναγραφαῖσ ἱστορεῖσθαί φασιν οἱ βάρβαροι.

일치하는 문장이 없습니다.

SEARCH

MENU NAVIGATION