Plutarch, Demetrius, chapter 25

(플루타르코스, Demetrius, chapter 25)

Δημήτριοσ δὲ παρελθὼν εἰσ Πελοπόννησον, οὐδενὸσ ὑφισταμένου τῶν ἐναντίων, ἀλλὰ φευγόντων καὶ προϊεμένων τὰσ πόλεισ, προσηγάγετο τήν τε καλουμένην Ἀκτὴν καὶ Ἀρκαδίαν, πλὴν Μαντινείασ, καὶ Ἄργοσ καὶ Σικυῶνα καὶ Κόρινθον ἐλύσατο τάλαντα δοὺσ ἑκατὸν τοῖσ φρουροῦσιν. ἐν Ἄργει μὲν οὖν τῆσ τῶν Ἡραίων ἑορτῆσ καθηκούσησ, ἀγωνοθετῶν καὶ συμπανηγυρίζων τοῖσ Ἕλλησιν, ἔγημε τὴν Αἰακίδου θυγατέρα, τοῦ Μολοττῶν βασιλέωσ, ἀδελφὴν δὲ Πύρρου, Δηϊδάμειαν.

Σικυωνίουσ δὲ φήσασ παρὰ τὴν πόλιν οἰκεῖν τὴν πόλιν, ἔπεισεν οὗ νῦν οἰκοῦσι μετοικίσασθαι· τῷ δὲ τόπῳ καὶ τοὔνομα τὴν πόλιν συμμεταβαλοῦσαν ἀντὶ Σικυῶνοσ Δημητριάδα προσηγόρευσεν. ἐν δὲ Ἰσθμῷ κοινοῦ συνεδρίου γενομένου καὶ πολλῶν ἀνθρώπων συνελθόντων, ἡγεμὼν ἀνηγορεύθη τῆσ Ἑλλάδοσ, ὡσ πρότερον οἱ περὶ Φίλιππον καὶ Ἀλέξανδρον·

ὧν ἐκεῖνοσ οὐ παρὰ μικρὸν ἐνόμιζεν ἑαυτὸν εἶναι βελτίονα, τῇ τύχῃ τῇ παρούσῃ καὶ τῇ δυνάμει τῶν πραγμάτων ἐπαιρόμενοσ. Ἀλέξανδροσ γοῦν οὐδένα τῶν ἄλλων βασιλέων ἀπεστέρησε τῆσ ὁμωνυμίασ, οὐδὲ αὑτὸν ἀνεῖπε βασιλέων βασιλέα, καίτοι πολλοῖσ τὸ καλεῖσθαι καὶ εἶναι βασιλέασ αὐτὸσ δεδωκώσ· ἐκεῖνοσ δὲ χλευάζων καὶ γελῶν τοὺσ ἄλλον τινὰ πλὴν τοῦ πατρὸσ καὶ αὐτοῦ βασιλέα προσαγορεύοντασ, ἡδέωσ ἤκουε τῶν παρὰ πότον ἐπιχύσεισ λαμβανόντων Δημητρίου βασιλέωσ, Σελεύκου δὲ ἐλεφαντάρχου, Πτολεμαίου δὲ ναυάρχου, Λυσιμάχου δὲ γαζοφύλακοσ, Ἀγαθοκλέουσ δὲ τοῦ Σικελιώτου νησιάρχου.

τούτων δὲ πρὸσ τοὺσ βασιλεῖσ ἐκφερομένων οἱ μὲν ἄλλοι βασιλεῖσ κατεγέλων, Λυσίμαχοσ δ’ ἠγανάκτει μόνοσ εἰ σπάδοντα νομίζει Δημήτριοσ αὐτόν·

ἐπιεικῶσ γὰρ εἰώθεισαν εὐνούχουσ ἔχειν γαζοφύλακασ. ἦν δὲ καὶ πάντων ἀπεχθέστατοσ ὁ Λυσίμαχοσ αὐτῷ, καὶ λοιδορῶν εἰσ τὸν ἔρωτα τῆσ Λαμίασ ἔλεγε νῦν πρῶτον ἑωρακέναι πόρνην προερχομένην ἐκ τραγικῆσ σκηνῆσ·

ὁ δὲ Δημήτριοσ ἔφη τὴν ἑαυτοῦ πόρνην σωφρονεστέραν εἶναι τῆσ ἐκείνου Πηνελόπησ.

일치하는 문장이 없습니다.

SEARCH

MENU NAVIGATION