헬라어 문장 검색 - Παυσαν́Δεσξριπ́10́16́

(파우사니아스, Description of Greece, Φωκικά, Λοκρῶν Ὀζόλων, chapter 16)

τῶν δὲ ἀναθημάτων ἃ οἱ βασιλεῖσ ἀπέστειλαν οἱ Λυδῶν, οὐδὲν ἔτι ἦν αὐτῶν εἰ μὴ σιδηροῦν μόνον τὸ ὑπόθημα τοῦ Ἀλυάττου κρατῆροσ. τοῦτο Γλαύκου μέν ἐστιν ἔργον τοῦ Χίου, σιδήρου κόλλησιν ἀνδρὸσ εὑρόντοσ· ἔλασμα δὲ ἕκαστον τοῦ ὑποθήματοσ ἐλάσματι ἄλλῳ προσεχὲσ οὐ περόναισ ἐστὶν ἢ κέντροισ, μόνη δὲ ἡ κόλλα συνέχει τε καὶ ἔστιν αὕτη τῷ σιδήρῳ δεσμόσ. σχῆμα δὲ τοῦ ὑποθήματοσ κατὰ πύργον μάλιστα ἐσ μύουρον ἀνιόντα ἀπὸ εὐρυτέρου τοῦ κάτω·

ἑκάστη δὲ πλευρὰ τοῦ ὑποθήματοσ οὐ διὰ πάσησ πέφρακται, ἀλλά εἰσιν αἱ πλάγιαι τοῦ σιδήρου ζῶναι ὥσπερ ἐν κλίμακι οἱ ἀναβασμοί· τὰ δὲ ἐλάσματα τοῦ σιδήρου τὰ ὀρθὰ ἀνέστραπται κατὰ τὰ ἄκρα ἐσ τὸ ἐκτόσ, καὶ ἕδρα τοῦτο ἦν τῷ κρατῆρι. αὐτοί τε λέγουσιν οἱ Δελφοὶ καὶ ἐν ᾠδῇ τινι Πίνδαροσ ὁμολογοῦντά σφισιν ἐποίησεν.

Λακεδαιμονίων δὲ ἀνάθημά ἐστιν ἐνταῦθα, Καλάμιδοσ δὲ ἔργον, Ἑρμιόνη ἡ Μενελάου θυγάτηρ, ἡ συνοικήσασα Ὀρέστῃ τῷ Ἀγαμέμνονοσ καὶ ἔτι πρότερον Νεοπτολέμῳ τῷ Ἀχιλλέωσ.

Εὐρύδαμον δὲ στρατηγόν τε Αἰτωλῶν καὶ στρατοῦ τοῦ Γαλατῶν ἐναντία ἡγησάμενον ἀνέθεσαν οἱ Αἰτωλοί. ἔστι δὲ ἐν τοῖσ Κρητικοῖσ ὄρεσι καὶ κατ’ ἐμὲ ἔτι Ἔλυροσ πόλισ·

οὗτοι οὖν αἶγα χαλκῆν ἀπέστειλαν ἐσ Δελφούσ, δίδωσι δὲ νηπίοισ ἡ αἲξ Φυλακίδῃ καὶ Φιλάνδρῳ γάλα· παῖδασ δὲ αὐτοὺσ οἱ Ἐλύριοί φασιν Ἀπόλλωνόσ τε εἶναι καὶ Ἀκακαλλίδοσ νύμφησ, συγγενέσθαι δὲ τῇ Ἀκακαλλίδι Ἀπόλλωνα ἐν πόλει Τάρρᾳ καὶ οἴκῳ Καρμάνοροσ. Καρύστιοι δὲ οἱ Εὐβοεῖσ βοῦν καὶ οὗτοι χαλκοῦν παρὰ τῷ Ἀπόλλωνι ἔστησαν ἀπὸ ἔργου τοῦ Μηδικοῦ·

βοῦσ δὲ οἱ Καρύστιοι καὶ οἱ Πλαταιεῖσ τὰ ἀναθήματα ἐποιήσαντο, ὅτι ἐμοὶ δοκεῖν ἀπωσάμενοι τὸν βάρβαρον τήν τε ἄλλην βεβαίωσ ἐκτήσαντο εὐδαιμονίαν καὶ ἀροῦν ἐλευθέραν τὴν γῆν. στρατηγῶν δὲ εἰκόνασ καὶ Ἀπόλλωνά τε καὶ Ἄρτεμιν τὸ ἔθνοσ τὸ Αἰτωλικὸν ἀπέστειλαν καταστρεψάμενοι τοὺσ ὁμόρουσ σφίσιν Ἀκαρνᾶνασ. παραλογώτατον δὲ ἐπυνθανόμην ὑπάρξαν Λιπαραίοισ ἐσ Τυρσηνούσ.

τοὺσ γὰρ δὴ Λιπαραίουσ ἐναντία ναυμαχῆσαι τῶν Τυρσηνῶν ναυσὶν ὡσ ἐλαχίσταισ ἐκέλευσεν ἡ Πυθία. πέντε οὖν ἀνάγονται τριήρεσιν ἐπὶ τοὺσ Τυρσηνούσ· οἱ δὲ ‐ ἀπηξίουν γὰρ μὴ ἀποδεῖν Λιπαραίων τὰ ναυτικά ‐ ἀντανάγονταί σφισιν ἴσαισ ναυσί.

ταύτασ τε οὖν αἱροῦσιν οἱ Λιπαραῖοι καὶ ἄλλασ πέντε ὑστέρασ σφίσιν ἀνταναχθείσασ, καὶ τρίτην νεῶν πεντάδα καὶ ὡσαύτωσ τετάρτην ἐχειρώσαντο. ἀνέθεσαν οὖν ἐσ Δελφοὺσ ταῖσ ἁλούσαισ ναυσὶν ἀριθμὸν ἴσα Ἀπόλλωνοσ ἀγάλματα. Ἐχεκρατίδησ δὲ ἀνὴρ Λαρισαῖοσ τὸν Ἀπόλλωνα ἀνέθηκε τὸν μικρόν·

καὶ ἁπάντων πρῶτον τεθῆναι τῶν ἀναθημάτων τοῦτό φασιν οἱ Δελφοί.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

Ancient Greek Text

Pausanias, Description of Greece, Φωκικά, Λοκρῶν Ὀζόλων, chapter 16

(파우사니아스, Description of Greece, Φωκικά, Λοκρῶν Ὀζόλων, chapter 16)

상위

목록

SEARCH

MENU NAVIGATION