헬라어 텍스트

Dionysius of Halicarnassus, Antiquitates Romanae, Books VII-IX, book 7, chapter 71

(디오니시오스, Antiquitates Romanae, Books VII-IX, book 7, chapter 71)

ἕτεροσ μὲν οὖν ἀποχρῆν ἂν ὑπέλαβε καὶ αὐτὰ τὰ νῦν πραττόμενα ἐν τῇ πόλει μηνύματα οὐ μικρὰ τῶν παλαιῶν ἐπιτηδευμάτων ὑπολαβεῖν· ἐγὼ δ’, ἵνα μή τισ ἀσθενῆ τὴν πίστιν εἶναι ταύτην ὑπολάβῃ κατ’ ἐκείνην τὴν ἀπίθανον ὑπόληψιν, ὅτι παντὸσ τοῦ Ἑλληνικοῦ κρατήσαντεσ ἀσμένωσ ἂν τὰ κρείττω μετέμαθον ἔθη τῶν ἐπιχωρίων ὑπεριδόντεσ, ἐξ ἐκείνου ποιήσομαι τοῦ χρόνου τὴν τέκμαρσιν, ὅτ’ οὔπω τὴν τῆσ Ἑλλάδοσ εἶχον ἡγεμονίαν οὐδὲ ἄλλην διαπόντιον οὐδεμίαν ἀρχήν, Κοίντῳ Φαβίῳ βεβαιωτῇ χρώμενοσ καὶ οὐδεμιᾶσ ἔτι δεόμενοσ πίστεωσ ἑτέρασ· παλαιότατοσ γὰρ ἁνὴρ τῶν τὰ Ῥωμαϊκὰ συνταξαμένων, καὶ πίστιν οὐκ ἐξ ὧν ἤκουσε μόνον, ἀλλὰ καὶ ἐξ ὧν αὐτὸσ ἔγνω παρεχόμενοσ. ταύτην δὴ τὴν ἑορτὴν ἐψηφίσατο μὲν ἡ βουλὴ τῶν Ῥωμαίων ἄγειν, ὡσ καὶ πρότερον ἔφην, κατὰ τὰσ γενομένασ εὐχὰσ ὑπὸ τοῦ δικτάτοροσ Αὔλου Ποστομίου, ὅτ’ ἔμελλεν ἀγωνίζεσθαι πρὸσ τὰσ ἀποστάσασ Λατίνων πόλεισ κατάγειν ἐπιχειρούσασ Ταρκύνιον ἐπὶ τὴν ἀρχήν·

ἀναλοῦσθαι δ’ ἔταξε καθ’ ἕκαστον ἐνιαυτὸν εἴσ τε τὰσ θυσίασ καὶ τοὺσ ἀγῶνασ ἀργυρίου πεντακοσίασ μνᾶσ·

καὶ μέχρι τοῦ Φοινικικοῦ πολέμου ταῦτ’ ἐδαπάνων εἰσ τὴν ἑορτήν. ἐν δὲ ταῖσ ἱεραῖσ ἡμέραισ ταύταισ πολλὰ μὲν καὶ ἄλλα ἐγίνετο νόμοισ Ἑλληνικοῖσ κατὰ τε πανηγυρισμοὺσ καὶ ξένων ὑποδοχὰσ καὶ ἐκεχειρίασ, ἃ πολὺ ἂν ἔργον εἰή λέγειν, τὰ δὲ περὶ πομπήν τε καὶ θυσίαν καὶ τὰ κατὰ τοὺσ ἀγῶνασ·

ἀπόχρη γὰρ ἐκ τούτων καὶ τὰ μὴ λεχθέντα ἐξετάζειν· τοιάδε.