Dionysius of Halicarnassus, Antiquitates Romanae, Books VII-IX, book 7, chapter 13

(디오니시오스, Antiquitates Romanae, Books VII-IX, book 7, chapter 13)

ταῦτα τοῖσ Ῥωμαίοισ μαθοῦσι τῆσ μὲν συμφορᾶσ οἶκτοσ εἰσῄει, καὶ οὐδὲν ᾤοντο δεῖν τοῖσ ἐχθροῖσ ἐπὶ τοιαύταισ τύχαισ μνησικακεῖν, ὡσ ἱκανὰσ δεδωκόσι τοῖσ θεοῖσ ὑπὲρ σφῶν δίκασ ἀνθ’ ὧν ἔμελλον δράσειν· Οὐελίτρασ δὲ παραλαμβάνειν ἐδόκει κληρούχων οὐκ ὀλίγων ἀποστολῇ πολλὰ τὰ συμφέροντα ἐκ τοῦ πράγματοσ ἐπιλογιζομένοισ. τό τε γὰρ χωρίον ἱκανὸν εἶναι ἐφαίνετο φυλακῇ ἀξιόχρεῳ καταληφθὲν οἷσ ἂν νεωτερίζειν ἢ παρακινεῖν τι βουλομένοισ ᾖ μέγα κώλυμα καὶ ἐμπόδιον εἶναι·

ἥ τ’ ἀπορία τῆσ τροφῆσ ἡ κατέχουσα τὴν πόλιν οὐ παρ’ ὀλίγον μετριωτέρα γενήσεσθαι ὑπωπτεύετο, εἰ μετασταίη τισ ἐξ αὐτῆσ ἀπὸ τοῦ πλήθουσ μοῖρα ἀξιόλογοσ.

μάλιστα δ’ ἡ στάσισ ἀναρριπιζομένη, πρὶν ἢ πεπαῦσθαι καλῶσ ἔτι τὴν προτέραν, ἐνῆγεν αὐτοὺσ ψηφίζεσθαι τὸν ἀπόστολον. πάλιν γάρ, ὥσπερ καὶ πρότερον, ὁ δῆμοσ ἠρεθίζετο καὶ δι’ ὀργῆσ εἶχε τοὺσ πατρικίουσ, πολλοί τε καὶ χαλεποὶ κατ’ αὐτῶν ἐγίνοντο λόγοι τῶν μὲν ὀλιγωρίαν ἐγκαλούντων καὶ ῥᾳθυμίαν, ὅτι οὐκ ἐκ πολλοῦ προείδοντο τὴν ἐσομένην τοῦ σίτου σπάνιν καὶ προὐμηχανήσαντο τὰ πρὸσ τὴν συμφορὰν ἀλεξήματα, τῶν δ’ ἐξ ἐπιβουλῆσ ὑπ’ αὐτῶν γεγονέναι τὴν σιτοδείαν ἀποφαινόντων δι’ ὀργήν τε καὶ ἐπιθυμίαν τοῦ κακῶσαι τὸ δημοτικὸν ἀναμνήσει τῆσ ἀποστάσεωσ.

διὰ ταύτασ μὲν δὴ τὰσ αἰτίασ ἡ τῶν κληρούχων ἀποστολὴ ταχεῖα ἐγίνετο τριῶν ἀποδειχθέντων ἀνδρῶν ὑπὸ τῆσ βουλῆσ ἡγεμόνων.

τῷ δήμῳ δὲ κατ’ ἀρχὰσ μὲν ἦν ἀσμένῳ τοὺσ κληρούχουσ διαλαγχάνειν ὡσ λιμοῦ τ’ ἀπαλλαχθησομένῳ καὶ χώραν οἰκήσοντι εὐδαίμονα· ἔπειτ’ ἐνθυμουμένῳ τὸν λοιμόν, ὃσ.

ἐν τῇ μελλούσῃ αὐτὸν ὑποδέχεσθαι πόλει πολὺσ γενόμενοσ τούσ τ’ οἰκήτορασ διεφθάρκει καὶ δέοσ παρεῖχε, μὴ καὶ τοὺσ ἐποίκουσ ταὐτὸν ἐργάσηται, μεθίστατο κατὰ μικρὸν εἰσ τἀναντία ἡ γνώμη, ὥστ’ οὐ πολλοί τινεσ ἐφάνησαν οἱ μετέχειν βουλόμενοι τῆσ ἀποικίασ, ἀλλὰ πολὺ ἐλάττουσ ὧν ἡ βουλὴ ἐψηφίσατο, καὶ οὗτοι δ’ ἤδη σφῶν αὐτῶν κατεγνώκεσαν ὡσ κακῶσ βεβουλευμένων καὶ ὑπανεδύοντο τὴν ἔξοδον. κατελήφθη μέντοι τοῦτο τὸ μέροσ καὶ τὸ ἄλλο τὸ μὴ ἑκουσίωσ συναιρόμενον τῆσ ἐξόδου ψηφισαμένησ τῆσ βουλῆσ ἐξ ἁπάντων γενέσθαι Ῥωμαίων κλήρῳ τὴν ἔξοδον, κατὰ δὲ τῶν λαχόντων, εἰ μὴ ἐξίοιεν, χαλεπὰσ καὶ ἀπαραιτήτουσ θεμένησ ζημίασ.

εὐπρεπεῖ ἀνάγκῃ καταληφθεὶσ ἀπεστάλη, καὶ ἕτεροσ αὖθισ οὐ πολλαῖσ ἡμέραισ ὕστερον εἰσ Νώρβαν πόλιν, ἥ ἐστι τοῦ Λατίνων ἔθνουσ οὐκ ἀφανήσ.

일치하는 문장이 없습니다.

SEARCH

MENU NAVIGATION