Dionysius of Halicarnassus, Antiquitates Romanae, Books VII-IX, book 7, chapter 38 4:

καὶ ἔλεξε Μηνύκιοσ τοιάδε· ἡμῖν, ὦ δήμαρχοι, δοκεῖ χρῆναι τὴν στάσιν ἐξελαύνειν ἐκ τῆσ πόλεωσ ἁπάσῃ δυνάμει καὶ μὴ φιλονεικεῖν ἐναντία τῷ δήμῳ περὶ μηδενὸσ χρήματοσ· μάλιστα δ’ ὅταν ὁρῶμεν ὑμᾶσ ἀπὸ τῶν βιαίων ἐπὶ τὰ δίκαια καὶ τοὺσ λόγουσ ἥκοντασ. ταύτησ μέντοιγε τῆσ γνώμησ ἐπαινοῦντεσ ὑμᾶσ τὴν βουλὴν οἰόμεθα δεῖν ἄρξαι προβούλευμα ποιησαμένην, ὥσπερ ἐστὶν ἡμῖν πάτριον. δύναισθε δ’ ἂν καὶ αὐτοὶ τοῦτο μαρτυρεῖν, ὅτι, ἐξ οὗ τήνδε τὴν πόλιν ἔκτισαν ἡμῶν οἱ πρόγονοι, τοῦτο τὸ γέρασ ἔχουσα ἡ βουλὴ διατετέλεκε, καὶ οὐθὲν πώποτε ὁ δῆμοσ, ὅ τι μὴ προβουλεύσειεν ἡ βουλή, οὔτ’ ἐπέκρινεν οὔτ’ ἐπεψήφισεν, οὐχ ὅτι νῦν, ἀλλ’ οὐδ’ ἐπὶ τῶν βασιλέων , ἀλλ’ ὅσα τῷ συνεδρίῳ δόξειε, ταῦθ’ οἱ βασιλεῖσ εἰσ τὸν δῆμον ἐκφέροντεσ ἐπεκύρουν.