Dionysius of Halicarnassus, De Demosthene, chapter 40 6:

ἃ δ’ ἔστιν ἴδια καὶ τῆσ ἡγεμονίασ ἄξια καὶ τοῖσ προειρημένοισ ὁμολογούμενα, ταῦτα δ’ ἐμὸν ἔργον ἐστὶν εἰπεῖν. τοσοῦτον γὰρ ἡ πόλισ ἡμῶν διέφερεν, ὅτε ἦν ἀκέραιοσ, ὥστε ἀνάστατοσ γενομένη πλείουσ μὲν συνεβάλετο τριήρεισ εἰσ τὸν κίνδυνον τὸν ὑπὲρ τῆσ Ἑλλάδοσ ἢ σύμπαντεσ οἱ ναυμαχήσαντεσ, δυναμένασ δὲ πρὸσ δὶσ τοσαύτασ κινδυνεύειν. οὐδείσ γ’ οὖν πρὸσ ἡμᾶσ οὕτωσ ἔχει δυσμενῶσ, ὅστισ οὐκ ἂν ὁμολογήσειε διὰ μὲν τὴν ναυμαχίαν ἡμᾶσ τῷ πολέμῳ κρατῆσαι, ταύτησ δὲ τὴν πόλιν αἰτίαν γεγενῆσθαι. καίτοι μελλούσησ στρατείασ ἐπὶ τοὺσ βαρβάρουσ ἔσεσθαι τίνασ χρὴ τὴν ἡγεμονίαν ἔχειν; οὐ τοὺσ ἐν τῷ προτέρῳ πολέμῳ μάλιστα εὐδοκιμήσαντασ καὶ πολλάκισ μὲν ἰδίᾳ προκινδυνεύσαντασ, ἐν δὲ τοῖσ κοινοῖσ τῶν ἀγώνων ἀριστείων ἀξιωθέντασ;