Dionysius of Halicarnassus, De Demosthene, chapter 27 1:

τῆσ δ’ εὐγενείασ πρῶτον ὑπῆρξε τοῖσδε ἡ τῶν προγόνων γένεσισ, οὐκ ἔπηλυσ οὖσα οὐδὲ τοὺσ ἐκγόνουσ τούτουσ ἀποφηναμένη μετοικοῦντασ ἐν τῇ χώρᾳ, ἄλλοθεν σφῶν ἡκόντων, ἀλλ’ αὐτόχθονασ καὶ τῷ ὄντι πατρίδα οἰκοῦντασ καὶ ζῶντασ καὶ τρεφομένουσ οὐχ ὑπὸ μητρυιᾶσ, ὡσ οἱ ἄλλοι, ἀλλ’ ὑπὸ μητρὸσ τῆσ χώρασ, ἐν ᾗ ᾤκουν, καὶ νῦν κεῖσθαι τελευτήσαντασ ἐν οἰκείοισ τόποισ τῆσ τεκούσησ τε καὶ θρεψάσησ καὶ ὑποδεξαμένησ. ποῖον ἔθνοσ ἀνθρώπων καθαρᾷ διαλέκτῳ χρώμενον ἐρεῖ γένεσιν τὴν μὲν αὐτόχθονα τὴν δὲ ἐπήλυδα; ἡμῖν γὰρ δή τι συμβεβηκόσ ἐστι τὸ εἶναι αὐτόχθοσιν ἢ μὴ ἐπιχωρίοισ, οὐχὶ τῇ γενέσει. δύναται γοῦν τισ ἀλλαχῇ γενόμενοσ ἀνὴρ ἑτέρωσε μετοικῆσαι, ἡ δὲ γένεσισ αὐτὴ τοῦτο παθεῖν οὐ δύναται. τίσ δ’ ἂν ἀξιώσειε τῶν εὖ διαλέγεσθαι σπουδαζόντων εἰπεῖν, ὅτι ἡ γένεσισ ἡ τῶν προγόνων τοὺσ ὕστερον γενησομένουσ ἀπεφήνατο αὐτόχθονασ καὶ μὴ μετοίκουσ εἶναι τῆσ χώρασ, ἐν ᾗ ἐγένοντο;