헬라어 텍스트

Plutarch, Alexander, chapter 67

(플루타르코스, Alexander, chapter 67)

ἀναλαβὼν οὖν ἐνταῦθα τὴν δύναμιν ἐξώρμησε κώμῳ χρώμενοσ ἐφ’ ἡμέρασ ἑπτὰ διὰ τῆσ Καρμανίασ, αὐτὸν μὲν οὖν ἵπποι σχέδην ἐκόμιζον ὀκτώ, μετὰ τῶν ἑταίρων ὑπὲρ θυμέλησ ἐν ὑψηλῷ καὶ περιφανεῖ πλαισίῳ πεπηγυίασ εὐωχούμενον συνεχῶσ ἡμέρασ καὶ νυκτόσ· ἅμαξαι δὲ παμπληθεῖσ, αἱ μὲν ἁλουργοῖσ καὶ ποικίλοισ περιβολαίοισ, αἱ δ’ ὕλησ ἀεὶ προσφάτου καὶ χλωρᾶσ σκιαζόμεναι κλάδοισ, εἵποντο τοὺσ ἄλλουσ ἄγουσαι φίλουσ καὶ ἡγεμόνασ ἐστεφανωμένουσ καὶ πίνοντασ, εἶδεσ δ’ ἂν οὐ πέλτην, οὐ κράνοσ, οὐ σάρισαν, ἀλλὰ φιάλαισ καὶ ῥυτοῖσ καὶ θηρικλείοισ παρὰ τὴν ὁδὸν ἅπασαν οἱ στρατιῶται βαπτίζοντεσ ἐκ πίθων μεγάλων καὶ κρατήρων ἀλλήλοισ προέπινον, οἱ μὲν ἐν τῷ προάγειν ἅμα καὶ βαδίζειν, οἱ δὲ κατακείμενοι. πολλὴ δὲ μοῦσα συρίγγων καὶ αὐλῶν ᾠδῆσ τε καὶ ψαλμοῦ καὶ βακχείασ γυναικῶν κατεῖχε πάντα τόπον, τῷ δὲ ἀτάκτῳ καὶ πεπλανημένῳ τῆσ πορείασ παρείπετο καὶ παιδιὰ βακχικῆσ ὕβρεωσ, ὡσ τοῦ θεοῦ παρόντοσ αὐτοῦ καὶ συμπαραπέμποντοσ τὸν κῶμον.

ἐπεὶ δὲ ἧκε τῆσ Γεδρωσίασ εἰσ τὸ βασίλειον, αὖθισ ἀνελάμβανε τὴν στρατιὰν πανηγυρίζων.

λέγεται δὲ μεθύοντα αὐτὸν θεωρεῖν ἀγῶνασ χορῶν, τὸν δὲ ἐρώμενον Βαγώαν χορεύοντα νικῆσαι καὶ κεκοσμημένον διὰ τοῦ θεάτρου παρελθόντα καθίσαι παρ’ αὐτόν·

ἰδόντασ δὲ τοὺσ Μακεδόνασ κροτεῖν καὶ βοᾶν φιλῆσαι κελεύοντασ, ἄχρι οὗ περιβαλὼν κατεφίλησεν.