헬라어 문장 검색 - Πλυταρ́Αλεχανδ́57́

(플루타르코스, Alexander, chapter 57)

μέλλων δὲ ὑπερβάλλειν εἰσ τὴν Ἰνδικὴν, ὡσ ἑώρα πλήθει λαφύρων τὴν στρατιὰν ἤδη βαρεῖαν καὶ δυσκίνητον οὖσαν, ἅμ’ ἡμέρᾳ συνεσκευασμένων τῶν ἁμαξῶν, πρώτασ μὲν ὑπέπρησε τὰσ αὐτοῦ καὶ τῶν ἑταίρων, μετὰ δὲ ταύτασ ἐκέλευσε καὶ ταῖσ τῶν Μακεδόνων ἐνεῖναι πῦρ. καὶ τοῦ πράγματοσ τὸ βούλευμα μεῖζον ἐφάνη καὶ δεινότερον ἢ τὸ ἔργον. ὀλίγουσ μὲν γὰρ ἠνίασεν, οἱ δὲ πλεῖστοι βοῇ καὶ ἀλαλαγμῷ μετὰ ἐνθουσιασμοῦ τὰ μὲν ἀναγκαῖα τοῖσ δεομένοισ μεταδιδόντεσ, τὰ δὲ περιόντα τῆσ χρείασ αὐτοὶ κατακαίοντεσ καὶ διαφθείροντεσ ὁρμῆσ καὶ προθυμίασ ἐνεπίμπλασαν τὸν Ἀλέξανδρον.

ἤδη δὲ καὶ φοβερὸσ ἦν καὶ ἀπαραίτητοσ κολαστὴσ τῶν πλημμελούντων. καὶ γὰρ Μένανδρόν τινα τῶν ἑταίρων ἄρχοντα φρουρίου καταστήσασ, ὡσ οὐκ ἐβούλετο μένειν, ἀπέκτεινε, καὶ τῶν ἀποστάντων βαρβάρων Ὀρσοδάτην αὐτὸσ κατετόξευσε. προβάτου δὲ τεκόντοσ ἄρνα περὶ τῇ κεφαλῇ σχῆμα καὶ χρῶμα τιάρασ ἔχοντα καὶ διδύμουσ ἑκατέρωθεν αὐτοῦ, βδελυχθεὶσ τὸ σημεῖον ἐκαθάρθη μὲν ὑπὸ τῶν Βαβυλωνίων, οὓσ ἐξ ἔθουσ ἐπήγετο πρὸσ τὰ τοιαῦτα·

διελέχθη δὲ πρὸσ τοὺσ φίλουσ ὡσ οὐ δι’ αὑτόν, ἀλλὰ δι’ ἐκείνουσ ταράττοιτο, μὴ τὸ κράτοσ εἰσ ἀγεννῆ καὶ ἄναλκιν ἄνθρωπον ἐκλιπόντοσ αὐτοῦ περιστήσῃ τὸ δαιμόνιον. οὐ μὴν ἀλλὰ βέλτιόν τι σημεῖον γενόμενον τὴν ἀθυμίαν ἔλυσεν. ὁ γὰρ ἐπὶ τῶν στρωματοφυλάκων τεταγμένοσ ἀνὴρ Μακεδὼν, ὄνομα Πρόξενοσ, τῇ βασιλικῇ σκηνῇ χώραν ὀρύττων παρὰ τὸν Ὦξον ποταμόν ἀνεκάλυψε πηγὴν ὑγροῦ λιπαροῦ καὶ πιμελώδουσ·

ἀπαντλουμένου δὲ τοῦ πρώτου καθαρὸν ἀνέβλυζεν ἤδη καὶ διαυγέσ ἔλαιον, οὔτε ὀσμῇ δοκοῦν οὔτε γεύσει ἐλαίου διαφέρειν, στιλπνότητά τε καὶ λιπαρότητα παντάπασιν ἀπαράλλακτον, καὶ ταῦτα τῆσ χώρασ μηδὲ ἐλαίασ φερούσησ. λέγεται μὲν οὖν καὶ τὸν Ὦξον αὐτὸν εἶναι μαλακώτατον ὕδωρ, ὥστε τὸ δέρμα τοῖσ λουομένοισ ἐπιλιπαίνειν.

οὐ μὴν ἀλλὰ θαυμαστῶσ Ἀλέξανδροσ ἡσθεὶσ δῆλόσ ἐστιν ἐξ ὧν γράφει πρὸσ Ἀντίπατρον, ἐν τοῖσ μεγίστοισ τοῦτο τῶν ἀπὸ τοῦ θεοῦ γεγονότων αὐτῷ τιθέμενοσ, οἱ δὲ μάντεισ ἐνδόξου μὲν στρατείασ, ἐπιπόνου δὲ καὶ χαλεπῆσ τὸ σημεῖον ἐποιοῦντο· πόνων γὰρ ἀρωγὴν ἔλαιον ἀνθρώποισ ὑπὸ θεοῦ δεδόσθαι.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Plutarch, Alexander, chapter 57

(플루타르코스, Alexander, chapter 57)

상위

목록

SEARCH

MENU NAVIGATION