헬라어 텍스트

Herodotus, The Histories, book 5, chapter 67

(헤로도토스, The Histories, book 5, chapter 67)

ταῦτα δέ, δοκέειν ἐμοί, ἐμιμέετο ὁ Κλεισθένησ οὗτοσ τὸν ἑωυτοῦ μητροπάτορα Κλεισθένεα τὸν Σικυῶνοσ τύραννον. Κλεισθένησ γὰρ Ἀργείοισι πολεμήσασ τοῦτο μὲν ῥαψῳδοὺσ ἔπαυσε ἐν Σικυῶνι ἀγωνίζεσθαι τῶν Ὁμηρείων ἐπέων εἵνεκα, ὅτι Ἀργεῖοί τε καὶ Ἄργοσ τὰ πολλὰ πάντα ὑμνέαται· τοῦτο δέ, ἡρώιον γὰρ ἦν καὶ ἔστι ἐν αὐτῇ τῇ ἀγορῇ τῶν Σικυωνίων Ἀδρήστου τοῦ Ταλαοῦ, τοῦτον ἐπεθύμησε ὁ Κλεισθένησ ἐόντα Ἀργεῖον ἐκβαλεῖν ἐκ τῆσ χώρησ. ἐλθὼν δὲ ἐσ Δελφοὺσ ἐχρηστηριάζετο εἰ ἐκβάλοι τὸν Ἄδρηστον·

ἡ δὲ Πυθίη οἱ χρᾷ φᾶσα Ἄδρηστον μὲν εἶναι Σικυωνίων βασιλέα, κεῖνον δὲ λευστῆρα. ἐπεὶ δὲ ὁ θεὸσ τοῦτό γε οὐ παρεδίδου, ἀπελθὼν ὀπίσω ἐφρόντιζε μηχανὴν τῇ αὐτὸσ ὁ Ἄδρηστοσ ἀπαλλάξεται. ὡσ δέ οἱ ἐξευρῆσθαι ἐδόκεε, πέμψασ ἐσ Θήβασ τὰσ Βοιωτίασ ἔφη θέλειν ἐπαγαγέσθαι Μελάνιππον τὸν Ἀστακοῦ· οἱ δὲ Θηβαῖοι ἔδοσαν. ἐπαγαγόμενοσ δὲ ὁ Κλεισθένησ τὸν Μελάνιππον τέμενόσ οἱ ἀπέδεξε ἐν αὐτῷ τῷ πρυτανηίῳ καί μιν ἵδρυσε ἐνθαῦτα ἐν τῷ ἰσχυροτάτῳ.

ἐπηγάγετο δὲ τὸν Μελάνιππον ὁ Κλεισθένησ καὶ γὰρ τοῦτο δεῖ ἀπηγήσασθαι ὡσ ἔχθιστον ἐόντα Ἀδρήστῳ, ὃσ τόν τε ἀδελφεόν οἱ Μηκιστέα ἀπεκτόνεε καὶ τὸν γαμβρὸν Τυδέα. ἐπείτε δέ οἱ τὸ τέμενοσ ἀπέδεξε, θυσίασ τε καὶ ὁρτὰσ Ἀδρήστου ἀπελόμενοσ ἔδωκε τῷ Μελανίππῳ.

οἱ δὲ Σικυώνιοι ἐώθεσαν μεγαλωστὶ κάρτα τιμᾶν τὸν Ἄδρηστον· ἡ γὰρ χώρη ἦν αὕτη Πολύβου, ὁ δὲ Ἄδρηστοσ ἦν Πολύβου θυγατριδέοσ, ἄπαισ δὲ Πόλυβοσ τελευτῶν διδοῖ Ἀδρήστῳ τὴν ἀρχήν. τά τε δὴ ἄλλα οἱ Σικυώνιοι ἐτίμων τὸν Ἄδρηστον καὶ δὴ πρὸσ τὰ πάθεα αὐτοῦ τραγικοῖσι χοροῖσι ἐγέραιρον, τὸν μὲν Διόνυσον οὐ τιμῶντεσ, τὸν δὲ Ἄδρηστον.

Κλεισθένησ δὲ χοροὺσ μὲν τῷ Διονύσῳ ἀπέδωκε, τὴν δὲ ἄλλην θυσίην Μελανίππῳ.